नगर परिषदेच्या आरक्षण सोडतीनंतर राजकीय वर्तुळात खळबळ उडाली आहे. यंदाच्या निवडणुकीत महिलांना विशेष प्राधान्य आहे. अनेक पुरुष नेत्यांच्या स्वप्नांचा भंग.
राज्यातील स्थानिक स्वराज्य संस्थांच्या निवडणुकीचा धुमधडाका सुरू झाला आहे. पक्षांच्या गोटात चुरस वाढली, प्रभाग रचना झाली आणि आरक्षण सोडतही जाहीर झाली. या सोडतीने अनेकांना धक्का बसला, तर काहींना आनंदाची लहर आली. विशेषतः महिलांमध्ये उत्साह संचारला आहे. कारण अनेक जागा महिलांसाठी राखीव ठेवण्यात आल्या आहेत. पुरुषांच्या नगराध्यक्ष होण्याच्या स्वप्नांना यामुळे ब्रेक लागला आहे. सुप्रीम कोर्टाच्या आदेशानंतर निवडणूक आयोग आणि राजकीय पक्षांनी जोरदार तयारी सुरू केली आहे. दिवाळीनंतर ही निवडणूक होण्याची शक्यता आहे. अकोट नगरपरिषदेतही महिला शक्तीचा बोलबाला असणार आहे. अकोट नगरपरिषदेच्या 17 प्रभागांसाठी आरक्षण सोडत जाहीर झाली आहे. या सोडतीने महिलांना प्राधान्य देण्यात आले आहे. ज्यामुळे राजकीय मैदानात नव्या चेहऱ्यांची भर पडणार आहे.
प्रभाग क्रमांक 1 अ मध्ये सर्वसाधारण महिला, तर ब मध्ये सर्वसाधारण जागा आहे. प्रभाग 2 अ मध्ये नागरिकांचा मागासवर्ग (OBC) आणि ब मध्ये सर्वसाधारण. प्रभाग 3 अ सर्वसाधारण महिला, ब सर्वसाधारण. प्रभाग 4 अ अनुसूचित जाती (SC), ब सर्वसाधारण महिला. प्रभाग 5 अ ओबीसी, ब सर्वसाधारण महिला. प्रभाग 6 अ अनुसूचित जमाती (ST), ब सर्वसाधारण महिला. प्रभाग 7 अ ओबीसी, ब सर्वसाधारण महिला, क सर्वसाधारण महिला. प्रभाग 8 अ ओबीसी महिला, ब सर्वसाधारण. प्रभाग 9 अ SC, ब सर्वसाधारण महिला. प्रभाग 10 अ ओबीसी, ब सर्वसाधारण महिला. प्रभाग 11 अ ओबीसी महिला, ब सर्वसाधारण. प्रभाग 12 अ ओबीसी महिला, ब सर्वसाधारण. प्रभाग 13 अ सर्वसाधारण महिला, ब सर्वसाधारण. प्रभाग 14 अ ओबीसी महिला, ब सर्वसाधारण.
महायुतीची तयारी
प्रभाग 15 अ एससी महिला, ब सर्वसाधारण. प्रभाग 16 अ एससी महिला, ब सर्वसाधारण महिला. प्रभाग 17 अ ओबीसी महिला, ब सर्वसाधारण, अश्या जागा आहेत. थोडक्यात पाहता अनुसूचित जातींसाठी प्रभाग 4,9,15 आणि 16 आरक्षित आहेत. त्यापैकी 15 आणि 16 महिलांसाठी आहेत. अनुसूचित जमातीसाठी प्रभाग 6 राखीव असून, तोही महिलांसाठी आहे. ओबीसीसाठी आरक्षित प्रभाग 2,5,7,8,10,11, 12,14 आणि 17 आहेत. त्यातील 8,11,12,14 आणि 17 महिलांसाठी आहे. या निवडणुकीमुळे अकोटचे राजकीय वातावरण तापले आहे. गेल्या अनेक वर्षांपासून रखडलेली निवडणूक आता मार्गी लागली आहे. प्रत्येकाला उमेदवारी हवी आहे. महायुती आणि महाविकास आघाडी यांच्यात अटीतटीची लढत अपेक्षित आहे. महायुती सरकारने विकासकामांना वेग दिला आहे, तर महाविकास आघाडी अंतर्गत कलहात अडकली आहे. यामुळे आघाडीला जोरदार तयारी करावी लागणार आहे.
महिलांच्या आरक्षणामुळे नव्या नेतृत्वाची उमेदवारी पुढे येऊ शकते. अकोटमध्ये महिला उमेदवारांच्या वाढत्या संख्येमुळे राजकारणात नवे रंग भरले जाणार आहेत. पुरुष नेत्यांच्या स्वप्नांना धक्का बसला असला तरी, हे बदल महिलांच्या सक्षमीकरणासाठी महत्त्वाचे आहेत. आरक्षण सोडतीने अनेक महिलांना प्रेरणा दिली आहे. त्या आता निवडणुकीच्या मैदानात उतरण्यासाठी सज्ज आहेत. पक्षांच्या रणनीतीतही महिलांना प्राधान्य देण्यात येत आहे. ज्यामुळे निवडणुकीचे चित्र बदलू शकते.दिवाळीनंतरच्या निवडणुकीत अकोट नगरपरिषदेवर ‘वुमन पावर’चा प्रभाव दिसणार आहे. आरक्षणामुळे महिलांना मिळालेली ही संधी केवळ जागा जिंकण्यापुरती नाही, तर स्थानिक विकासात त्यांचा सहभाग वाढवणारी आहे.
