काँग्रेस नेत्या सोनिया गांधी यांची प्रकृती अचानक खालावल्याने त्यांना तातडीने शिमलातील आयजीएमसी रुग्णालयात दाखल करण्यात आले आहे. सध्या डॉक्टरांची टीम त्यांच्यावर उपचार करत आहे.
काँग्रेसच्या ज्येष्ठ नेत्या सोनिया गांधी यांची प्रकृती अचानक खालावल्याने त्यांना हिमाचल प्रदेशातील शिमला येथील आयजीएमसी (IGMC) रुग्णालयात दाखल करण्यात आले आहे. डॉक्टरांची विशेष टीम त्यांच्या ईसीजी, एमआरआय व इतर वैद्यकीय तपासण्या करत असून उपचार सुरू आहेत.
सोनिया गांधी शिमला येथे 2 जूनपासून त्यांच्या कन्या प्रियंका गांधींसोबत त्यांच्या छराबरा येथील फार्महाऊसवर मुक्कामाला होत्या. विश्रांतीसाठी आलेल्या या दौऱ्यात प्रकृती बिघडल्याने त्यांना तातडीने रुग्णालयात हलविण्यात आले. मुख्यमंत्री सुखविंदर सिंग सुखू यांनी देखील त्यांच्या प्रकृतीची माहिती मिळताच उना जिल्ह्याचा दौरा रद्द करून शिमलाकडे प्रस्थान केले आहे.
Ramesh Chennithala : उत्सव होता विधानसभेचा, खून झाला लोकशाहीचा
आरोग्याचा इतिहास चर्चेत
छराबरा हे शिमलापासून अवघ्या 13 किलोमीटरवर वसलेले शांत, हिरवेगार डोंगराळ गाव. याठिकाणी प्रियंका गांधी यांचे एक भव्य फार्महाऊस आहे. देवदाराच्या लाकडाने सजवलेले, हिमालयाच्या बर्फाच्छादित शिखरांकडे तोंड करून उभे असलेले हे फार्महाऊस गांधी कुटुंबासाठी एक निवांत आश्रयस्थान आहे. दरवर्षी उन्हाळी सुट्ट्यांमध्ये सोनिया गांधी, राहुल गांधी आणि प्रियंका येथे येतात आणि काही आठवडे येथे विश्रांती घेतात. यंदाही त्याच उद्देशाने सोनिया गांधी शिमलाला आल्या होत्या. मात्र, प्रवासाच्या काही दिवसांतच त्यांची प्रकृती खालावल्याने संपूर्ण वातावरणात चिंतेचे सावट पसरले आहे.
सोनिया गांधी यांना यापूर्वीही आरोग्यविषयक समस्या भेडसावत आहेत. मार्च 2024 मध्ये त्यांना ताप आणि अशक्तपणा जाणवल्याने दिल्लीतील गंगाराम रुग्णालयात दाखल करण्यात आले होते. त्यावेळीही डॉ. डी.एस. राणा यांच्या देखरेखीखाली त्यांच्यावर उपचार करण्यात आले होते. त्याआधी जानेवारी महिन्यात देखील व्हायरल इन्फेक्शनमुळे त्यांना रुग्णालयात भरती करावे लागले होते. सध्या 78 वर्षांच्या असलेल्या सोनिया गांधी यांना वाढत्या वयानुसार वैद्यकीय देखरेख आवश्यक आहे. त्यामुळे त्यांची प्रकृती बिघडल्यावर तत्काळ उपचार सुरू करण्यात आले. काँग्रेस पक्षाकडून त्यांच्या आरोग्यावर सतत लक्ष ठेवले जाते. प्रियंका गांधी वाड्रा आणि राहुल गांधी ही दोघेही प्रत्येक वेळी त्यांच्या आजारपणात वैयक्तिकरीत्या उपस्थित राहतात.
अमेरिकेतील वैद्यकीय उपचार
सोनिया गांधी यांच्यावर 2011 मध्ये प्रथमच अमेरिकेत उपचार करण्यात आले होते. त्या वेळी त्यांच्या आजाराची माहिती अधिकृतरीत्या दिली गेली नव्हती. त्यानंतर 2012, 2013, 2016 आणि 2022 मध्ये देखील त्या नियमित तपासणीसाठी न्यूयॉर्कला गेल्या होत्या. याबाबत काँग्रेसकडून गोपनीयतेचे धोरण ठेवण्यात आले होते. तरीही, देशात व पक्षात त्यांच्या आरोग्याबाबत सतत चर्चा सुरू राहिली. सोनिया गांधी यांनी 27 मे 2025 रोजी पंडित जवाहरलाल नेहरू यांच्या 61 व्या पुण्यतिथीनिमित्त शांतीवन स्मारकस्थळी पुष्पांजली अर्पण केली होती. ही त्यांची अलीकडील सार्वजनिक उपस्थिती ठरली. त्यानंतर काही दिवसांत त्या शिमलामध्ये विश्रांतीसाठी पोहोचल्या होत्या. मात्र, सध्या पुन्हा त्यांची प्रकृती ढासळल्याने देशभरातून चिंता व्यक्त केली जात आहे.
सोनिया गांधी यांचे राजकीय योगदान आणि पक्षासाठी दिलेली दीर्घकाळ सेवा लक्षात घेता, त्यांच्या प्रकृतीसंदर्भात पक्षातील नेते आणि कार्यकर्त्यांमध्ये भावनिक ओढ आहे. काँग्रेस पक्षाच्या प्रमुख नेत्या म्हणून त्यांची भूमिका महत्त्वाची ठरली आहे. त्यामुळे त्यांच्या प्रकृतीची खबरदारी घेण्यासाठी पक्ष नेहमी तत्पर असतो. शिमलातील सध्याच्या घडामोडींवर संपूर्ण देशाचे लक्ष केंद्रित झाले आहे. सोनिया गांधी यांच्या प्रकृतीत लवकर सुधारणा व्हावी, अशी प्रार्थना अनेक समर्थक आणि सहानुभूतीदर्शक करत आहेत. त्यांच्या शिमला दौर्‍याचा उद्देश केवळ विश्रांती होता, मात्र निसर्गाच्या सान्निध्यातही त्यांची तब्येत बिघडल्यामुळे ही विश्रांती काळजीच्या सावलीत अडकली आहे.
