नागपूर जिल्हा परिषद निवडणुकीच्या तयारीला वेग आला असून यंदा मोठे बदल घडले आहेत. नव्या परिसीमनामुळे सर्कलच्या नकाशात मोठी फेरफार झाली असून 57 जागांवर मतदान होणार आहे.
आगामी जिल्हा परिषद निवडणुकीच्या पार्श्वभूमीवर नागपूर जिल्ह्यात मोठ्या प्रमाणावर राजकीय उलथापालथ पाहायला मिळणार आहे. राज्य निवडणूक आयोगाने नुकतीच नवीन मतदार यादी प्रसिद्ध केली असून जिल्ह्यातील निवडणुकीच्या सर्कलचे पुनर्रचना करण्यात आली आहे. या नव्या फेरफारानुसार एकूण 57 जागांवर मतदान होणार आहे. अनेक पारंपरिक सर्कल संपुष्टात आले आहेत, तर काही नवीन सर्कलची भर पडली आहे. या बदलामुळे नागपूर जिल्ह्यातील राजकीय गोटात कमालीची खळबळ उडाली आहे.
जिल्हा परिषदेत सत्तेचा चेहरा बदलण्याच्या दृष्टीने या नव्या रचनेला निर्णायक क्षण मानले जात आहे. तीन जुन्या सर्कल रद्द करून दोन नवीन सर्कल जोडण्यात आले आहेत. परिणामी अनेक वरिष्ठ आणि प्रभावी नेत्यांची राजकीय गणिते पूर्णपणे बदलणार आहेत. विशेषतः ग्रामीण भागातील सत्ता समीकरणांवर या बदलाचा मोठा परिणाम होणार आहे. सत्तेच्या बालेकिल्ल्यात नवा संघर्ष रंगणार आहे.
सर्कल रचना बदलली
नवीन फेरफारानुसार जिल्ह्यातील सर्कलची संख्या 13 वरून थेट 12 वर आली आहे. या निर्णयानुसार रवानी, हिंगणा आणि बेलतरोडी हे तीन सर्कल रद्द करण्यात आले आहेत. त्याऐवजी कलमेश्वर-मौदा हा नवीन संयुक्त सर्कल तयार करण्यात आला आहे. या नव्या रचनेमुळे संपूर्ण जिल्ह्यात नवीन सत्तेचा नकाशा आखला जात आहे. अनेक भागांमध्ये नवीन सर्कलमुळे विकासाच्या योजनांचे वितरणही नव्या स्वरूपात होणार आहे.
जिल्ह्यातील राजकीय दृष्टीने महत्वाच्या समजल्या जाणाऱ्या हिंगणा आणि नागपूर ग्रामीण भागांमध्ये मोठ्या प्रमाणावर उलथापालथ होणार आहे. या दोन्ही भागांमध्ये अनेक नेत्यांची पारंपरिक सत्ता उधळून लावली गेली आहे. नव्या सर्कलमध्ये या नेत्यांना नव्याने आपली भूमिका स्पष्ट करावी लागणार आहे. परिणामी अनेकांचे राजकीय भवितव्य धोक्यात आले असून नव्या लढाईसाठी तयारी सुरू झाली आहे.
Parinay Fuke : अंधारमय महाज्योतीच्या भविष्याला आमदारांनी दिला आशेचा किरण
तालुक्यांमध्ये मोठा फेरफार
रामटेक, पारशिवनी, नरखेड आणि कटोल या चार तालुक्यांमध्ये मोठ्या प्रमाणावर बदल घडून आले आहेत. या तालुक्यांमधील काही भागांचे विलिनीकरण नव्या सर्कलमध्ये करण्यात आले आहे. परिणामी स्थानिक स्वराज्य संस्थांपासून ते जिल्हा परिषदेसाठी होणाऱ्या निवडणुकीपर्यंत साऱ्या राजकीय समीकरणांमध्ये नवे रंग दिसू लागले आहेत. या नव्या रचनेमुळे काही नेत्यांचे पारंपरिक बालेकिल्ले मोडीत काढले गेले आहेत. स्थानिक पातळीवर असलेले सत्तेचे संतुलन पूर्णपणे ढासळले आहे.
यामुळे ग्रामपंचायत निवडणुकीपासून जिल्हा परिषद निवडणुकीपर्यंत साऱ्या राजकीय घडामोडींवर या फेररचनेचा थेट परिणाम होणार आहे. अनेक क्षेत्रांमध्ये नव्या नेतृत्वाचा उदय होण्याची शक्यता आहे. जुन्या मतदारसंघांचे अस्तित्व संपुष्टात आल्यामुळे नव्या मतदारवर्गाशी संबंध प्रस्थापित करण्याचे आव्हान आता नेत्यांसमोर उभे ठाकले आहे.
