छत्रपती शिवाजी महाराजांच्या जयंती निमित्त राहुल गांधी यांनी ट्विटरवर ट्विट करत श्रद्धांजली वाहिली. त्यानंतर भाजपच्या नेत्यांनी गांधींना धारेवर धरले. आता काँग्रेस नेते विजय वडेट्टीवार यांनी पंतप्रधानांच्या एका ट्विटचा दाखला देत भाजपवर पलटवार केला.
छत्रपती शिवाजी महाराज यांच्या जयंतीनिमित्त विविध स्तरांवर त्यांना अभिवादन करण्यात आले. मात्र यात श्रद्धांजलीवरून आता राज्यात राजकीय वातावरण तापले आहे. काँग्रेसचे वरिष्ठ नेते राहुल गांधी यांनी सोशल मीडियावर महाराजांना श्रद्धांजली वाहिल्यानंतर भाजप व शिंदे गटाने काँग्रेसवर जोरदार हल्लाबोल केला. यानंतर काँग्रेसनेही आक्रमक पवित्रा घेत पलटवार केला आहे. यामुळे हा वाद अधिकच चिघळला आहे.
राहुल गांधी यांनी छत्रपती शिवाजी महाराजांना श्रद्धांजली वाहिली, मात्र त्यांनी ‘श्रद्धांजली’ हा शब्द वापरल्याने त्यावरूनच वाद निर्माण झाला. सत्ताधारी भाजप आणि शिंदे गटाने यावर तिखट प्रतिक्रिया देत काँग्रेसवर टीका केली. शिंदे गटाचे आमदार निलेश राणे यांनी राहुल गांधींवर थेट आरोप करत त्यांना भारतीय संस्कृतीचा अजिबात गंध नसल्याचे म्हटले.
बिघडलं मानसिक संतुलन
निलेश राणे म्हणाले, “राहुल गांधी यांचं मानसिक संतुलन बिघडलं आहे. ते चीनमध्ये असल्यासारखं वक्तव्य करतात. परदेशात गेले, तरी भारताची बदनामीच करतात. ते भारतीय नाहीत, केवळ त्यांच्याकडे भारतीय पासपोर्ट आहे. त्यांना आपली संस्कृती कळत नाही. त्यांना जयंती आणि श्रद्धांजली यामधला फरक समजत नाही.
छत्रपती शिवाजी महाराजांचा अपमान केल्यामुळे काँग्रेसने माफी मागितली पाहिजे, असे निलेश राणे म्हणाले. यावर आणखी एक पाऊल पुढे जात भाजप नेत्यांनीही राहुल गांधी आणि काँग्रेसला लक्ष्य करत त्यांना इतिहास आणि संस्कृतीची जाण नसल्याचा आरोप केला.
जोरदार पलटवार
भाजपच्या या टीकेनंतर काँग्रेसनेही आक्रमक भूमिका घेत भाजपवर निशाणा साधला. काँग्रेसचे नेते विजय वडेट्टीवार यांनी भाजपवर पलटवार करत पंतप्रधान नरेंद्र मोदी यांच्याच एका जुन्या ट्विटचा दाखला दिला.
वडेट्टीवार म्हणाले, “राहुल गांधी यांच्या ट्विटवरून भाजपकडून करण्यात आलेली टीका म्हणजे दुटप्पीपणा आहे. कारण पंतप्रधान नरेंद्र मोदी यांनीही महात्मा गांधी यांच्या जयंतीदिनी त्यांना ‘श्रद्धांजली’ वाहिली होती. त्यांच्या अधिकृत ट्विटर हँडलवर तसा उल्लेख आहे. त्यामुळे भाजप केवळ राहुल गांधी यांची बदनामी करत आहे.”
वाद वाढण्याची शक्यता
काँग्रेसच्या या प्रत्युत्तरानंतर भाजप काय भूमिका घेणार, हे पाहणे महत्त्वाचे ठरणार आहे. भाजपने पुन्हा नव्या आरोपांसह काँग्रेसवर निशाणा साधल्यास हा वाद आणखी चिघळण्याची शक्यता आहे. छत्रपती शिवाजी महाराज हे संपूर्ण देशासाठी प्रेरणास्थान आहेत, मात्र त्यांच्या नावावरून राजकीय पक्षांनी एकमेकांवर आरोप-प्रत्यारोप सुरू केल्याने जनता मात्र यावर नाराजी व्यक्त करताना दिसत आहे. आता हा वाद कुठवर जाऊन पोहोचतो आणि यावर कोणती अंतिम प्रतिक्रिया येते, याकडे संपूर्ण राज्याचे लक्ष लागले आहे.
