भंडारा जिल्ह्यातील चार नगरपरिषदांमध्ये एकूण 696 उमेदवार निवडणूक लढत आहेत. निवडणुकीत 622 अपक्ष उमेदवार आहेत.
Municipal Council : अपक्ष उमेदवारांच्या मोठ्या संख्येमुळे भंडारा जिल्ह्यातील निवडणूक रंगतदार झाली आहे. अनेक ठिकाणी चूरसपूर्ण लढतीची शक्यता निर्माण झाली आहे. वेगवेगळ्या पक्षातील बंडखोर मैदानात कायम आहेत. त्यांचं आवाहन प्रस्थापित पक्षाच्या उमेदवारांना आहे. आता प्रचार थांबून उमेदवारांचा कस लागणार आहे. त्यामुळे हा लढा आता बहुकोणीय होणार आहे. या लढाईत कोण बाजी मारणार असा प्रश्न आहे.
भंडारा जिल्ह्यातील तुमसर, पवनी, भंडारा आणि साकोली या चार नगरपरिषदेतील निवडणूक काही तासांवर आली आहे. मैदानातील प्रचार तोफा आता थंडावणार आहेत. अधिकृत पक्षाचे निवडणूक चिन्ह असलेले उमेदवार जोर लावून आहेत. परंतु त्यांना अपक्ष उमेदवारांनी तगडे आव्हान दिलं आहे. त्यामुळं मतदारही संभ्रमात आहेत. केंद्रात आणि राज्यात महायुती सरकार आहे. अशात सत्ताधारी पक्षाच्या उमेदवारांचं पारडं जड आहे. काम करण्याची क्षमता असली तरी अपक्ष कसा निवडून द्यायचा, असा प्रश्न त्यामुळं मतदारांपुढं आहे.
Bhandara : आमदाराने मांडला प्रश्न; मुख्यमंत्र्यांनी दिली ग्वाही
नारीशक्ती दिसणार
भंडाऱ्यात चारही परिषदांमध्ये एकूण उमेदवारांची संख्या प्रचंड आहे. 696 उमेदवार निवडणूक लढवत आहेत. नगराध्यक्ष पदासाठी 34 जण रिंगणात आहेत. नगरसेवक पदासाठी 662 उमेदवार आहेत. सर्वांत महत्त्वाचे म्हणजे, अनेक उमेदवार अपक्ष म्हणून निवडणूक लढवत आहेत. या मोठ्या संख्येने मोठ्या चुरशीची शक्यता आहे. त्यामुळे आता अंतिम टप्प्यात राजकीय गरमागरमी वाढली आहे. जिल्ह्यातील तीन नगर परिषदेत महिलांचे वर्चस्व राहणार आहे.
भंडारा, पावनी आणि साकोली नगरपरिषद महिलांसाठी राखीव आहे. या परिषदेमध्ये महिला नेतृत्व दिसणार आहे. आता मतदार कोणाला कौल देतात, याकडं राजकीय वर्तुळाचं लक्ष आहे. तुमसर नगरपरिषदेची जागा ओबीसींसाठी राखीव आहे. प्रमुख पक्षांपासून अपक्षांपर्यंत सर्वजण आपले नशीब येथे आजमावत आहेत. भंडारा येथे नगराध्यक्ष पदासाइी आठ प्रमुख पक्ष आणि तीन अपक्ष मैदानात आहेत.
साकोलीवर झेंडा कोणाचा?
साकोली येथे सहा पक्ष आणि तीन अपक्ष आहेत. तुमसर येथे पाच पक्ष आणि दोन अपक्ष उमेदवार आहेत. पावनी येथे सात उमेदवार पक्षांकडून निवडणूक लढत आहेत. निवडणूक महायुती विरुद्ध महाविकास आघाडी अशी नाही. निवडणुकीत अनेक अँगल तयार झाले आहेत. काही ठिकाणी महायुती आणि महाविकास आघाडीतील पक्षाचे उमेदवारही मैदानात आहेत. निवडणूक पश्चात त्यांच्या एकत्रिकरण शक्य आहे.
