चमकोगिरीचा जुनाच फॉर्म्युला पुन्हा एकदा रंगात आला आहे आणि या वेळेसही चमकू हिरो म्हणून निघाले काँग्रेसचे साजिद खान पठाण. पण भाजपने त्यांचा हा ‘झगमगाट शो’ पुन्हा एकदा अंधारात लोटला आहे.
काही दिवसांपूर्वी भाजपने मंजूर करून आणलेल्या विकास कामावर स्वतःचे नाव लावून फोटो काढत, आम्हीच केलं, अशी अशी घोषणा करणाऱ्या अकोला पश्चिम चे आमदार साजिद खान पठाण यांच्यावर भाजपने ‘खोटं श्रेय’ खाण्याचा आरोप केला होता. आता पुन्हा एकदा तेच जुनं नाटक नव्या स्टेजवर आलं आहे. या वेळी विषय आहे अकोट रेल्वे पुलाचा. त्यामुळे आता, ‘रेडीमेड यशाचे सेल्फी आमदार साजिद खान पठाण,’ अशी बोचरी टीका भाजपकडून करण्यात येत आहे.
विधानसभेत प्रश्न विचारला म्हणून पूल मंजूर झाला असं साजिद खान पठाण म्हणाले आणि भाजपने थेट सांगितलं की, हा पूल भाषणांनी नाही, पाठपुराव्याने मंजूर झाला. खासदार अनुप धोत्रे यांचा गल्लीपासून दिल्लीपर्यंतचा सततचा पाठपुरावा, रेल्वे सल्लागार समितीतून प्रस्तावाची हालचाल आणि अखेर मंजुरी, हे सगळं भाजपने केलं. मात्र साजिद पठाण यांना पायऱ्या चढायच्या आणि वरती फोटो काढायचे, एवढाच त्यांचा वाटा होता. विकास आम्ही करतो, पोस्टर मात्र पठाण लावतात, असं भाजप भाजपकडून बोलल्या जात आहे.
केला पर्दाफाश
साजिद खान पठाण यांचे ‘प्रश्न’ म्हणजे एखादा ढोलक्याचा ‘बीट’. विकासाचे श्रेय मात्र सगळं स्वतःकडे घेत बसले आहेत, जणू सगळं काँग्रेसनेच केलं. पठाण साहेबांचा सल्लागार ब्रँडिंगमध्ये बिझी आहे, पण विकासाच्या मुळाशी कोणी नाही, असा तिखट आरोप करत भाजपने संपूर्ण प्रकरणाचा पर्दाफाश केला. डोकं वापरून दिल्ली दरबारात धावणं हे भाजपचं काम. त्याचा वापर करून झोपेतून उठून ‘मी केलं’ म्हणणं हे काँग्रेसचं धोरण. चमकोगिरी शिकायची असेल, तर काँग्रेस नेत्यांकडून शिकावी, असा घणाघाती हल्ला भाजपने केला आहे.
भाजपकडून ठामपणे सांगण्यात येत आहे की, खोट्या श्रेयाच्या खेळात खरा विकास हरवू नये, म्हणूनच आम्ही आवाज उठवतोय. लोकप्रतिनिधी म्हणून चमकायचं असेल, तर काम करा, फ्लॅश नाही, असे जोरदार टीकास्त्र पठाण यांच्यावर भाजपने सोडले. भाजपकडून स्पष्ट सांगण्यात आलं की, अकोल्यात कुठलाही विकास प्रामाणिकपणे झाला असेल, तर त्यामागे फॉलोअप, बैठका, केंद्राशी समन्वय यासाठी झगडणाऱ्या भाजपच्या लोकप्रतिनिधींचा घाम असतो. नुसतं विधानसभेत बोलणं म्हणजे श्रेय नाही.
फोटो काढायचे असतील तर सेल्फीसाठी काढा, पण श्रेय घ्यायचं असेल तर कृती करा, असा शब्दशः घाव भाजपने काँग्रेस आमदार पठाण यांच्यावर केला आहे. आता बघायचं एवढंच की, पठाण पुन्हा एकदा उत्तरात फोटो पाठवणार की काही ठोस काम दाखवणार? आणि भाजपच्या या आरोपांवर साजिद खान पठाण यांची काय प्रतिक्रिया राहणार हे पाहणे औत्सुक्याचे ठरणार आहे.
