अकोला महापालिकेची निवडणूक आता जवळ येत आहे. अशात एकट्या पडलेल्या भाजपला सध्या साजिद खान पठाण यांना रोखण्याचे आव्हान पेलावे लागणार आहे.
अकोला पश्चिम विधानसभा मतदारसंघात भाजपचा अत्यंत लाजीरवणा पराभव झाला. तोंड दाखवायलाही जागा उरली नाही, असा हा पराभव आहे. भाजपच्या उमेदवाराला पराभूत करण्यामागे एका मोठ्या नेत्याचा हात असल्याचे आता पुढे येत आहे. या नेत्याला विजय अग्रवाल आमदार नको होते. अग्रवाल आमदार झाले असते तर त्यांनी काहीना काही करून मंत्रिपद आणले असते. अशात आपण बसलो असतो त्यांचे ऐकत, अशी भावना या नेत्याने जवळच्या काही व्यक्तींजवळ बोलून दाखवली आहे.
अग्रवाल यांच्या परिचयातील अनेकांनी निवडणूक काळात कार्यकर्ते, स्वयंसेवक आणि कौलखेड भागातील अनेकांच्या अरेरावीची भाषा केल्याचा आरोप आहे. त्यामुळे अखेरच्या क्षणी मतदान फिरल्याचे दिसत आहे. अकोला पश्चिम विधानसभा मतदारसंघाचा निकाल जाहीर झाल्यानंतर आकडेवारीचा सखोल अभ्यास भाजपने करावा. त्यातून कोणत्या भागातून भाजपला मतदान झालेच नाही, हे दिसून येईल. यातून विजय अग्रवाल यांच्या पराभवामागे कोण विभीषण होता, याची स्पष्ट कल्पना येईल. या साऱ्यात मात्र आता भाजपपुढे अकोला महापालिका जिंकण्याचे आव्हान आहे.
आता तरी सुधरा
अकोला भाजपमध्ये अद्यापही संघाचे स्वयंसेवक, भाजपचे कार्यकर्ते यांना अपमानास्पद वागणूक देण्याचा क्रम सुरू आहे. अनेक वर्षांनंतर पुन्हा एकदा अकोला पश्चिमवर काँग्रेसचा झेंडा फडकला आहे. त्यानंतर आमदार साजिद खान पठाण आता लोकांच्या मनात घर करून जात आहेत. राजेश्वर मंदिराला तीर्थक्षेत्राचा दर्जा मिळणे असो की बैदपुऱ्यातील वाद साजिद खान सगळ्यात पुढे राहात आहेत. भाजपचे नेते मात्र अद्यापही कुंभकर्णी झोपेत आहेत. राष्ट्रीय स्वयंसेवक संघाच्या भरवश्यावर भाजपचे नेते गब्बर झाले. मात्र त्याच संघाच्या शताब्दी महोत्सवाकडे भाजपच्या नेत्यांनी पाठ फिरवली. संघाचा गणवेश घालून पथसंचलनामध्ये जाण्याची त्यांना लाज वाटली.
भाजप नेत्यांची ही वागणूक राष्ट्रीय स्वयंसेवक संघाने नोंदवून घेतली आहे. आता महापालिका निवडणूक जवळ आहे. राष्ट्रीय स्वयंसेवक संघ मूर्ख आहे. काहीही केले तरी ते आपल्याला सोडून जाणार नाही, अशा प्रकारचे वाक्य भाजपच्या नेत्यांच्या तोंडून आजही निघत आहेत. विधानसभा निवडणुकीतही संघाचे सुरूवातीला काम केले नाही. पण वरून दट्ट्या आल्यानंतर आलेच ना मैदानात? असा प्रश्नही भाजपच्या नेत्यांकडून केला जात आहे. त्यावरून भाजपचे नेते संघाला व स्वयंसेवकांना काय समजतात याची कल्पना येते. मात्र स्वयंसेवकांनी विधानसभा निवडणुकीत भाजपला मतदान करा, असे आवाहन केले. हाच कित्ता महापालिका निवडणुकीतही गिरवला जाईल, असा अतिआत्मविश्वास भाजपच्या नेत्यांना आहे, नव्हे ते बोलून दाखवत आहेत.
Akola : महापालिका निवडणुकीत ‘अनुप स्क्वेअर’ ठरेल का भाजपचे विघ्नहर्ता?
