नागपूर महापालिकेच्या हलगर्जी कारभारामुळे संत्रानगरी नागपूर खड्ड्यांच्या गावात रूपांतरित झाली आहे.
संत्रानगरी म्हणून ओळखल्या जाणाऱ्या नागपूर शहराचा चेहराच बदलला आहे. शहरातील अनेक भागांमध्ये महापालिकेच्या (NMC) नावाखाली सुरू असलेल्या कामांमुळे नागपूरकरांच्या सहनशीलतेचा अंत पाहिला जात आहे. रस्ते खोदण्याची कामे अनेक ठिकाणी एकाच वेळी सुरू असून, यामध्ये कोणत्याही विभागाचा समन्वय नाही. पोलिस विभागालाही कुठे काय सुरू आहे, याची माहिती नसल्यामुळे वाहतूक कोंडी आणि अपघातांचे प्रमाण दिवसेंदिवस वाढत आहे.
राणी दुर्गावती रोड ते मेहंदीबाग पुलादरम्यान मुख्य रस्त्याच्या मधोमध दोन ठिकाणी नळाचे पाईप रस्त्यापासून दोन फूट उंचावर ठेवण्यात आले आहेत. हा रस्ता शहरातील वाहतुकीसाठी महत्त्वाचा असून रात्रीच्या अंधारात हे पाईप दिसत नाहीत. त्यामुळे अनेक वाहनचालकांचा अपघात होतो. महापालिकेने हे काम व्यवस्थितपणे न केल्यामुळे नागरिकांचा जीव धोक्यात आला आहे. या भागातील नागरिकांनी वारंवार तक्रारी करूनही महापालिकेने दुर्लक्ष केले आहे. कामगारांनी पाईप टाकून मोकळे होण्याची मानसिकता नागपूरकरांना महागात पडत आहे.
दुरुस्ती नाही
बेसा एनपी, ओंकार नगर, शाहूनगर, शेषनगर अशा अनेक भागांमध्ये भूमिगत वीजपुरवठा आणि पाणीपुरवठा लाइन टाकण्यासाठी महापालिकेने मोठ्या प्रमाणावर खोदकाम केले. महिनाभरापूर्वी काम पूर्ण झाले, पण दुरुस्ती मात्र झाली नाही. परिणामी वाहनचालकांना खडतर प्रवासाचा सामना करावा लागतो. नागपूर महानगरपालिकेच्या दुर्लक्षामुळे खड्ड्यांमुळे अपघातांचे प्रमाण वाढले असून, लोक संतप्त झाले आहेत.
वाहतूक कोंडी ही शहरातील प्रमुख समस्या बनली आहे. काम पूर्ण झाल्यानंतर रस्ते सपाट करण्याची जबाबदारी महापालिकेने पार पाडली नाही. महावितरण, बेसा नगर पंचायत आणि इतर विभागांकडून एकमेकांमध्ये समन्वय नसल्यामुळे नागरिकांना अडचणींचा सामना करावा लागत आहे.
दोषी कोण
मानकापूर ते सदर फ्लायओव्हरखाली काही दिवसांपूर्वी झाडे लावण्यासाठी टाकण्यात आलेली माती आता वाहनचालकांसाठी धोकादायक ठरत आहे. माती चेंबरच्या बाहेर पसरल्यामुळे वाहने घसरून अपघाताचे प्रमाण वाढले आहे. यामुळे परिसरातील नागरिक संतप्त असून प्रशासनाने तातडीने माती हटवून दिलासा द्यावा, अशी मागणी केली आहे.पाणी, गटार आणि वीजपुरवठ्याच्या नावाखाली शहरातील रस्त्यांची वाताहत झाली आहे.
महापालिकेच्या हलगर्जीपणामुळे नागपूर शहर खड्ड्यांच्या गावात रूपांतरित झाले आहे. अपघातांची वाढती संख्या आणि नागपूरकरांचा संताप पाहता, महापालिकेला जबाबदारी स्वीकारावी लागेल. नागपूरचे नागरिक आता महापालिकेच्या कार्यक्षमतेवर प्रश्नचिन्ह उभे करत आहेत.
नागपूर महापालिकेने वेळेवर उपाययोजना केल्या नाहीत, तर संत्रानगरीचे नाव खड्ड्यांची नगरी असे होईल, हे निश्चित!
