भाजपच्या चिखलीच्या आमदार श्वेता महाले यांना अज्ञात व्यक्तीकडून जीवे मारण्याची धमकी मिळाली आहे.
राज्याचे उपमुख्यमंत्री एकनाथ शिंदे यांना ई-मेलद्वारे जीवे मारण्याची धमकी देणाऱ्या दोघा आरोपींना अटक करण्यात आली असतानाच, भाजपच्या चिखलीच्या आमदार श्वेता महाले यांनाही जीवे मारण्याची धमकी मिळाली आहे. ही दोन मोठी धमकीची प्रकरणं एकाच जिल्ह्यातून समोर आल्याने महाराष्ट्राच्या राजकारणात मोठी खळबळ उडाली आहे. हा योगायोग आहे की यामागे कोणते तरी राजकीय कटकारस्थान आहे, हा प्रश्न आता उपस्थित होत आहे.
बुलढाणा जिल्ह्य़ातील भाजपच्या चिखलीच्या आमदार श्वेता महाले यांच्या निवासस्थानी एक अज्ञात पत्र प्राप्त झाले आहे. त्यामध्ये त्यांना जीवे मारण्याची धमकी देण्यात आली आहे. या पत्रामध्ये तुकडे तुकडे करू, सुरक्षा काहीच कामी येणार नाही, आणि इंदिरा गांधींच्या सुरक्षेनेही त्यांना वाचवले नाही असे धक्कादायक वाक्य लिहिले गेले आहेत. हे पत्र नेमके कोणी पाठवले आणि यामागचा उद्देश काय आहे, याचा तपास अजूनही सुरू आहे. महाले यांनी तक्रार नोंदवली असून, शिंदेंना मिळालेल्या धमकीनंतर लगेच हे प्रकरण समोर आल्याने राजकीय षड्यंत्राचा संशय व्यक्त केला जात आहे.
Shrikant Shinde : हजारो कुटुंबांचे ‘कल्याण’ करण्यासाठी खासदार न्याय मंदिरात
प्रशासन शांत
श्वेता महाले यांची आमदारकीची ही दुसरी टर्म आहे. त्यांचे पती विद्याधर महाले हे प्रशासकीय सेवेत उच्चपदस्थ अधिकारी आहेत. त्यामुळे, एका प्रभावी महिला नेत्या आणि प्रशासकीय अधिकाऱ्याच्या पत्नीला अशा प्रकारची धमकी मिळणे ही धक्कादायक बाब आहे. मात्र, प्रशासनाच्या भूमिकेवर प्रश्नचिन्ह निर्माण होत आहे.
आजवर महाराष्ट्रात राजकीय नेत्यांना मिळणाऱ्या धमक्यांची अनेक उदाहरणे आहेत, पण यावेळी भाजपच्या एका महिला आमदारावर थेट निशाणा साधला जात आहे. महाराष्ट्रात सुरक्षिततेचा प्रश्न गंभीर बनत चालला आहे का? हा खरा प्रश्न आता उपस्थित होत आहे. धमकी नेमकी कोणत्या कारणाने आली, याचे स्पष्ट कारण अद्याप समोर आलेले नाही.
शिंदेंनाही ईमेल
उपमुख्यमंत्री एकनाथ शिंदे यांनी या धमक्यांना काहीही महत्त्व देण्याचे नाकारले आहे. अशा फुकटच्या धमक्या आम्हाला घाबरवू शकत नाहीत, असे त्यांनी स्पष्ट केले. त्याचबरोबर गृहखात्याने हे प्रकरण गांभीर्याने घेतले असून धमकी देणाऱ्यांचा शोध घेण्यात येत आहे.
एकनाथ शिंदे यांना याआधीही धमक्या आल्या होत्या. गडचिरोलीचे पालकमंत्री असताना त्यांना धमक्या मिळाल्या होत्या, पण त्यांनी त्याकडे फारसे लक्ष दिले नाही. मात्र, आता भाजपच्या एका महिला आमदाराला थेट धमकी मिळाल्याने हा मुद्दा अधिक संवेदनशील बनला आहे.
Mahayuti सरकारच्या नेतृत्वाखाली महिला सशक्तीकरणाची ऐतिहासिक वाटचाल
योगायोग की षड्यंत्र
एकनाथ शिंदेंना धमकी आणि लगेच श्वेता महाले यांना धमकी मिळणे हा फक्त एक योगायोग आहे का? की कुणीतरी भाजपच्या नेत्यांना टार्गेट करत आहे? यावर वेगवेगळ्या स्तरांतून चर्चा सुरू आहे.
महाराष्ट्राच्या राजकारणात अशा धमक्या मिळणे नवीन नाही, पण एकाच जिल्ह्यात, काही तासांच्या अंतराने दोन भाजप नेत्यांना धमक्या मिळणे हे निश्चितच संशयास्पद आहे. या प्रकरणात विरोधकांचा हात आहे का, की कुणी सरकार अस्थिर करण्याचा प्रयत्न करत आहे? याचे उत्तर लवकरच मिळेल, पण सध्या तरी महाराष्ट्राचे राजकारण या घटनांमुळे चांगलेच तापले आहे.
