भंडारा जिल्ह्यातील भ्रष्टाचाराच्या विरोधात माजी मंत्री आमदार डॉ. परिणय फुके यांनी आघाडी उघडली आहे. आता याप्रकरणांची चौकशी होणार आहे.
भंडारा जिल्ह्यातील दोन नगर परिषद सध्या चर्चेत आहेत. भंडारा आणि पवनी ही त्या दोन नगर परिषदेची नावं आहेत. अलीकडेच भंडारा नगर परिषदेचे मुख्याधिकारी करण चव्हाण यांनी एका प्रकरणात बदली करण्यात आली. त्यांच्यासह पवनीच्या मुख्याधिकाऱ्यांची देखील चौकशी सुरू आहे. माजी मंत्री आमदार डॉ. परिणय फुके यांनी या दोन्ही नगर परिषदेतील भ्रष्टाचाराकडे सरकारचे लक्ष वेधले होते. त्यानंतर पालकमंत्र्यांनी याची गंभीर दखल घेतली. भंडाऱ्याच्या जिल्हाधिकाऱ्यांनी भंडारा आणि पवनीच्या मुख्याधिकाऱ्यांना कारणे दाखवा नोटीस बजावली.
भ्रष्टाचाराचे माखलेल्या या दोन्ही अधिकाऱ्यांवर सध्या निलंबनाची टांगती तलवार आहे. भंडारा नगर परिषदेतील याच भ्रष्टाचाराबाबत शिवसेना उद्धव बाळासाहेब ठाकरे पक्षाचे जिल्हा प्रमुख संजय रेहपाडे यांनी तक्रार केली होती. रेहपाडे यांनी मुख्यमंत्री देवेंद्र फडणवीस यांना ही तक्रार पाठवली होती. त्यानंतर 15 नोव्हेंबर 2025 रोजी आमदार डॉ. फुके यांनी याप्रकरणी मुख्यमंत्री देवेंद्र फडणवीस यांना पत्र लिहिले आहे.
कोट्यवधींचा भ्रष्टाचार
डॉ. परिणय फुके यांनीही रेहपाडे यांच्या पत्राचा आधार घेत मुख्यमंत्र्यांना याप्रकरणी चौकशीची मागणी केली आहे. आमदार डॉ. फुके यांचा शब्द मुख्यमंत्री फडणवीस कधीच खाली जाऊ देत नाहीत. अशात त्यांच्या दोन पानी पत्राची मुख्यमंत्र्यांनी तातडीने दखल घेतली आहे. भंडाऱ्यात झालेल्या या भ्रष्टाचाराच्या चौकशीचे आदेश मुख्यमंत्र्यांनी जिल्हाधिकाऱ्यांना दिले आहेत. जलपर्यटनाच्या कामात झालेला हा गोलमाल आहे. आता डॉ. फुके यांच्या पत्राची दखल मुख्यमंत्र्यांनी घेतल्याने जलपर्यटनाच्या कामात भ्रष्टाचाराचे पाणी कुठून आणि कसे वाहिले, याचा सखोल तपास होणार आहे.
आर्या कन्स्ट्रक्शन, श्रेयन इन्फ्रास्ट्रक्चर या दोन कंपन्यांनी संगनमत करून कोट्यवधी रुपयांचा घोळ केल्याचा आरोप या पत्रात आहे. दलित वस्ती व नागरी सुविधा-सेवा निधीत कसा भ्रष्टाचार झाला. याकडं डॉ. फुके यांनी मुख्यमंत्र्यांचं लक्ष वेधलं आहे. आता याप्रकरणी चौकशी सुरू झाल्यानंतर दोषी अधिकारी घाम फुटून ओले होईपर्यंतचा सगळाच व्यवहार बाहेर निघणार आहे. विशेष: म्हणजे हा संपूर्ण भ्रष्टाचार तत्कालीन मुख्याधिकारी करण चव्हाण यांच्याच कार्यकाळात झाल्याचा आरोप आहे. त्यामुळं करण यांना भ्रष्टाचाराची खरी ‘धनुर्विद्या’ शिकविणारा अर्जुन कोण? याचा शोध आता लागणार असल्याचं सांगण्यात येत आहे. भ्रष्टाचार करताना सगळेच ‘हम साथ साथ है’ असे चित्र होते. मात्र आता चौकशी सुरू झाल्यानंतर करण चव्हाण यांना सगळेच ‘हम आपके है कौन?’ म्हणत आहेत.
Bhandara Municipal Council : अखेर करण चव्हाण यांची भंडारातून बदली
‘पिंजरे में डाल दो’
रुपेरी पडद्यावर अनिल कपूरचा नायक हा चित्रपट गाजला होता. त्यात मुख्यमंत्री असलेला अनिल कपूर आपल्या पीए असलेल्या परेश रावल यांना प्रश्न विचारतो. ‘इन सबको ये धांदलबाजी करने ही हिंमत आती कहाँ से है.’ पीए अनिल कपूरला योग्य काय ते उत्तर देतो. त्यानंतर अनिल कपूर पुन्हा विचारतो. ‘इन सब बागडबिल्लो का क्या करना चाहिए?’ पीए सांगतो, ‘पिंजरे में डाल देना चाहिए.’ असाच संवाद तक्रार करताना मुख्यमंत्री देवेंद्र फडणवीस आणि आमदार डॉ. परिणय फुके यांच्या झाल्याची माहिती आहे. त्यानंतर मुख्यमंत्र्यांनी डॉ. फुके यांच्यासमोर संबंधित अधिकाऱ्यांना ‘पिंजरे में डाल दो’ से आदेश दिले आहेत. त्यामुळे भ्रष्टाचाराच्या आकाशात आतापर्यंत गरूडझेप घेणाऱ्या अधिकाऱ्यांची अवस्था आता ‘कैद में है बुलबुल’ सारखी होण्याची दाट शक्यता आहे.
