राज्य सरकारच्या शक्तिपीठ महामार्ग प्रकल्पाला प्रहार पक्षाचे आमदार बच्चू कडू यांनी तीव्र विरोध दर्शवला आहे. शेतकऱ्यांच्या जमिनी हिरावून घेतल्यास गंभीर परिणाम होतील, असा इशाराही त्यांनी दिला.
राज्य सरकारने शक्तिपीठ महामार्गासाठी 20 हजार कोटी रुपयांची तरतूद करत अधिग्रहणाची प्रक्रिया सुरू केली आहे. मात्र या निर्णयाविरोधात राज्यभरात शेतकरी, कार्यकर्ते आणि संघटना आक्रमक झाल्या आहेत. सर्वत्र आंदोलनाची लाट उसळली आहे. या पार्श्वभूमीवर प्रहार जनशक्ती पक्षाचे अध्यक्ष आमदार बच्चू कडू यांनी मुख्यमंत्री देवेंद्र फडणवीस यांच्यावर परखड टीका करत, राज्य सरकारच्या धोरणांना जाहीर विरोध दर्शविला आहे.
बच्चू कडू यांनी स्पष्ट केले की मुख्यमंत्री फडणवीस हे लवकरच पंढरपूरच्या विठोबाच्या दर्शनासाठी जाणार आहेत. त्यांनी आशा व्यक्त केली की विठोबा त्यांना सद्बुद्धी देईल. मुख्यमंत्री राज्यातील शेतकऱ्यांसाठी काही दिलासादायक घोषणा घेऊन परततील. त्यांच्या या विधानातून शासनाच्या भूमी अधिग्रहण धोरणावर आणि शेतकरीविरोधी भूमिकेवर तीव्र नाराजी व्यक्त झाली.
प्रकल्प थांबवण्याची गरज
बच्चू कडू यांनी जाहीर केले की, जी भूमी आपल्याला अन्न देते, तीच खरी शक्तिपीठ आहे. अशा मातीतून शेतकऱ्यांचे भविष्य निर्माण होते. ती भूमीच खऱ्या अर्थाने पूजनीय आहे. मात्र राज्य सरकारकडून शेतकऱ्यांचे प्रश्न सोडवण्याऐवजी मोठमोठ्या प्रकल्पांद्वारे धनदांडग्यांच्या फायद्याचा मार्ग खुला केला जात आहे. शक्तिपीठ महामार्गाच्या नावाखाली सामान्य शेतकऱ्यांची जमीन हिसकावली जात असून हे अन्यायकारक आहे. कडू यांनी स्पष्ट केले की, आम्ही कधीही 85 हजार कोटींचा महामार्ग मागितला नव्हता. शेतकऱ्यांना कर्जमाफी हवी होती, दिलासा हवा होता आणि न्याय हवा होता. मात्र शासनाकडून हाच मुद्दा टाळून मोजक्या लोकांच्या फायद्यासाठी प्रकल्प राबवले जात आहेत.
कर्जमाफीच्या मुद्द्यावर दुर्लक्ष करून विकासाच्या नावाखाली पैसा वाहून नेणे ही राजकीय बेइमानी आहे. बच्चू कडू म्हणाले की, शक्तिपीठ महामार्ग हा वास्तवात लोकांवर लादलेला प्रकल्प आहे. जमीन गमावून शेतकऱ्यांना काय मिळणार? त्यांना उत्पन्नाचे स्थायित्व हवे आहे, महामार्ग नव्हे. त्यामुळे शक्तिपीठ महामार्गाला विरोध करणाऱ्या सर्व सामाजिक, शेतकरी संघटनांच्या आंदोलनास आम्ही पाठिंबा देत आहोत. शासनाने तात्काळ हा प्रकल्प थांबवावा आणि शेतकऱ्यांच्या हितासाठी काम करावे.
Sudhr Mungantiwar : ‘ब्रिटिश पद्धतीने बांधून आणा, पण आता पुरे झालं’
राजकीय भूमिकांवरही ताशेरे
कडूंनी सत्ताधाऱ्यांवर टीकास्त्र सोडताना, भाजप सरकारवर गंभीर आरोप केले. त्यांनी म्हटले की, विरोधी पक्षाचे नेते नाना पटोले यांना एका दिवसासाठी निलंबित करून लोकशाहीची गळचेपी करण्यात आली आहे. ही अवस्था आणीबाणीपेक्षाही गंभीर आहे. सध्या राज्यात भूमिगत आणीबाणीचाच अनुभव येतो आहे. भाजपच्या सध्याच्या कारभारावरही बच्चू कडूंनी थेट आरोप केले. त्यांनी म्हटले की, भाजप सध्या ईडीच्या माध्यमातून राजकारण करते आहे. रामराज्याची केवळ कल्पना सादर करत आहे. प्रत्यक्षात लोकांच्या समस्या दुर्लक्षित केल्या जात आहेत.
कर्जमाफीच्या मुद्यावर बच्चू कडूंनी ठाम भूमिका घेतली आहे. त्यांनी सांगितले की 3 जुलै रोजी या मुद्द्यावर बैठक होणार आहे. त्यात महसूल मंत्री चंद्रशेखर बावनकुळे काय निर्णय घेतात, हे पाहणे महत्त्वाचे ठरेल. कर्जमाफी निवडणुकीपूर्वी होते की नंतर, हे जनतेच्या लक्षात राहील. शेवटी बच्चू कडूंनी राज्य सरकारला इशारा दिला की, जर शेतकऱ्यांना कर्जमाफी मिळाली नाही, तर त्याचे गंभीर परिणाम भाजपला भोगावे लागतील. केवळ शहरातीलच नव्हे तर ग्रामीण भागातील मतदारही नाराज होतील. त्याचा भाजपला जबरदस्त राजकीय झटका बसणार, यात शंका नाही.
राज्य सरकारच्या निर्णयामुळे शेतकरी पुन्हा एकदा रस्त्यावर येण्यास भाग पडले आहेत. शक्तिपीठ महामार्गामुळे होणारे संभाव्य विस्थापन, भूसंपादनातील अन्यायकारक प्रक्रिया आणि शेतकऱ्यांच्या प्रश्नांकडे होणारे दुर्लक्ष यामुळे जनतेत अस्वस्थता वाढत आहे. बच्चू कडूंच्या या परखड भाषणामुळे आंदोलनाला नवी धार मिळाली आहे. राजकीय आणि सामाजिक स्तरावर आता या प्रकल्पाविरोधात एकजूट होण्याची गरज निर्माण झाली आहे.
