उत्सवांच्या पार्श्वभूमीवर नागपूर शहर पोलिसांनी धडक मोहिम हाती घेतली आहे. या मोहिमेचा भाग म्हणून उपायुक्त रश्मिता राव यांनी तीन कुख्यातांना तडीपार केलं आहे.
नागपूर शहर पोलिस दलात सध्या डॅशिंग अधिकाऱ्यांचा बोलबाला आहे. बरेच उपायुक्त धडक कारवाई करीत असल्यानं नागपूर शहर पुन्हा एकदा चर्चेत आलं आहे. परंतु यंदा नागपूर पोलिसांबाबत बहुतांश प्रमाणात सकारात्मक चर्चा होत आहे. आयपीएस अधिकारी असलेल्या रश्मिता राव आणि उपायुक्त महक स्वामी या लेडी सिंघम स्टाइलने काम करीत आहेत. एस. ऋषीकेश रेड्डी, नित्यानंद झा, राहुल मदने, निकेतन कदम आणि वाहतूक शाखेचे उपायुक्त लोहित मतानी यांनी ‘फिल्ड’वर उतरून काम करणं सुरू केलं आहे.
उपायुक्त डॉ. अश्विनी पाटील, विशेष शाखेचे उपायुक्त शशिकांत सातव, गुन्हे शाखेचे राहुल माकणीकर कधी पडद्यामागून तर कधी फ्रंटफूटवर येत गुन्हेगारांवर वचक बसवित आहेत. त्यामुळं सध्या नागपूर पोलिस दलाबाबत संपूर्ण राज्यात सकारात्मकपणं चर्चा आहे. गेल्या काही दिवसांपासून नागपूर पोलिसांचे ड्रग्समुक्त नागपूर अभियान चर्चेत होते. वाहतूक शाखेने ऑपरेशन यु-टर्न राबविणे सुरू केले आहे. शहरात सुसाट पळणाऱ्या खासगी ट्रॅव्हल्स बसही जप्त करणे त्यांनी सुरू केलं आहे. ‘क्राइम फ्री नागपूर’चा एक भाग म्हणून उपायुक्त रश्मिता राव यांनी तीन गुन्हेगारांवर कारवाईचा बॉम्ब टाकला आहे.
गुंड झालेत थंड
उपायुक्त रश्मिता राव यांच्या कार्यक्षेत्रात येणाऱ्या पोलिस स्टेशनमध्ये सध्या गुन्हेगारांवर कारवाईचा धडाका सुरू आहे. राव यांची एकूणच टीम सकारात्मकपणे काम करीत आहे. अजनी, नंदनवन, बेलतरोडी पोलिस खऱ्या अर्थाने डोळ्यात तेल घालत दिवसरात्र काम करीत आहे. कधीकधी तर कमी मनुष्यबळात चांगली कामगिरी राव यांच्या टीमने करून दाखविली आहे. सहाय्यक पोलिस आयुक्त नरेंद्र हिवरे, बेलतरोडीचे वरिष्ठ पोलिस निरीक्षक मुकुंद कवाडे, अजनीचे निरीक्षक नितीनचंद्र एस. राजकुमार, हुडकेश्वरचे ज्ञानेश्वर भेंडोकार, नंदनवनचे विनायक कोळी यांची भक्कम साथ राव यांना मिळत आहे.
Gadchiroli : पावसाच्या निसर्ग क्रांतीत हेलिकॉप्टरने दिले आशेचे पंख
अतिरिक्त पोलिस आयुक्त राजेंद्र दाभाडे, सहपोलिस आयुक्त एस. नवीनचंद्र रेड्डी आणि पोलिस आयुक्त डॉ. रवींद्र सिंगल यांनी दाखविलेला विश्वास राव यांची टीम सार्थ ठरवित आहे. त्यातूनच आता तीन कुख्यात गुन्हेगारांना तडीपार करण्यात आले आहे. अरमान उर्फ इमराव मलिक रऊफ खान मलिक (वय 32), सुमित ऊर्फ भोला रमेश वाघमारे (वय 27), रितेश भीमराव गवई (वय 36) ही तडीपार करण्यात आलेल्या तिघांची नावे आहेत. अरमान हा नंदनवन पोलिस ठाण्याच्या हद्दीतील रहीवासी आहे. त्याच्या विरोधात खंडणीसह अनेक गंभीर स्वरुपाचे गुन्हे दाखल आहेत. पोलिसांनी त्याला एक वर्षासाठी तडीपार केलं आहे.
नंदनवन पोलिस ठाण्याच्या हद्दीतील सुमितही कुख्यात आहे. त्याच्या विरोधात जबरी चोरीसह पाच गंभीर गुन्ह्यांची नोंद आहे. त्याना दोन वर्षांसाठी तडीपार करण्यात आलं आहे. अजनी पोलिस ठाण्याच्या हद्दीत रितेश याच्या विरोधात अनेक गुन्ह्यांची नोंद आहे. एकूण नऊ गुन्हे दाखल असलेला रितेश हा कुख्यात आहे. त्यालाही दोन वर्षांसाठी तडीपार करण्यात आलं आहे. आयपीएस अधिकारी रश्मिता राव यांनी एका वर्षात 10 कुख्यातांविरोधात कारवाई केली आहे. त्यातील काही जणांना हद्दपारही करण्यात आलं आहे. जुलै 2024 मधील गुन्ह्यांच्या तुलनेत यंदा त्यांच्या कार्यक्षेत्रातील पोलिस ठाण्यांच्या हद्दीत 12 गंभीर गुन्ह्यांमध्ये घट झाली आहे. मालमत्तेबाबतचे 194 गुन्हे कमी झाले आहेत. इतकेच नव्हे तर सर्व पोलिस ठाण्यामध्ये गुन्हेगारांचा छडा लावण्याचा वेगही वाढला आहे.
