खत आणि बियाण्यांच्या कृत्रिम लिंकिंगचा खेळ थांबणार, राज्य सरकारनं घेतला कडक पवित्रा. खरीपपूर्व नियोजन बैठकीत शेतकऱ्यांच्या हितासाठी आक्रमक मंत्री आकाश फुंडकरांचा कंपन्यांना थेट इशारा.
खरीप हंगाम तोंडावर असताना शेतकऱ्यांना वेळेवर आणि योग्य दरात कृषी निविष्ठा मिळाव्यात, यासाठी अकोल्यात पार पडलेल्या जिल्हा खरीप पूर्व नियोजन बैठकीत मोठा गदारोळ पाहायला मिळाला. खास मुद्दा ठरला तो म्हणजे काही कंपन्यांकडून बियाणं आणि खतं यांचं ‘लिंकिंग’ करत शेतकऱ्यांकडून जबरदस्त दर आकारण्याचा प्रकार. या पार्श्वभूमीवर राज्याचे कामगार मंत्री आणि अकोल्याचे पालकमंत्री आकाश फुंडकर यांनी संबंधित कंपन्यांवर कठोर कारवाई करण्याचा इशारा दिला आहे.
अकोला जिल्हाधिकारी कार्यालयातील नियोजन भवनात पार पडलेल्या या बैठकीला जिल्ह्यातील आमदार, जिल्हाधिकारी, पोलीस अधीक्षक आणि वरिष्ठ प्रशासन अधिकारी उपस्थित होते. खरीप हंगामात तब्बल 10 लाख हेक्टर क्षेत्रावर पीक लागवडीचे लक्ष्य कृषी विभागाने निश्चित केले आहे. मात्र, यासाठी आवश्यक असणाऱ्या बियाणं आणि खतांचा दर्जेदार व वेळेत पुरवठा हा अजूनही मोठं आव्हानच ठरत आहे.
Nagpur : मुख्यमंत्र्यांचा स्वच्छतेचा मंत्र; भोंडेवाडीतून हरीत क्रांतीची चाहूल
निष्काळजीपणाचे पडसाद
बैठकीत लोकप्रतिनिधींनी कृषी विभागाच्या कार्यप्रणालीवर प्रखर शब्दांत टीका केली. बियाणं आणि खतांच्या उपलब्धतेवर अनेक प्रश्न उपस्थित करत अधिकाऱ्यांना चांगलंच धारेवर धरलं. काही अधिकाऱ्यांना पुरेशी माहिती नसल्यामुळे त्यांच्या निष्काळजीपणाचे पडसादही यावेळी उमटले. लोकप्रतिनिधींनी ‘लिंकिंग’चा मुद्दा आक्रमकपणे मांडत, यामागे असणाऱ्या कंपन्यांच्या संदिग्ध भूमिकेवर प्रश्नचिन्ह उपस्थित केलं.
या सर्व पार्श्वभूमीवर मंत्री आकाश फुंडकर यांनी माध्यमांशी संवाद साधताना स्पष्ट शब्दांत सांगितलं की, खतं आणि बियाण्याचं कृत्रिम लिंकिंग करून शेतकऱ्यांची लूट करणाऱ्या कंपन्यांवर सरकार कारवाई करणार आहे. शेतकऱ्यांच्या हक्काच्या निविष्ठांमध्ये कोणताही अडथळा खपवून घेतला जाणार नाही, असा सज्जड दम त्यांनी भरला.
Local Body Election : नवनीत राणांच्या घोषणेने युतीत पळसाचा फटका
राजकीय टीका झोडपली
बैठकीनंतर संवादादरम्यान मंत्री फुंडकर यांनी राजकीय घडामोडींवरही प्रतिक्रिया दिली. खासदार संजय राऊत यांच्या ‘नरकातील स्वर्ग’ या पुस्तकावर टीका करत ते म्हणाले की, मुख्यमंत्री म्हणाले होते तसं, आम्ही बाल साहित्य वाचत नाही. यावर थेट शब्दांत प्रहार करत, संजय राऊत हा वाह्यात माणूस आहे, अशी घणाघाती टीकाही त्यांनी केली.
एकंदरीत, खरीप हंगामपूर्वीच अकोल्यात वातावरण तापलं आहे. शेतकऱ्यांच्या हितासाठी सुरू असलेली ही हालचाल आगामी काळात प्रत्यक्ष कृतीत कशी उतरेल, हे पाहणं औत्सुक्याचं ठरेल. पण इतकं नक्की की, ‘लिंकिंग’ आणि लुटीच्या विरोधात राज्य सरकार आता कृतीशील भूमिकेत असल्याचं संकेत या बैठकीतून मिळाले आहेत.
