महाराष्ट्राच्या राजकीय वर्तुळात स्थानिक स्वराज्य संस्थेच्या निवडणुकीची तयारी जोरात सुरु आहे. मात्र महायुतीतील मित्र पक्षांमध्ये अंतर्गत कलहाची चिन्हे स्पष्ट दिसत आहे.
महाराष्ट्राच्या राजकीय पटलावर सध्या एकच चर्चा आहे. स्थानिक स्वराज्य संस्थांच्या निवडणुकीची. महायुती असो की महाविकास आघाडी, सर्व पक्ष आपापल्या तलवारी घासत आहेत. प्रभाग रचना आणि आरक्षण सोडत जाहीर झाल्याने आता सर्वांचे डोळे निवडणुकीच्या तारखांकडे लागले आहेत. पण या रणांगणात अडथळ्यांची कमतरता नाही. पक्षांतर्गत कलह, मतभेद आणि बंडखोरीच्या आगीत अनेक पक्ष आणि नेते होरपळत आहेत. विदर्भातील अकोला जिल्हा तर यात आघाडीवर आहे. इथे राजकारण इतके तापले आहे की, जिल्ह्याला ‘बंडोबांचा जिल्हा’ म्हणून ओळखले जाऊ लागले आहे. प्रत्येक पक्षात बंडाचे झेंडे फडकत आहेत. त्यामुळे उमेदवारांसमोर मतविभाजनाची मोठी डोकेदुखी उभी राहिली आहे. या बंडखोरीच्या नाट्यात पक्ष नेतृत्वाला नेत्यांची मनधरणी करावी लागत आहे. नाहीतर दिवाळीच्या फटाक्यांसारखे राजकीय समीकरणे उडून जातील.
अकोला जिल्ह्यात भाजप, एकनाथ शिंदे यांची शिवसेना आणि काँग्रेस हे प्रमुख पक्ष सक्रिय आहेत. पण तिन्ही पक्षांत कुठे ना कुठे अंतर्गत भांडणे सुरू आहेत. भाजपमध्ये तर काही नेते आणि कार्यकर्ते हवेतच उडत आहेत. अकोल्यातील भाजप नेते स्वतःला राजे समजत फिरतात. आम्ही पक्षाच्या माजी प्रदेशाध्यक्षांना आणि मुख्यमंत्र्यांना खिशात घेऊन फिरतो, अशी थेट आवाजे उमटत आहेत. पैशाच्या जोरावर नेत्यांना पायाशी लोळवतो, अशी हवाबाजी चालू आहे. जिल्ह्यात भाजपचे दोन प्रमुख नेते आणि त्यांचे चट्टेबट्टे हे बोल नेहमी बोलत असतात.गेल्या विधानसभा निवडणुकीत अकोला पश्चिम मतदारसंघात भाजपला चुकीच्या उमेदवारामुळे मोठा धक्का बसला. पक्षाने स्वतःच्याच पायावर कुरहाड मारली, असा आरोप कार्यकर्त्यांकडून होत आहे. तरीही पक्ष अजून शहाणा झालेला दिसत नाही.
Harshwardhan Sapkal : ईआयसीच्या इतिहासाची पुनरावृत्ती नव्या स्वरूपात
पश्चिम मतदारसंघ संघर्ष
आताही स्थानिक नेते हवाबाजी करत फिरत आहेत. जर हे असेच सुरू राहिले, तर येत्या स्थानिक निवडणुकीत भाजपला मोठा फटका बसणार आहे. हा अपयश पचवणे त्यांना जड जाईल. अकोला महानगरपालिकेची निवडणूक जवळ आली आहे. भाजपमध्ये काही नेत्यांबद्दल प्रचंड असंतोष आहे. हा असंतोष पक्षाच्या पराभवासाठी कारणीभूत ठरू शकतो. गेल्या अकोला पश्चिम विधानसभेत याची प्रचिती आलीच आहे. शिवसेनेची गोष्टही कमी मसालेदार नाही. एकनाथ शिंदे यांच्या गटात बंडखोरीचे वारंवार दर्शन घडते. एकाच पक्षात कार्यकर्ते बंड पुकारतात. त्यामुळे स्थानिक निवडणुकीत शिवसेनेला मोठा धक्का बसू शकतो. राज्यात स्थानिक निवडणुकीची तयारी जोरात सुरू आहे. शिंदे गटही कंबर कसून तयारीला लागला आहे. पण अकोल्यात राजकीय वातावरण पाहता, शिंदे गटात प्रचंड मतभेद आहेत.
माजी आमदार गोपीकिशन बाजोरिया हे शिवसेनेचे संपर्कप्रमुख आहेत. पण ते स्थानिक नेत्यांना विश्वासात घेत नाहीत. परस्पर निर्णय घेतात, असा आरोप नेहमी होत असतो. ज्यामुळे पक्षात असंतोष वाढला आहे. मध्यंतरी बाजोरियांचा पुतळा जाळण्यापर्यंत मजल गेली होती. हा विरोध इतका तीव्र होता की, प्रकरण थेट वरिष्ठ पातळीवर पक्षप्रमुख तथा उपमुख्यमंत्री एकनाथ शिंदे आणि डॉ. श्रीकांत शिंदे यांच्यापर्यंत पोहोचले. अकोल्याची शिवसेना विखुरली आहे, एकीकरण अशक्य आहे, अशी चर्चा होती. पण शिंदे पितापुत्रांनी ‘औषधाची मात्रा’ देऊन प्रकरण शांत केले. आता पदाधिकाऱ्यांमध्ये बदल दिसत आहेत. बाजोरिया व विरोधी गट एकत्र आल्यासारखे वाटते. तरीही हे एकीकरण कितपत टिकेल, हे पाहणे रंजक ठरेल. अकोला पश्चिम मतदारसंघात तर बंडखोरीचा कहर आहे. इथे सर्व पक्षांत इच्छुकांची गर्दी होती.
पक्षप्रमुखांची जबाबदारी
उमेदवार जाहीर झाल्यावर नाराजी पसरली. अनेकांनी अपक्ष किंवा इतर पक्षातून अर्ज भरले. भाजपचे डॉ. अशोक ओळंबे प्रहार जनशक्तीकडून, माजी नगराध्यक्ष हरीश अलिमचंदानी अपक्ष, काँग्रेसचे डॉ. झिशान हुसेन वंचितकडून रिंगणात उतरले. भाजपचे संजय बडोणे, काँग्रेसचे माजी महापौर मदन भरगड, शिवसेना ठाकरे गटाचे राजेश मिश्रा आणि प्रकाश डवले अपक्ष म्हणून दंड थोपटले. अकोला पूर्वात काँग्रेसचे डॉ. सुभाष कोरपे अपक्ष झाले. काँग्रेसमध्येही अंतर्गत कलह कमी नाही. पक्षात मतभेद सुरू आहेत. अकोला जिल्ह्यातील हे बंडोबांचे वातावरण जर वेळीच थंड झाले नाही, तर भाजप आणि शिवसेनेला स्थानिक निवडणुकीत मोठा फटका बसणार आहे. पक्षप्रमुखांना याकडे तातडीने लक्ष द्यावे लागेल. शिंदे गटाने असंतोष शांत करण्यात काही प्रमाणात यश मिळवले आहे, पण भाजपने अजूनही ‘धडा’ घेतलेला दिसत नाही. या निवडणुकीत मतदार काय फैसला देतात, हे पाहणे उत्सुकतेचे आहे.
