अमरावती ग्रामीण भागात खोट्या पोलिसांची टोळी नागरिकांना भीतीदायक खेळ करून त्रस्त करत होती. पोलिस अधीक्षक विशाल आनंद यांच्या नेतृत्वाखाली स्थानिक गुन्हे शाखेने यशस्वी कारवाई करून टोळी जेरबंद केली आणि लुटलेल्या सोन्याचे दागदागिने जप्त केले.
अमरावती ग्रामीण भागात गेल्या काही दिवसांपासून एका कुख्यात टोळीने दहशत निर्माण केली होती. स्वतःला पोलिस असल्याचे भासवून, रस्त्यावर गंभीर गुन्हे घडल्याची खोटी माहिती देऊन ही टोळी नागरिकांना, विशेषतः ज्येष्ठांना, लक्ष्य करत होती. त्यांचे मौल्यवान दागदागिने हातचलाखीने लुटण्याच्या या घटनांनी परिसरात भीतीचे वातावरण पसरले होते. मात्र, पोलिस अधीक्षक विशाल आनंद यांच्या नेतृत्वाखाली स्थानिक गुन्हे शाखेने या टोळीला अटक करण्यासाठी अथक परिश्रम घेतले. एका यशस्वी कारवाईत या गुन्हेगारांना जेरबंद केले. या कारवाईमुळे नागरिकांना मोठा दिलासा मिळाला आहे. पोलिसांच्या सतर्कतेचे कौतुक होत आहे.
टोळीने अमरावती ग्रामीण भागातील तळेगांव, वरूड, मोर्शी, तिवसा आणि परतवाडा या पोलिस ठाण्यांच्या हद्दीत अनेक गुन्हे केले. ५ सप्टेंबरला तळेगांव पोलिस ठाण्याच्या हद्दीत अरुण लक्षण गोरे यांना लक्ष्य करत दोन अज्ञात व्यक्तींनी बुलेटवर येऊन स्वतःला पोलिस असल्याचे सांगितले. रस्त्यावर खून झाल्याची खोटी माहिती देऊन त्यांनी गोरे यांच्या पत्नीचे 74 ग्रॅम सोन्याचे दागदागिने लुटले. त्याच दिवशी वरूड येथेही असाच गुन्हा घडला. या घटनांची गंभीर दखल घेत पोलिस अधीक्षक विशाल आनंद यांनी स्थानिक गुन्हे शाखेला तातडीने कारवाईचे आदेश दिले. त्यांच्या दृढनिश्चयाने पोलिसांना तपासाला गती मिळाली.
Parinay Fuke : एकाला न्याय देताना दुसऱ्यावर अन्याय होऊ देणार नाही
गोपनीय माहितीचा वापर
स्थानिक गुन्हे शाखेने सीसीटीव्ही फुटेज, फिर्यादींच्या माहिती आणि गोपनीय खबऱ्यांच्या जाळ्याच्या आधारे तपासाला सुरुवात केली. या तपासातून बीड जिल्ह्यातील परळी येथील सराईत गुन्हेगार इराणी जहीर अब्बास ऊर्फ मोटा आणि त्याच्या साथीदारांनी हे गुन्हे केल्याचे स्पष्ट झाले. १९ सप्टेंबरला रात्री उशिरा मिळालेल्या गुप्त माहितीच्या आधारे पोलिसांनी देवगांव चौकात नाकाबंदी केली. यावेळी पांढऱ्या रंगाच्या बिना क्रमांकाच्या एसयूव्ही वाहनातून प्रवास करणाऱ्या चार आरोपींना ताब्यात घेण्यात आले. यामध्ये इराणी जहीर अब्बास ऊर्फ मोटा (वय 40), लाला ऊर्फ गांधी समीर शेख (वय 48), वसीम शब्बीर इराणी (वय 25) आणि नझीर हुसेन अजीज अली (वय 52) यांचा समावेश आहे.
Vijay Wadettiwar : ओबीसींच्या हक्कांसाठी पूर्व विदर्भातून भडकली मशाल
कारवाईत पोलिसांनी तळेगांव येथील गुन्ह्यात लुटलेले 77.5 ग्रॅम सोन्याचे दागदागिने, वरूड येथील गुन्ह्यातील 50 ग्रॅम सोन्याची साखळी आणि अंगठी, तसेच एक चारचाकी वाहन, खोटी पोलिस ओळखपत्रे आणि बनावट क्राइम प्रेस रिपोर्टर ओळखपत्रे जप्त केली. आरोपींनी अमरावती ग्रामीण भागातील 9 गुन्ह्यांची कबुली दिली, ज्यात वरूड (3), मोर्शी (2), तिवसा (1), परतवाडा (1) आणि तळेगांव (३) येथील गुन्ह्यांचा समावेश आहे. याशिवाय, त्यांनी महाराष्ट्रातील इतर जिल्ह्यांमध्ये आणि तेलंगणा, छत्तीसगड, उत्तर प्रदेश, बिहार यासह इतर राज्यांमध्ये 25 गुन्हे केल्याची माहिती दिली. या टोळीवर आणखी काही गुन्ह्यांमध्ये संशय असून, त्याबाबत तपास सुरू आहे.
पोलिस अधीक्षक विशाल आनंद यांच्या मार्गदर्शनाखाली स्थानिक गुन्हे शाखेच्या पोलिस निरीक्षक किरण वानखडे आणि त्यांच्या पथकाने ही यशस्वी कारवाई केली. या पथकात पोलिस उपनिरीक्षक सागर हटवार, मुलचंद भांबुरकर यांच्यासह अनेक कर्मचारी सामील होते. विशाल आनंद यांनी नागरिकांना सावधानतेचा इशारा देताना म्हटले की, कोणताही पोलिस कर्मचारी नागरिकांना त्यांचे दागदागिने किंवा मौल्यवान वस्तू देण्यास सांगत नाही. अशा फसव्या व्यक्तींना बळी पडू नये आणि अशा घटना आढळल्यास तात्काळ डायल 112 किंवा जवळच्या पोलिस ठाण्याशी संपर्क साधावा. या कारवाईने नागरिकांमध्ये सुरक्षिततेची भावना निर्माण झाली आहे. विशाल आनंद यांच्या नेतृत्वाखालील पोलिसांच्या सतर्कतेला आणि कर्तव्यदक्षतेला सर्वत्र सलाम केला जात आहे.
