काँग्रेसने महाराष्ट्र आणि इतर राज्यांतील विधानसभा निवडणुकीतील कथित गैरप्रकारांची चौकशी करण्यासाठी ‘ईगल ग्रुप’ समिती स्थापन केली आहे.
महाराष्ट्र विधानसभा निवडणुकीतील पराभव आणि मतदार यादीतील अनियमिततेसाठी काँग्रेसने ‘ईगल ग्रुप’ नावाची समिती स्थापन केली आहे. ही समिती देशभरातील विविध विधानसभा निवडणुकीतील अपयश आणि निवडणूक प्रक्रियेसंदर्भातील गैरप्रकारांची तपासणी करणार आहे. समितीमध्ये नागपूर काँग्रेसचे ज्येष्ठ नेते डॉ. नितीन राऊत, मध्य प्रदेशचे माजी मुख्यमंत्री दिग्विजय सिंह, अजय माकन, अभिषेक मनु सिंघवी, पवन खेडा, प्रवीण चक्रवर्ती, गुरदीप सिंग सप्पल, सी.व्ही. चंद रेड्डी यांचा समावेश आहे. काँग्रेस अध्यक्ष मल्लिकार्जुन खर्गे यांच्या मार्गदर्शनाखाली या समितीला कार्यभार देण्यात आले आहे. समिती लवकरच महाराष्ट्र आणि इतर राज्यांतील निवडणूक प्रक्रियेत झालेल्या अनियमिततांची सविस्तर चौकशी करून अहवाल सादर करणार आहे. या समितीला सर्वप्रथम महाराष्ट्राच्या मतदार यादीतील फेरफारांचा तपास करण्याची जबाबदारी सोपवली आहे.
समितीच्या कामाची सुरुवात 10 फेब्रुवारीपासून होणार आहे, आणि ती दिल्लीतून देखरेख केली जाणार आहे. या समितीने जिल्हा आणि विधानसभा मतदारसंघस्तरावर मतदार व मतदानाची माहिती संकलित करण्याचा निर्णय घेतला आहे. याशिवाय, विविध ठिकाणच्या मतदानात आलेल्या शंकेवर देखरेख ठेवून सविस्तर अहवाल तयार केला जाईल. काँग्रेसने ईव्हीएमवरील प्रश्न उपस्थित केले होते, आणि त्या संदर्भात न्यायालयात याचिका दाखल केली आहे. यावेळी काँग्रेसने निवडणूक आयोगाच्या कार्यपद्धतीवर शंका व्यक्त केली होती.
काँग्रेसचे सरचिटणीस के.सी. वेणुगोपाल यांनी स्पष्ट केले की, समिती पहिल्यांदा महाराष्ट्रातील मतदार यादीतील फेरफारांचा तपास करेल. त्यानंतर, आगामी निवडणुकींसाठी आवश्यक उपाययोजना आणि योजना तयार करण्यावर ती लक्ष केंद्रित करेल.
विचारपूर्वक नामकरण
काँग्रेसने सांगितले की, या समितीला ‘ईगल’ असे नाव देण्यात आले आहे. कारण ईगल म्हणजे उंचावरून चौकशी करणारा पक्ष, जो संपूर्ण देशातील निवडणुकांच्या प्रक्रियेवर बारकाईने लक्ष ठेवणार आहे. ऑल इंडिया प्रोफेशनल्स काँग्रेसचे प्रमुख प्रवीण चक्रवर्ती यांनी हे नाव सुचविले, आणि वरिष्ठ नेतृत्वाने त्यावर शिक्कामोर्तब केले. काँग्रेसने यापूर्वीही राज्यांमधील निवडणुकीतील अनियमिततेवर प्रश्न उपस्थित केले होते, विशेषत: हरियाणा आणि महाराष्ट्रातील मतदार यादीवरील फेरफार आणि ईव्हीएममधील फेरफारांवर.
काँग्रेसने यापूर्वी हरियाणा विधानसभा निवडणुकीतील पराभवानंतर ईव्हीएम मध्ये फेरफार झाल्याचा आरोप केला होता. काँग्रेसचे नेते सातत्याने म्हणत होते की, भाजपाने निवडणुकीत आपले षडयंत्र रचले आहे, आणि त्यामुळेच ते विजय मिळवू शकले. याशिवाय, महाराष्ट्रातील विधानसभा निवडणुकीत मतदारांची संख्या अचानक 13 टक्क्यांनी कशी वाढली, या प्रश्नावर देखील काँग्रेसने गंभीर शंका उपस्थित केली आहे. काँग्रेसच्या नेत्यांनी निवडणूक आयोगाला पत्र लिहून मागणी केली होती की, राज्यातील 39 लाख मतदारांची कच्ची माहिती प्रदान केली जावी. त्याच्या विरोधात तर्कही देण्यात आले, की या वाढीचा काही ना काही संदिग्ध कारण असावा. काँग्रेसने दावा केला की, यावर विश्वास ठेवता येईलच असे नाही, कारण त्यानुसार मतदारांची संख्या अनपेक्षितपणे वाढली आहे.
