अकोला महानगरपालिकेत निवडणुकीच्या तोंडावरच भ्रष्टाचाराचा धक्कादायक प्रकार उघडकीस आला आहे. जन्म-मृत्यू विभागातील प्रभारी लिपिकाला केवळ 300 रुपयांची लाच घेताना अँटी करप्शन ब्युरोने रंगेहात पकडले.
स्थानिक स्वराज्य संस्थांच्या निवडणुकीच्या तयारीने राज्यभरात जोर धरला आहे. असे असताना, अकोला महानगरपालिकेत एक धक्कादायक घटना समोर आली आहे. जन्म-मृत्यू विभागातील प्रभारी लिपिक चंद्रकांत माणिकराव अधनकर याला अँटी करप्शन ब्युरोने 300 रुपयांची लाच स्वीकारताना रंगेहाथ पकडले. या घटनेने अकोल्यातील प्रशासकीय वर्तुळात खळबळ उडाली आहे. नागरिकांमध्ये संतापाची लाट पसरली आहे. निवडणुकीच्या तोंडावर महापालिकेच्या प्रभाग रचनेला गती मिळत असताना, अशा प्रकारच्या गैरप्रकारांनी प्रशासनाच्या विश्वासार्हतेवर प्रश्नचिन्ह निर्माण केले आहे.
घटना अशी की, एका तक्रारदाराने आपल्या तीन मुलांच्या जन्म प्रमाणपत्रांवरील नाव, आधार कार्ड आणि पत्त्यामध्ये दुरुस्ती करण्यासाठी अकोला महानगरपालिकेत अर्ज सादर केला होता. या साध्या-सोप्या कामासाठी प्रभारी लिपिक अधनकर याने चक्क 300 रुपयांची लाच मागितली. तक्रारदाराने हा भ्रष्टाचार सहन न करता थेट अँटी करप्शन ब्युरो, अकोलाकडे धाव घेतली. 28 ऑगस्ट रोजी तक्रार नोंदविल्यानंतर, एसीबीने तात्काळ पडताळणी केली. लिपिकाने लाच मागितल्याचे स्पष्ट झाले.
Chandrashekhar Bawankule : मराठा समाजाला उभारी, ओबीसी हक्कांना बळ
कारवाईत लिपिक रंगेहाथ
एसीबीने 29 ऑगस्ट रोजी अकोला महानगरपालिकेत सापळा रचला. या कारवाईदरम्यान, अधनकर याने पंचांसमक्ष 300 रुपये स्वीकारले आणि त्याला तत्काळ ताब्यात घेण्यात आले. सिटी कोतवाली पोलिस ठाण्यात त्याच्याविरुद्ध गुन्हा दाखल करण्याची प्रक्रिया सुरू आहे. ही कारवाई अमरावती परिक्षेत्राचे पोलीस अधीक्षक मारुती जगताप यांच्या मार्गदर्शनाखाली, अपर पोलीस अधीक्षक सचिंद्र शिदी आणि पोलीस उपअधीक्षक मिलिंदकुमार बहाकर यांच्या देखरेखीखाली पार पडली. पोलीस निरीक्षक प्रविण वेरूळकर, अतुल इंगोले आणि त्यांच्या सहकाऱ्यांनी यात महत्त्वाची भूमिका बजावली.
घडलेल्या घटनेने प्रशासकीय यंत्रणेच्या पारदर्शकतेवर प्रश्न उपस्थित झाले आहेत. निवडणुकीच्या तोंडावर अशा प्रकारच्या लाचखोरीच्या घटना प्रशासन आणि जनता यांच्यातील विश्वासाला तडा देऊ शकतात. अँटी करप्शन ब्युरोने नागरिकांना आवाहन केले आहे की, कोणताही शासकीय अधिकारी किंवा कर्मचारी अथवा त्यांच्यामार्फत खाजगी व्यक्तीने लाच मागितल्यास त्वरित संपर्क साधावा. लाचखोरीला आळा घालण्यासाठी नागरिकांनी निर्भयपणे पुढे यावे, आम्ही त्यांना पूर्ण सहकार्य करू, असे पोलीस उपअधीक्षक मिलिंदकुमार बहाकर यांनी सांगितले.
Yashomati Thakur : स्वस्त परदेशी कापसाने शेतकऱ्यांचा घेतला बळी
घडलेला प्रकार केवळ एका लिपिकापुरता मर्यादित नसून, संपूर्ण प्रशासकीय व्यवस्थेच्या कार्यपद्धतीवर प्रकाश टाकतो. निवडणुकीच्या काळात प्रशासनावर जनतेच्या नजरा असताना, अशा घटनांमुळे सामान्य नागरिकांचा विश्वास डळमळीत होऊ शकतो. अकोला महानगरपालिकेने प्रभाग रचनेसह निवडणूक तयारीला गती दिली असताना, अशा गैरप्रकारांमुळे त्यांच्या प्रयत्नांना धक्का बसू शकतो. भविष्यात असे प्रकार टाळण्यासाठी प्रशासनाने अधिक कठोर पावले उचलणे गरजेचे आहे. लाचखोरीविरुद्ध लढण्यासाठी नागरिक आणि प्रशासन यांच्यातील समन्वय महत्त्वाचा ठरेल, असे मत तज्ज्ञांनी व्यक्त केले आहे.
