राजकारणाच्या चकाकीत शेतकरी आणि मजुरांचा चेहरा हरवताना दिसतोय. या अन्यायाविरुद्ध बच्चू कडू आक्रमक झाले आहेत. सत्ताधाऱ्यांच्या ढोंगी धोरणांवर त्यांनी थेट प्रहार करत कष्टकरी वर्गाच्या वेदनांना आवाज दिला आहे.
राजकारणाचं रणांगण झगमगणारं असलं तरी त्याच्या सावलीत शेतकऱ्याचा आणि मजुराचा चेहरा अंधारात हरवतोय. सत्तेच्या खेळात कष्टकरी वर्गाचा आवाज दाबला जातोय. या अन्यायावर आता बच्चू कडू यांनी थेट शब्दांचे बाण झाडले आहेत. महायुती सरकारवर निशाणा साधताना त्यांनी स्पष्ट शब्दांत म्हटलं की, जसं राजकारणात आपण वागतो तसं शेतकऱ्यांसोबत वागू नये. कारण राजकारण हे सत्तेचं असतं, पण शेती ही जगण्याचं साधन आहे. आज या दोन्हींच्या रेषा इतक्या गुंतल्या गेल्या आहेत की, शेतकऱ्याचं दु:ख राजकारणाच्या भाषणात हरवतंय.
कडूंच्या मते, शेतकरी आणि मजूर हा तोच वर्ग आहे जो या देशाचा पाया उभा करतो. पण तरीही तो दखलपात्र नाही. कारण समाजात जाती आणि धर्माचा अतिरेक झाला आहे. ज्याच्या श्रमाचे सोने जमिनीत मिसळते. त्याला बाजूला ठेवण्याचा प्रयत्न सुरू आहे. हा केवळ विरोधकांचा आरोप नाही, तर वास्तव आहे. या वास्तवाला आपणच जबाबदार आहोत. कारण जनता स्वतः जात, धर्म आणि पक्ष यांना प्राधान्य देते. हाच खेळ राजकारण्यांना सोयीचा वाटतो. मतांच्या गणितात माणुसकी हरवते. कष्टकरी वर्गाची हक्काची लढाई सत्तेच्या फायद्यात रुपांतरित केली जाते.
Local Election : बंडखोरी, वाद अन् चुकीचा डाव; एमव्हीएला पुन्हा अपयश येणार?
राजकारणासाठी राजकारण
बच्चू कडू म्हणतात, आजचा राजकीय अजेंडा फक्त निवडणुकीभोवती फिरतो. ना राज्य महत्त्वाचं राहिलं, ना राष्ट्र. फक्त पद आणि सत्ता हाच उद्देश उरलाय. ही सत्तेची हाव इतकी वाढली आहे की लोकप्रतिनिधी लोकांच्या वेदना विसरले आहेत. महाराष्ट्राचा कांदा स्वस्तात ट्रेनने बाहेर पाठवून, इथल्या शेतकऱ्याला लुटलं जातंय. एका बाजूला शेतकऱ्यांच्या अंगावर कर्जाचं ओझं. दुसऱ्या बाजूला सत्ताधाऱ्यांच्या हातात स्वार्थाचं माप. हे दृश्य महाराष्ट्राच्या आत्म्याला छेद देणारं आहे. कडू यांनी या सत्ताधाऱ्यांना ‘भामटी मंडळी’ म्हटलं आहे. कारण त्यांना ना शेतकऱ्याचं दुःख समजतं, ना मजुराची हाक ऐकू येते. निवडणुकीशिवाय, प्रचाराशिवाय ही मंडळी सामान्य माणसाकडे पाहत नाहीत. हे राजकारणासाठी राजकारण करणारे लोक आहेत. ज्यांच्या शब्दांत सेवा नाही, तर फसवणुकीचा गंध आहे.प्रहार जनशक्ती पक्षाचे नेते बच्चू कडू यांनी महायुती सरकारवर शेतकऱ्यांच्या फसवणुकीचा आणि मच्छिमार-वंचितांच्या उपेक्षेचा आरोप केला. त्यांनी सरकारच्या शेतकरीविरोधी धोरणांवर बोट ठेवले. त्यांनी सांगितले की, 2013 मधील तुटपुंज्या मदतीएवढीच रक्कम आजही शेतकऱ्यांना दिली जात आहे. तर पंजाब हेक्टरी 50 हजार रुपये देते. तेलंगणा, मध्य प्रदेश, केरळसारखी राज्ये हमीभाव-बाजारभावातील फरक शेतकऱ्यांना देतात. पण प्रगत महाराष्ट्रात नुकसानग्रस्त शेतकऱ्यांना अर्धवट मदत मिळते. याबद्दल लाज वाटली पाहिजे, असा टोला त्यांनी लगावला.
Rajendra Shukla : छिंदवाडा ते नागपूर ‘विषारी बाटली’ने माजवला हाहाकार
विसरलेली माणुसकी
मच्छिमारांना घरे नाहीत, निर्यातीसाठी सक्षमता नाही. सरकार फक्त धर्माच्या नावावर शिव्या देण्यात मश्गूल आहे. तर बिहारमध्ये मतांसाठी 10 हजार रुपये खात्यात टाकले जातात. पण महाराष्ट्रात शेतकरी, मच्छिमार आणि कामगार उपेक्षित राहतात, अशी खरमरीत टीका कडू यांनी केली. सव्वा लाखात घर बांधता येत नाही, नुकसान भरपाईचा दुसरा हप्ता गायब होतो. पंतप्रधान आवास योजनेच्या नावाखाली फसवणूक होते, असे म्हणत त्यांनी सरकारला इशारा दिला. शेतकऱ्यांशी राजकारण केले तर ते रस्त्यावर उतरून सरकारला धडा शिकवतील.
बच्चू कडूंच्या टीकेतून उमटतो तो सत्तेचा मूळ आजार, सत्तेचं व्यसन. त्यांच्या मते, केंद्र सरकार आणि मोदींचं एकूण वर्तन पाहिलं तरी तेच स्पष्ट होतं की सामान्य माणसाच्या, शेतकऱ्याच्या, मजुराच्या समस्या या सरकारच्या अजेंड्यात नाहीत. निवडणुकीचं गणित जुळवणं, धर्माचं कार्ड खेळणं आणि प्रचारासाठी घोषणांचा पाऊस पाडणं. एवढ्यापुरतंच या सत्ताधाऱ्यांचं राजकारण सीमित झालं आहे. शेतकऱ्याचा घाम आणि मजुराचा घास, या दोन्हींचं मोल विसरलेल्या व्यवस्थेला बच्चू कडूंची टीका म्हणजे आरसा आहे. हा आरसा पाहायला सरकार धजावेल की पुन्हा एकदा आकड्यांच्या धुरात सत्य दडवेल. हे ठरवेल महाराष्ट्राचं भवितव्य.
