दर्यापुरसाठी शिक्षणाच्या दिशेने एक दिलासादायक पाऊल उचलले गेले आहे.येथे शासकीय ग्रंथालय व अभियांत्रिकी महाविद्यालय स्थापनेची प्रक्रिया सुरू झाली आहे.
दर्यापुरसारख्या ग्रामीण भागातील विद्यार्थ्यांसाठी एक दिलासादायक बातमी पुढे आली आहे. अनेक वर्षांपासून रखडलेली मागणी अखेर मार्गी लागण्याच्या दिशेने वाटचाल करत आहे. दर्यापुरात शासकीय ग्रंथालय व अभियांत्रिकी महाविद्यालय स्थापन व्हावे, या मागणीची दखल राज्यमंत्री इंद्रनिल नाईक यांनी घेतली आहे. त्यांच्या सकारात्मक प्रतिसादामुळे शैक्षणिक क्षेत्रात मोठ्या बदलाची नांदी घडणार असल्याचे संकेत मिळत आहेत.
राज्यमंत्री इंद्रनील नाईक यांच्या जिल्हा दौऱ्यात राष्ट्रवादी काँग्रेसच्या स्थानिक पदाधिकाऱ्यांनी या दोन्ही शैक्षणिक संस्थांसाठी निवेदन दिले होते. या निवेदनाची गांभीर्याने दखल घेत, संबंधित विभागाच्या अधिकाऱ्यांनी दर्यापुरात प्रत्यक्ष भेट देत प्रस्तावित जागेची पाहणी केली आहे.
विद्यार्थ्यांच्या भविष्याला दिशा
शासकीय अभियांत्रिकी महाविद्यालयाचे प्राचार्य डॉ. आशिष महल्ले आणि प्रा. गोपाल भुतडा यांनी बंद पडलेल्या सुतगिरणीच्या इमारतीचा आढावा घेतला. ही जागा शासकीय ग्रंथालय व अभियांत्रिकी महाविद्यालयासाठी अत्यंत उपयुक्त ठरू शकते, अशी प्राथमिक समजूत वर्तवली जात आहे. संबंधित अधिकाऱ्यांनी स्थानिक पदाधिकाऱ्यांशी चर्चा करून अहवाल लवकरच मंत्रालयात सादर करण्याचे संकेत दिले आहेत. त्यामुळे प्रशासकीय हालचालींना वेग आला आहे. शैक्षणिक पायाभूत सुविधांची उभारणी लवकरच सुरू होण्याची शक्यता आहे.
दर्यापुरसारख्या तालुक्याच्या शैक्षणिक प्रगतीसाठी राष्ट्रवादी काँग्रेसने घेतलेली ही पुढाकाराची भूमिका कौतुकास्पद ठरत आहे. गरजू, ग्रामीण आणि मागास विद्यार्थ्यांना उच्च शिक्षणाच्या संधी उपलब्ध करून देणे हेच या मागणीमागील मुख्य उद्दिष्ट असल्याचे तालुकाध्यक्षांनी स्पष्ट केले. दर्यापुरात शासकीय शिक्षणसंस्था स्थापन झाल्यास परिसरातील शैक्षणिक आणि सामाजिक विकासात मोठी क्रांती घडणार आहे. यामुळे स्थानिक तरुणांना शिक्षणासाठी बाहेरगावी जावे लागणार नाही. शिक्षण, ग्रंथालय आणि कौशल्य विकासाच्या माध्यमातून या भागात नवचैतन्य निर्माण होण्याची शक्यता आहे.
कार्यकर्ते एकदिलाने मैदानात
राष्ट्रवादी काँग्रेसचे शहराध्यक्ष अमोल गहरवाल, कपिल पोटे, नितीन गावंडे, किरण अरबट आदी पदाधिकारी देखील उपस्थित होते. त्यांची उपस्थिती आणि पुढाकारातून स्थानिक जनतेच्या आशा आकांक्षा शासनदरबारी पोहचल्याचे स्पष्ट दिसते. शिक्षणाचा विस्तार सामाजिक बांधिलकीची जाणीव असलेल्या नेत्यांनी उचललेली जबाबदारी असल्याचे या कृतीतून दिसून येते.
दर्यापुरात शासकीय ग्रंथालय आणि अभियांत्रिकी महाविद्यालयाची उभारणी केवळ एक शैक्षणिक पाऊल न राहता, संपूर्ण परिसराच्या प्रगतीचे दार उघडणारा टप्पा ठरणार आहे. ग्रामीण महाराष्ट्राच्या शैक्षणिक नकाशावर दर्यापुर हे नाव ठळकपणे उमटावे, यासाठी आता लोकप्रतिनिधींपासून ते सामान्य जनतेपर्यंत सर्वच स्तरावरून आशावाद व्यक्त होत आहे.
