नागपूरच्या जामठा स्टेडियममध्ये 6 फेब्रुवारीला भारत-इंग्लंड सामन्यासाठी क्रिकेटप्रेमींचा उत्साह उफाळला आहे.
नागपूरकरांच्या प्रतीक्षेचा काळ आता संपला आहे. येत्या 6 फेब्रुवारीला जामठा येथील वसीम क्रिकेट स्टेडियमवर भारत आणि इंग्लंड यांच्यातील बहुप्रतीक्षित एकदिवसीय सामना रंगणार आहे. क्रिकेट प्रेमींसाठी हा सोहळा मोठा उत्साह घेऊन आला आहे. स्टेडियमच्या सर्व जागा अगोदरच भरल्या असून तिकिटांसाठी लोकांना मोठ्या गर्दीत संघर्ष करावा लागला आहे. तासाभरातच ऑनलाइन तिकिटे विक्री संपल्याने अनेकांची निराशा झाली, तर काहींची फसवणूक देखील झाल्याच्या घटना समोर आल्या आहेत.
या सामन्यामुळे नागपूर महानगरपालिका आणि महा मेट्रोला चांगला फायदा होणार आहे. महा मेट्रोने खापरी स्थानकापासून जामठा स्टेडियमपर्यंत बस सेवा सुरू केली आहे. आणि मनपाने पंचशील चौक आणि सीताबर्डी येथून दर 15 मिनिटांनी बसेस चालवण्याचे नियोजन केले आहे. प्रवाशांना “चलो” अॅपद्वारे बस तिकिटांचे आगाऊ बुकिंग करता येणार असून, जामठा टी-पॉइंटवर स्पॉट तिकिटांचीही सुविधा उपलब्ध आहे.
उत्साहाला शिस्तीची जोड आवश्यक
वाहतूक पोलिस आणि महानगरपालिकेच्या व्यवस्थापनामुळे सामना पाहण्याचा अनुभव प्रेक्षकांसाठी अधिक सुलभ होणार आहे. प्रेक्षकांनी वेळेपूर्वी स्टेडियमवर पोहोचावे, तसेच मेट्रो व बस सेवा यांचा अधिकाधिक उपयोग करून वाहतूक कोंडी टाळावी, असे आवाहन प्रशासनाकडून करण्यात आले आहे. नागपूरच्या क्रिकेट इतिहासातील या महत्त्वाच्या सामन्याला नागपूरकरांनी उत्साहाने साथ देत शांततेत व आनंदाने अनुभव घेण्याचा निर्धार केला आहे.
प्रेक्षकांनी सामना सुरू होण्याच्या किमान दोन तास आधी स्टेडियममध्ये पोहोचावे आणि खापरी मेट्रो स्थानकापर्यंत मेट्रो सेवा वापरून तेथून बसने प्रवास करावा, असा सल्ला प्रशासनाने दिला आहे. नागपूर-वर्धा महामार्गावरील अवजड वाहनांची वाहतूक समृद्धी महामार्गावर वळवण्यात आली असून, सामन्यानंतर सीताबर्डीहून वाडी, कोराडी, काटोल नाका व पारडीसाठी बसेस उपलब्ध असतील. वाहतूक पोलिसांनी स्टेडियमच्या आत व बाहेर प्रेक्षकांसाठी विशेष व्यवस्था केली आहे. प्रेक्षकांनी सहकार्य करून वाहतूक सुरळीत ठेवावी असे आवाहन करण्यात आले आहे.
महत्त्वाच्या सूचना
नागपूर वाहतूक पोलिस आणि महानगरपालिकेने भारत-इंग्लंड सामन्यासाठी विशेष वाहतूक उपाययोजना केल्या आहेत. स्टेडियम परिसरात चारचाकींसाठी B, D1, D2 तर दुचाकींसाठी C पार्किंग राखीव आहे. अतिरिक्त गर्दी असल्यास E आणि F पार्किंग उपलब्ध असेल. वाहतूक नियंत्रणासाठी स्टेडियम मार्गावर पोलिस बंदोबस्त वाढवण्यात आला आहे. जामठा टी-पॉइंटवरून वाहने वर्धा रोडवरील अतिरिक्त पार्किंगकडे वळवली जातील. मार्गदर्शनासाठी फलक आणि पोलिस पथके तैनात आहेत.
