नागपूरमध्ये केंद्रीय मंत्री नितीन गडकरी यांच्या हस्ते शंभरहून अधिक उमेदवारांना नियुक्ती पत्र वाटप करण्यात आले. पंतप्रधानांनी केले संबोधन.
देशभरात नव्याने भरती झालेल्या सरकारी कर्मचाऱ्यांना एका भव्य कार्यक्रमात नियुक्ती पत्रांचे वाटप करण्यात आले. नागपूरमध्येही या ऐतिहासिक क्षणाचा भाग ठरले. जिथे केंद्रीय मंत्री नितीन गडकरी यांच्या हस्ते 149 निवडलेल्या उमेदवारांना नियुक्ती पत्र देण्यात आले. रेल्वे, टपाल, संरक्षण, आरोग्य आदी महत्त्वाच्या क्षेत्रांमधून निवड झालेल्या या उमेदवारांनी नागपूरच्या उत्तर भागातील मंगल मंडप येथे आपली स्वप्नं साकार होताना पाहिली. या संपूर्ण कार्यक्रमाचा केंद्रबिंदू ठरला तो पंतप्रधान नरेंद्र मोदी यांचा संवाद.
देशभरातील 47 शहरांमध्ये एकाच वेळी व्हिडीओ कॉन्फरन्सिंगद्वारे आयोजित करण्यात आलेल्या सोळाव्या राष्ट्रीय रोजगार मेळ्याचे उद्घाटन करताना पंतप्रधानांनी नव्याने निवड झालेल्या 51 हजारहून अधिक युवकांना शुभेच्छा दिल्या आणि देशसेवेसाठी प्रेरित केले. पंतप्रधान नरेंद्र मोदींनी आपल्या संबोधनात भारताच्या दोन सामर्थ्यांचा विशेष उल्लेख केला. जगातील सर्वात मोठी लोकशाही आणि सर्वात मोठी युवा शक्ती. या संधीचं सोनं करावं आणि देशसेवेची नवी दिशा घ्यावी, असं सांगत त्यांनी नव्या नियुक्त झालेल्या कर्मचाऱ्यांना ‘नागरिक प्रथम’ या तत्त्वज्ञानावर आधारित कार्य संस्कृती आत्मसात करण्याचे आवाहन केले.
उज्ज्वल भविष्याची प्रेरणा
सरकारी सेवा म्हणजे नोकरी नाही, तर देशसेवेचं एक माध्यम आहे. हे त्यांनी ठामपणे नमूद केलं. या मेळ्यामुळे देशभरातील अनेक मंत्रालयांमध्ये नवचैतन्य निर्माण झाले आहे. नव्या कर्मचाऱ्यांची नियुक्ती रेल्वे मंत्रालय, गृह मंत्रालय, आरोग्य व कुटुंब कल्याण मंत्रालय, कामगार व रोजगार मंत्रालय यांसारख्या महत्त्वाच्या विभागांमध्ये झाली आहे. कार्यक्रमाला उपस्थित राहून केंद्रीय मंत्री नितीन गडकरी यांनी पंतप्रधान नरेंद्र मोदी यांच्या रोजगार निर्मितीबाबत असलेल्या वचनबद्धतेची आठवण करून दिली. रोजगार मेळा हा रोजगारनिर्मितीच्या दृष्टीने एक निर्णायक पाऊल आहे, असं सांगत त्यांनी आतापर्यंत देशभरात 10 लाखांहून अधिक उमेदवारांना नियुक्तीपत्र देण्यात आल्याची माहिती दिली.
Chandrapur : सहकार क्षेत्रात काँग्रेस-भाजप यांच्यात काट्याची टक्कर
गडकरी म्हणाले की, युवकांना आर्थिकदृष्ट्या सक्षम बनवून त्यांना देशाच्या विकास प्रक्रियेत सामील करणं हे या उपक्रमाचं मुख्य उद्दिष्ट आहे. रोजगार हे केवळ उपजीविकेचं साधन नसून ते आत्मविश्वास वाढवणारं आणि राष्ट्रनिर्मितीसाठी महत्त्वपूर्ण पाऊल आहे. ही भरती ही केवळ सरकारी नोकरीच्या संधी नव्हे, तर ‘नवा भारत’ घडवण्याच्या दिशेने टाकलेलं भक्कम पाऊल आहे. रोजगार मेळ्यामुळे देशातील असंख्य कुटुंबांमध्ये आनंदाची लहर उसळली असून, नव्या पिढीला देशासाठी काम करण्याची संधी उपलब्ध झाली आहे. या उपक्रमातून केवळ नियुक्ती नव्हे, तर सरकार आणि नागरिक यांच्यातील बंध अधिक दृढ होत आहेत. रोजगाराचा हा उत्सव केवळ आकडेवारी नाही, तर देशाच्या भविष्यकाळातील उज्ज्वल चित्र रंगवणारी एक प्रेरणादायी कहाणी आहे.
