चंद्रशेखर बावनकुळे यांच्या नागपूर कामठी मतदारसंघात काँग्रेसने मतचोरीचा आरोप केला होता. मात्र आता त्याच मतदारसंघात एक धक्कादायक प्रकार उघडकीस आला आहे.
नागपूरच्या राजकीय पटलावर एक नवे वादळ उठले आहे. ज्याने महाराष्ट्राच्या निवडणुकीच्या मैदानात आधीच निर्माण झालेल्या धुमाकूळाला आणखी तीव्रता दिली आहे. 2024 महाराष्ट्र विधानसभा निवडणुकीत भाजपने निवडणूक आयोगाच्या मदतीने मतचोरी केल्याचा आरोप काँग्रेसकडून सातत्याने केला जात आहे. नागपूरच्या दक्षिण पश्चिम आणि कामठी मतदारसंघात मोठ्या प्रमाणात मत चोरी झाल्याचे राहुल गांधी यांनी पुराव्यासह सांगितले होते. हे आरोप इतके गंभीर आहेत की, ते आता केवळ राजकीय चर्चेचे विषय राहिले नाहीत, तर लोकांच्या विश्वासावरच प्रश्नचिन्ह उभे करत आहेत.
भाजपकडून या आरोपांना सडेतोड उत्तर दिले जात असले तरी, वाद थांबण्याची चिन्हे दिसत नाहीत. आता, या मतचोरीच्या धुमाकूळातच, कामठी मतदारसंघात एक नवे रहस्य उघड झाले आहे. झुडपी जंगलाच्या जमिनीची चोरी. कामठी तालुक्यातील मौजा भुगांव येथील हे जंगलाचे क्षेत्र, जे वनविभागाच्या ताब्यात देण्याचे सर्वोच्च न्यायालयाने स्पष्ट आदेश दिले आहेत, ते भाजपशासित ग्रामपंचायतीने एका खासगी संस्थेला ३० वर्षांसाठी भाडेतत्त्वावर देऊन टाकले आहे. हे कृत्य केवळ नियमांचे उल्लंघन नाही, तर एक प्रकारची ‘जमीनचोरी’ आहे, असा थेट आरोप जिल्हा परिषदेच्या माजी सदस्या अवंतिका लेकुरवाळे यांनी केला आहे. त्यांच्या मते, हे प्रकरण इतके गंभीर आहे की, ते शेतकरी, आदिवासी आणि गरीबांच्या हक्कांवरच घाला आहे.
Chandrashekhar Bawankule : मोदींवर टीका करून लोकशाहीची थट्टा
न्यायालयाचे आदेश पायदळी
कामठी विधानसभा मतदारसंघाचे आमदार चंद्रशेखर बावनकुळे, जे राज्याचे महसूल मंत्री आहेत, त्यांनी या प्रकरणाची दखल घेऊन तातडीने कारवाई करावी, अशी मागणी लेकुरवाळे यांनी केली आहे. हे प्रकरण आता केवळ स्थानिक पातळीवर राहिले नाही, तर महाराष्ट्र काँग्रेसने याला राज्यव्यापी मुद्दा बनवला आहे.या जमिनीच्या लुटीच्या प्रकरणाने महाराष्ट्र काँग्रेस चांगलीच संतापली आहे. त्यांच्या मते, शेतकऱ्यांचे उत्पन्न दुप्पट करण्याचे आश्वासन देत सत्तेत आलेले सरकार प्रत्यक्षात शेतकऱ्यांचीच लूट करत आहे. कामठीत भाजपशासित ग्रामपंचायतीने जमिनींची उघड लूट केली आहे, असा थेट आरोप काँग्रेसने केला आहे.
भाजपने मतं चोरलीच, आता शेतकऱ्यांची जमीनही चोरत आहेत, असा कडक शब्दांत हल्ला चढवला आहे. न्यायालयाचे आदेश पायदळी तुडवून लोकशाहीचा गळा आवळला जात असल्याचे ते म्हणतात. जनतेला आश्वासने देणारे भाजपचे नेते प्रत्यक्षात लूटमारीलाच प्रोत्साहन देत आहेत, असा आरोप करून काँग्रेसने या प्रकरणाला अधिक तीव्रता दिली आहे.महाराष्ट्र काँग्रेसने या प्रकरणाला आणखी विस्तार देत म्हटले आहे की, भाजप जमिनींची लूट करून शेतकरी, आदिवासी आणि गरीबांचा हक्कच हिरावून घेत आहे. हे केवळ एका गावाचे प्रकरण नाही, तर राज्यभरात अशी अनेक उदाहरणे असू शकतात. निवडणुकीत मतचोरीचे आरोप आणि आता जमिनीच्या चोरीचे, हे दोन्ही एकाच साखळीचे भाग वाटतात. काँग्रेसने यावरून भाजपला घेरण्याची तयारी केली आहे.