प्रमुख पक्षांना त्यांचे चिन्ह आहेत. जसे भाजपजवळ कमळ आहे. राष्ट्रवादी काँग्रेस अजित पवारांच्या उमदेवारांचं घड्याळ सुरू आहे. राष्ट्रवादी काँग्रेस शरद पवारांच्या उमदेवारांना बासरी वाजवणारा माणूस मिळाला आहे. काँग्रेसचा पंजा कायम आहे. शिवसेना एकनाथ शिंदे पक्षाचे उमेदवार विजयाचे धनुष्यबाण घेऊन आहेत. शिवसेना ठाकरे गटाची मशाल धगधगत आहे.
सभांचा धुराळा
आम आदमी पार्टी झाडू घेऊन यंत्रणा स्वच्छ करण्याच्या प्रयत्नात आहे. वंचित बहुजन आघाडी गॅस सिलिंडरवर आहे. बसपाचा हत्ती विजयाकडे वाटचाल करण्याचा प्रयत्न करत आहे. सीपीआयकडे विळा आणि भाताचे धान आहे. ट्रॅक्टर, बॅट-बॉल, शिलाई मशीन, भरतकाम, कॅमेरा, टीव्ही सेट, ढोल, कप-बशी अशी डझनभर चिन्हं अपक्षांजवळ आहेत. त्यामुळं पक्षांपेक्षा अपक्षांची चिन्ह अधिक आहेत. भंडारा जिल्ह्यात मुख्यमंत्री देवेंद्र फडणवीस यांच्या सुपरहिट सभा झाल्या.
भाजपचे माजी मंत्री आमदार डॉ. परिणय फुके यांचं जिल्ह्यात प्राबल्य आहे. शिवसेनेचे आमदार नरेंद्र भोंडेकर यांच्यावरही मोठी जबाबदारी आहे. त्यांना पक्षाला मोठं यश मिळवून द्यायचं आहे. परंतु दोन्ही शिवसेना, दोन्ही राष्ट्रवादी काँग्रेसच्या पाहिजे तशा दमदार सभांचा अभाव आहे. जिल्ह्यात भाजपचा जोर काहीसा जास्त दिसत आहे. मुख्यमंत्र्यांनी भंडारा जिल्ह्यात सभा घेतल्या. त्यांनी ‘विकासाचा वादा’ केला आहे.
अवघे काही तास
सभांच्या धुराळ्यामुळं अंतिम टप्प्यात चित्र काहीसे बदलेले आहे. परंतु मतदारांच्या मनातील कोणीही ओळखू शकत नाही. अनेक ठिकाणी त्रिकोणी लढत आहे. काही ठिकाणी चतुर्भुज लढत आहे. बंडखोरीमुळे रंजक परिस्थिती निर्माण झाली आहे. अशात अखेरच्या क्षणी वेगवेगळ्या समाजाचा पाठिंबा देणे, काढण्याचा खेळ रंगणार आहे. परिणामी सगळेच उमेदवार डोळ्यात तेल घालून नव्हे तेलात डोळे बुडवून काम करीत आहेत.
30 नोव्हेंबर रोजी प्रचार संपेल. 2 डिसेंबरला रोजी मतदान होईल. मतदानासाठी अवघे काही तास शिल्लक आहेत. त्यातून सत्तेची चावी कोणाकडे असेल? हे ठरेल. नऊ वर्षांनंतर होणाऱ्या या निवडणुकीने संपूर्ण जिल्ह्यात राजकीय तापमान वाढवले आहे. सगळ्यांचा उत्साह आता शिगेला पोहोचला आहे. सर्वत्र चर्चेचा एकच विषय आहे. कोण जिंकेल? कोण हरेल? आणि कोण अस्वस्थता दूर करेल? भंडाऱ्यात कोणत्या नेत्याचं निर्विवाद वर्चस्व असेल?
