शेतकऱ्यांच्या मदतीच्या प्रश्नावर पुन्हा एकदा राजकीय शाब्दिक युद्ध रंगले आहे. उद्धव ठाकरे यांनी “केंद्राकडे मदतीचा प्रस्तावच गेला नाही” असे वक्तव्य केल्यानं महसूल मंत्री चंद्रशेखर बावनकुळे यांनी त्यांच्यावर तीव्र शब्दांत प्रहार केला आहे. “जर राज्य सरकारकडून केंद्राला प्रस्ताव गेला नसता, तर केंद्रीय पथक मदतीसाठी महाराष्ट्रात कसे आले असते? दिवसभर माध्यमांमध्ये चर्चेत राहण्यासाठी उद्धव ठाकरे असे दिशाभूल करणारे वक्तव्य करतात,” असा सडेतोड टोला बावनकुळे यांनी लगावला.
बावनकुळे म्हणाले, केंद्रीय पथक हे जिल्हानिहाय, मंडळानिहाय शेतकऱ्यांच्या नुकसानीचे सर्वेक्षण करत आहे. हे पथक मदतीसाठीच आले आहे आणि केंद्र सरकार शेतकऱ्यांना मदत करण्याच्या ठाम भूमिकेत आहे. त्यांनी पुढे स्पष्ट केले की, ज्या शेतकऱ्यांना चुकीचे चेक देण्यात आले, त्याची चौकशी होईल. संबंधित अधिकाऱ्यांवर कारवाई केली जाईल. शेतकऱ्यांची थट्टा करणे योग्य नाही आणि कुठल्या अधिकाराने हे झाले हे पाहिलेच पाहिजे.
बसून होईल चर्चा
राज्यातील आमदार आणि कार्यकर्त्यांनाही त्यांनी थेट संदेश दिला. हे वर्ष शेतकऱ्यांसाठी आहे, त्यांच्या समस्यांवर लक्ष केंद्रित करण्यासाठी आहे. अजून पाच वर्षे आपल्याकडे विकासासाठी आहेत. त्यामुळे निधी उशिरा मिळाला म्हणून आमदारांनी नाराजी व्यक्त करण्याची गरज नाही. मुख्यमंत्री आणि दोन्ही उपमुख्यमंत्री बसून निधीबाबत योग्य निर्णय घेतील, असे बावनकुळे यांनी सांगितले.
याचबरोबर बावनकुळे यांनी काँग्रेस नेते राहुल गांधींवरही टोला लगावला. “राहुल गांधी प्रत्येक निवडणुकीनंतर देशाबाहेर फिरायला जातात, आणि बिहार निवडणुकीनंतरही तसेच करतील. बिहारमध्येही महाराष्ट्राप्रमाणे एनडीएचे सरकार येणार आहे,” असा आत्मविश्वास त्यांनी व्यक्त केला.
शेतकऱ्यांना दिलासा देण्यासाठी केंद्र सरकारची भूमिका ठाम असून, बावनकुळे यांच्या या वक्तव्यामुळे राज्यातील राजकीय वातावरणात नव्या चर्चांना उधाण आले आहे. उद्धव ठाकरे यांच्या वक्तव्यावरून पुन्हा एकदा महाराष्ट्राच्या राजकारणात चांगलीच तापलेली हवा निर्माण झाली आहे.