तिकिट वाटपात राजकारण
अकोला भाजपमध्ये सध्या बोटावर मोजण्याइतके नेते आणि पदाधिकारी उरले आहेत. जे उरले आहेत, ते अत्यंत उद्धट आणि उर्मट आहे. कोणाशी कसे वागायचे, बोलायचे, याचे संस्कार त्यांच्यावर झालेले दिसत नाहीत. त्याची कल्पना यापैकी काहींनी विधानसभा निवडणूक निकालानंतरच दिली होती. ज्यांनी विधानसभा निवडणुकीत काम केले नाही, त्यांचे तिकिट आम्ही कापणार अशी जाहीर धमकी नेत्यांनी देऊन टाकली आहे. अशात जे स्वत: विजय मिळवू शकले नाही, त्या नेत्यांच्या सांगण्यावरून महापालिका निवडणुकीत भाजपने उमेदवारांना तिकिट वाटप करणे हास्यास्पद ठरणार आहे.
महापालिका निवडणुकीत कोणाकोणाला तिकिट द्यायचे हे भाऊंच्याच हाती असल्याचे त्यांचे चमचे सांगत आहेत. त्यामुळे आगामी महापालिका निवडणुकीत भाजपमध्ये मोठ्या प्रमाणावर बंडखोरी दिसण्याचे संकेत आहे. ज्यांना स्थानिक नेत्यांनी अपमानाची वागणूक दिली, त्यांना सन्मानाने भाजपला पक्षात घ्यावे लागणार आहे. असे झाले नाही, तर महापालिकेत कोण महापौर होणार? हे आमदार साजिद खान पठाण ठरवेल असे चित्र आहे. आमदार साजिद खान पठाण कोणाचे मित्र आणि पार्टनर आहे, हे जगापासून लपून राहिलेले नाही. त्यामुळे अशा व्यक्तीला भाजपने महापौर करू नये, अशी मागणी होत आहे. साजिद खान पठाण यांना भाजपमधील याच नेत्यांनी मोठे केले. प्रत्येक वेळी सोबत बसविले. आता त्याच साजिद खान यांच्या विरोधात ते मुस्लिम असल्याचा सोयीस्कर प्रचार भाजपमधील त्याच नेत्यांकडून केला जात आहे.
वृत्त खरे ठरले
काँग्रेसमध्ये कितीही गटबाजी झाली तरी उमेदवारी साजिद खान पठाण यांनाच मिळणार. याबाबत ‘द लोकहित लाइव्ह’ने निवडणूक जाहीर होण्याच्या एक महिना अगोदरच वृत्त प्रकाशित केले होते. राहुल गांधी यांच्याकडे साजिद की झिशान हे पर्याय गेल्यानंतरही साजिद यांनाच उमेदवारी मिळेल, हे ‘द लोकहित लाइव्ह’ने ठामपणे नमूद केले होते. झालेही तसेच. त्यामुळे जोपर्यंत ठोस पुरावे आणि ठाम माहिती असल्याशिवाय ‘द लोकहित लाइव्ह’ एक शब्दही लिहित नाही, हे सिद्ध झाले. यंदाच्या महापालिका निवडणुकीबाबतही तसेच आहे.
भाजपच्या प्रदेश पातळीवरील नेत्यांनी उद्धट, उर्मट आणि संघाचा अपमान करणाऱ्या नेत्यांना वेळीच दूर करावे. दुखावलेल्या सर्वांना एकत्र आणावे. त्यांना सन्मान द्यावा. यावेळी तरी किमान राष्ट्रीय स्वयंसेवक संघाच्या सूचनांचा सन्मान करावा. अन्यथा अकोला महापालिका हातून गेल्याशिवाय राहणार नाही. केंद्रात आमचे सरकार आहे. राज्यात आमचे सरकार आहे. त्यामुळे अकोल्यातील लोकांना सांगा की, महापालिकेत महाविकास आघाडीची सत्ता आली तर निधी मिळणार नाही, असे काही भाजप नेते जनतेला सांगायला लावणार आहे. पण त्यांना एका गोष्टीचा पुन्हा विसर पडला आहे. अकोल्यात नरेंद्र मोदी आले. योगी आदित्यनाथ येऊन गेले. तरी मतदारांनी भाजपचे पानीपत केले. यावरून शहाण्यांनी बाजूला व्हावे.
अकोल्यातील स्थानिकांना भाजपचे दोन नेते नको आहेत. त्यांना भाजपने वेसण घालावे. असे न झाल्यास अकोल्यातील भाजप पूर्णपणे संपल्याशिवाय राहणार नाही, काही काळ्या दगडावरची रेघ आहे. आता भाजपच्या प्रदेश आणि राष्ट्रीय कार्यकारिणीला ठरवायचे आहे. खिसे गरम करणारे चापलूस हवे की सच्चे भाजप कार्यकर्ते. त्यामुळे साजिद खान यांना रोखायचे असेल तर आधी भाजपला पक्षांतर्गत उर्मट, उद्धटांनाच रोखवे लागणार आहे.
