वंचित बहुजन आघाडीचे नेते प्रकाश आंबेडकर यांनी भाजप आणि आरएसएसवर थेट गंभीर आरोप केले आहेत. प्रगत शस्त्रास्त्रांवरून सत्ताधाऱ्यांना घेरत त्यांनी जनसुरक्षा कायद्यावरही जोरदार टीका केली आहे.
वंचित बहुजन आघाडीचे प्रमुख ॲड. प्रकाश आंबेडकर यांनी पुन्हा एकदा केंद्रातील सत्ताधाऱ्यांवर जोरदार हल्लाबोल केला आहे. राष्ट्रीय स्वयंसेवक संघ (आरएसएस) आणि भारतीय जनता पक्ष (भाजप) यांच्यावर त्यांनी थेट गंभीर आरोप करत केंद्र सरकारला अडचणीत आणले आहे. भारतातील सुरक्षा व्यवस्थेनुसार केवळ लष्कर आणि पोलिसांनाच प्रगत शस्त्रास्त्र बाळगण्याची परवानगी असताना, आरएसएस आणि भाजपकडे एके-47, टॉमी गन, रॉकेट लाँचर आणि अन्य घातक शस्त्रास्त्रांचा परवाना कसा मिळाला, याबाबत आंबेडकरांनी थेट मुद्दा उपस्थित केला आहे.
प्रकाश आंबेडकर यांच्या या ठाम भूमिकेमुळे राजकीय वर्तुळात मोठी खळबळ निर्माण झाली आहे. त्यांनी केलेल्या या जाहीर वक्तव्यानंतर देशाच्या संरक्षण आणि कायद्याच्या अंमलबजावणीच्या प्रक्रियेवरच अनेक प्रश्न निर्माण झाले आहेत. त्यांनी स्पष्टपणे नमूद केले की, देशाच्या कायद्यानुसार केवळ अधिकृत यंत्रणाच अशा शस्त्रांचा वापर करू शकतात. मात्र, काही खासगी संघटनांकडे अशा अत्याधुनिक शस्त्रास्त्रांची मिरवणूक सुरू आहे, याकडे त्यांनी लक्ष वेधले.
Bachchu Kadu : सत्तेच्या अन्यायावर सातबारा कोरा आंदोलनाचा घणाघात
दडपशाहीचा आरोप
प्रकाश आंबेडकर यांनी जनसुरक्षा कायद्यावरही थेट टीकास्त्र सोडले आहे. त्यांनी या कायद्याला ‘अघोषित आणीबाणी’ असे संबोधले आहे. त्यांच्या मते, या कायद्याच्या माध्यमातून सामान्य नागरिकांवर आणि कार्यकर्त्यांवर अन्यायकारक कारवाई होत आहे. ही लोकशाहीच्या विरोधात जाणारी प्रक्रिया आहे. अशा परिस्थितीत देशाच्या सर्वोच्च पदांवर असणाऱ्या नेत्यांकडून प्रगत शस्त्रांची पूजा होणे आणि त्याचा प्रचार केला जाणे हे अत्यंत धक्कादायक असल्याचे त्यांनी सांगितले. मोहन भागवत आणि नरेंद्र मोदी यांच्या काही प्रसंगी घेतलेल्या शस्त्रपूजेचे संदर्भ देत आंबेडकर यांनी सत्ताधाऱ्यांचा दुहेरी दृष्टिकोन उघड केला आहे. त्यांनी या मुद्द्यांवरून सरकारला थेट लक्ष्य केले आहे. या संदर्भातील अनेक छायाचित्रे आणि माहिती समाजमाध्यमांवर व्हायरल झाली आहे.
भारताच्या शस्त्रास्त्र कायद्यानुसार, अत्याधुनिक आणि धोकादायक शस्त्रांचा वापर अत्यंत नियंत्रित आणि विशिष्ट अधिकृत संस्थांकडूनच केला जातो. सामान्य नागरिकांना किंवा कोणत्याही खासगी संस्थेला अशा शस्त्रांचा परवाना देण्याची परवानगी नसते. मात्र काही संघटनांमध्ये अशा शस्त्रांचा मोकळा वापर सुरू असल्याची उदाहरणे समोर आल्याने लोकशाही व्यवस्थेच्या स्थैर्यावरच प्रश्न निर्माण झाले आहेत. या प्रकारामुळे समाजात भीतीचे आणि अस्वस्थतेचे वातावरण निर्माण होत आहे. सामान्य जनतेमध्ये असंतोष वाढत आहे. प्रगत शस्त्रांवरून होत असलेली खुली मिरवणूक आणि तिचा राजकीय वापर हा लोकशाहीतील संतुलन बिघडवणारा प्रकार ठरत असल्याचे वंचित बहुजन आघाडीचे म्हणणे आहे. या आरोपामुळे प्रशासन, पोलिस आणि संरक्षण यंत्रणा यांच्यावरही संशयाचे ढग निर्माण झाले आहेत.
Sambhaji Brigade : प्रवीण गायकवाड हल्ल्यावर शिवभक्तांचे आक्रमक प्रत्युत्तर
असंतोषाचा सूर
प्रकाश आंबेडकर यांच्या या प्रखर भूमिकेला दलित, आदिवासी आणि मागास घटकांमध्ये मोठा प्रतिसाद मिळत आहे. वंचित बहुजन आघाडीने यापूर्वीही सरकारच्या एकतर्फी धोरणांवर सातत्याने आवाज उठवला आहे. शस्त्रास्त्रांबाबत उठवलेला हा मुद्दा आता सामान्य जनतेच्या मनात रोष निर्माण करत आहे. सरकारच्या भूमिकेवर साशंकता वाढली आहे. या मुद्द्यांमुळे जनसामान्यात मोठी चर्चा सुरू झाली आहे. या प्रकरणात सरकारची भूमिका काय राहणार याकडे लक्ष लागले आहे. अनेक नागरिक आणि राजकीय विश्लेषक या विषयाकडे गंभीरतेने पाहत असून, येत्या काळात राजकीय समीकरणे बदलण्याची शक्यता वाढली आहे.
