राज्याच्या राजकारणात पुन्हा एकदा समविचारी पक्षांच्या एकत्र येण्याची चाहूल लागली आहे. आगामी स्थानिक स्वराज्य निवडणुकीच्या पार्श्वभूमीवर मातोश्रीवर झालेली ही महत्त्वपूर्ण भेट नवे राजकीय समीकरण घडवू शकते.
राज्यातील आगामी स्थानिक स्वराज्य संस्थांच्या निवडणुकीची रणधुमाळी जवळ येताना दिसत आहे आणि त्याच पार्श्वभूमीवर महाराष्ट्राच्या राजकारणात महत्त्वपूर्ण हालचाली सुरु झाल्या आहेत. महाराष्ट्राच्या राजकीय पटावर एकत्र येण्याचा प्रयत्न करणाऱ्या समविचारी पक्षांमध्ये संवादाचा सूर जुळवला जात आहे. काँग्रेसचे प्रदेशाध्यक्ष हर्षवर्धन सपकाळ यांनी शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांची त्यांच्या ‘मातोश्री’ निवासस्थानी भेट घेतली. ही भेट केवळ एक औपचारिकता नसून, महाराष्ट्राच्या भवितव्याबाबत गंभीर चिंतन आणि राजकीय दिशा ठरवण्यासाठी एक महत्त्वपूर्ण पाऊल मानले जात आहे.
सपकाळ यांनी याआधी राष्ट्रवादी काँग्रेस शरदचंद्र पवार गटाचे नेते शरद पवार यांचीही त्यांच्या निवासस्थानी भेट घेतली होती. या दोन प्रमुख भेटींमुळे आगामी महाविकास आघाडीच्या संभाव्य रणनितीचा अंदाज बांधला जात आहे. स्थानिक स्वराज्य संस्थांच्या निवडणुकीमध्ये या तिन्ही पक्षांचा समन्वय होईल का, याकडे राज्याचे लक्ष लागले आहे. हर्षवर्धन सपकाळ यांनी प्रसार माध्यमांशी बोलताना स्पष्टपणे सांगितले की, आज महाराष्ट्र धर्माच्या मूलभूत तत्वांना मोठे आव्हान भाजपच्या माध्यमातून निर्माण झाले आहे. ही केवळ निवडणूक नाही, तर महाराष्ट्राच्या अस्मितेचा लढा आहे. त्यांनी पुढे सांगितले की, महाराष्ट्र धर्म जगला तरच देश जागेल, ही आपल्या संस्कृतीची ओळख आहे. त्या ओळखीचे रक्षण करण्यासाठी आम्ही एकत्र आलो आहोत.
भेट ठरतेय महत्त्वाची
या भेटीत निवडणूकपूर्व युती, मतदारसंघनिहाय समन्वय आणि राजकीय भूमिका यावर सखोल चर्चा झाली असल्याचे संकेत सपकाळ यांनी दिले. संवाद सकारात्मक राहिला असून, भविष्यात एकत्र लढण्याचा मार्ग सुकर व्हावा यासाठी ही भेट महत्त्वाची ठरली आहे. राज्यभरातील स्थानिक स्वराज्य संस्थांच्या निवडणुकीमध्ये महाविकास आघाडी एकत्र येण्याची शक्यता वर्तवली जात आहे. परंतु त्यातही मुंबई महानगरपालिका ही सर्वात महत्त्वाची निवडणूक मानली जात आहे. मुंबई ही केवळ आर्थिक राजधानी नाही, तर ती महाराष्ट्राच्या राजकारणाचा केंद्रबिंदू आहे. त्यामुळे इथे महाविकास आघाडी एकत्र लढणार का? हा प्रश्न अधिकच महत्त्वाचा ठरतो.
अधिक बळकट
सध्या महाविकास आघाडीतील तिन्ही पक्ष काँग्रेस, राष्ट्रवादी (शरद पवार गट) आणि शिवसेना (उद्धव बाळासाहेब ठाकरे) एकत्र येण्याच्या भूमिकेवर ठाम असल्याचे चित्र दिसत आहे. मात्र, काही जिल्ह्यांमध्ये स्थानिक पातळीवरील राजकीय गणितामुळे स्वतंत्र निर्णय होऊ शकतात. सपकाळ यांनी स्पष्ट केले की, ही संघर्षाची वेळ आहे. महाराष्ट्र धर्मावर आलेल्या संकटाचा सामना करण्यासाठी आम्हाला एकत्र राहावे लागेल. हा लढा मतांसाठी नाही, तर मूल्यांसाठी आहे. अशा पद्धतीचे विधान करून त्यांनी आगामी काळात युती अधिक बळकट होणार असल्याचे स्पष्ट केले आहे.
आगामी काळात राजकीय भूकंप?
या भेटींमुळे राज्यातील राजकारणात मोठा भूकंप घडण्याची शक्यता व्यक्त केली जात आहे. भाजप विरोधात महाविकास आघाडीचा नवा आक्रमक अवतार समोर येतो आहे का? एकत्र येऊन सत्ता राखण्याची आणि महाराष्ट्राच्या सामाजिक-राजकीय समतोलाचे रक्षण करण्याची भूमिका घेतली जाईल का? हे सारे प्रश्न राज्याच्या राजकारणात नवे वळण देणारे ठरू शकतात. आगामी काळात या राजकीय हालचाली अधिक वेग घेतील. आणि त्यातूनच स्पष्ट होईल की, मुंबई महानगरपालिका निवडणूक आणि इतर स्थानिक स्वराज्य संस्थांमध्ये महाविकास आघाडीचा झेंडा पुन्हा एकदा फडकतो की नाही. तोपर्यंत, महाराष्ट्राचे राजकारण हा एक धगधगता मुद्दा बनून राहणार, यात शंका नाही.
