भाजप मंत्री राधाकृष्ण विखे पाटील यांनी उपमुख्यमंत्री अजित पवारांवर इथेनॉल धोरण आणि बॅनरबाबत टीका केली. राष्ट्रवादी आमदार अमोल मिटकरी यांनी त्यावर पलटवार केला.
राजकारण म्हणजे फक्त सत्ता मिळवणे नाही, तर ती टिकवण्यासाठी होणारा अंतर्गत संघर्षही असतो. महाराष्ट्राच्या सत्तेत सध्या महायुती सरकार विराजमान असली तरी, आतल्या गोटात शीतयुद्ध पेटलेले दिसतंय. राजकारणात बेधडक आणि वादग्रस्त वक्तव्य करणारे नेते कमी नाहीत, पण सत्ताधाऱ्यांमध्ये हे प्रकार अधिकच वाढलेले दिसतात. मंत्री माणिकराव कोकाटे, संजय गायकवाड, संजय शिरसाट यांच्या नंतर आता ज्येष्ठ नेते राधाकृष्ण विखे पाटील यांनीही बेधडक वक्तव्यांच्या यादीत स्वतःचे नाव कोरले आहे.
भाजप आणि राष्ट्रवादी काँग्रेस अजित पवार गट हे महायुतीचे घटक पक्ष असले तरी, त्यांच्या नेत्यांमध्ये कधी निधीवाटप, कधी श्रेयवाद, तर कधी व्यक्तिगत मतभेदांवरून शब्द युद्ध पेटते. यावेळी मात्र मुद्दा थेट उपमुख्यमंत्री अजित पवार यांच्यावरच्या टीकेचा आहे. ज्येष्ठ मंत्री राधाकृष्ण विखे पाटील यांनी धाराशिव दौऱ्यावरून अजित पवारांवर चांगलाच हल्ला चढवला, ‘जनाची नाही, मनाची तरी ठेवा’ असं सांगत त्यांनी अजित पवारांना इथेनॉल धोरण आणि कारखान्यांच्या बॅनर बाबत टोमणा लगावला. विखे पाटलांच्या वक्तव्याचा परिणाम लवकरच जाणवला.
Vijay Wadettiwar : सत्ता चोरली, मतं चोरली, पण आवाज कसा चोरणार?
सत्तासंघर्षाची नवी शक्यता
राष्ट्रवादी काँग्रेसचे आमदार अमोल मिटकरी यांनी तुफान पलटवार करत म्हटलं भाजपचे वरिष्ठ नेते आपली दखल घेतीलच, पण उगाच खेटे घेऊ नका राधेकृष्ण. विखे पाटील. मिटकरींनी स्मरण करून दिले की, अजित पवारांवर टीका करताना महायुतीतील घटकपक्षाचा सन्मान राखणे गरजेचे आहे. बाकी विखे पाटीलजी, आपल्या कार्यकर्तृत्त्वाची महती मंत्रालयात जोरदार रंगली आहे बरं का, असा बोचरा टोमणाही त्यांनी मारला. यावरच न थांबता मिटकरींनी थेट मुख्यमंत्री देवेंद्र फडणवीसांकडे तक्रारही दाखल केली.
आपण दिलेल्या सूचनेनंतरही विखे पाटील यांनी सर्व मर्यादा ओलांडल्या आहेत. आता महाराष्ट्र वाट पाहतोय, आपण त्यांच्यावर काय कारवाई करणार? असा थेट सवाल करत त्यांनी वातावरण अजून तापवले. या संपूर्ण घडामोडीत एक गोष्ट स्पष्ट झाली, महायुतीत एकता ही फक्त बाह्य प्रदर्शनापुरती मर्यादित आहे का, हा प्रश्न पुन्हा एकदा डोकं वर काढतोय. अजित पवार हे महायुतीत असूनही, भाजपच्या मंत्र्यांकडून त्यांच्यावर अशा उघडपणे टीका होणे, हे निंदनीय आहे. विखे पाटलांनी जरी अजित पवारांना इथेनॉल धोरणाच्या संदर्भात टोला लगावला, तरी त्यांचे शब्द फक्त टोले नसून, सत्तासंघर्षाच्या भविष्यातील शक्यता सूचित करणारे आहेत. महायुतीची राजकीय गणितं अशीच राहिली, तर महापालिका निवडणुकीची तयारी करत असतानाच आतल्या गोटातील भिंती उंचावण्याची शक्यता नाकारता येत नाही.
Police Recruitment : महाराष्ट्राला मिळणार लवकरच नवीन सुरक्षा कवच
