नागपूर जिल्ह्यातील विमानतळाचा विकास वेगाने सुरू आहे. विमानतळाच्या धावपट्टीचे काम लवकरच पूर्ण होण्याची शक्यता आहे. एमआरओ आणि प्रशिक्षण केंद्राच्या माध्यमातून वैमानिक प्रशिक्षण वाढणार आहे.
नागपूरातील डॉ. बाबासाहेब आंबेडकर आंतरराष्ट्रीय विमानतळाच्या धावपट्टीच्या पुनर्रचना आणि रंगरंगोटीचे काम आता गतिमान झाले असून, पूर्ण क्षमतेने सुरू आहे. हा प्रकल्प विमानतळाच्या जागतिक दर्जाच्या उन्नतीसाठी अत्यंत महत्त्वाचा मानला जात आहे. विशेषतः व्हीआयपी उड्डाणांदरम्यान येणाऱ्या समस्यांवर मात करण्यासाठी, सुरक्षित आणि अत्याधुनिक धावपट्टीसाठी आवश्यक असलेल्या सुधारणांना प्राधान्य दिले जात आहे.
धावपट्टीच्या रंगरंगोटीचे पहिले दोन थर पूर्ण झाले आहेत. तिसऱ्या थराचे काम पुढील दोन आठवड्यांत सुरू होणार आहे. नागपूर विमानतळाच्या धावपट्टीवर नवीन स्तर जोडल्यामुळे तिचा पृष्ठभाग अधिक मजबूत आणि चमकदार दिसत आहे. भारतीय विमानतळ प्राधिकरणाने हे काम 31 मार्चपर्यंत पूर्ण करण्याचे लक्ष्य ठेवले आहे, परंतु सध्याच्या वेगाने हे काही दिवस आधीच पूर्ण होण्याची शक्यता आहे.
NCP Vs NCP : साहेबांच्या नेत्यांनी घेरले दादांच्या शिलेदारांना
विमानतळाचा विस्तार
नागपूर विमानतळाच्या विस्तारीकरणासाठी दुसरी धावपट्टी बांधण्याचा प्रस्ताव अंतिम टप्प्यात आहे. प्रस्तावित धावपट्टी चार हजार मीटर लांब आणि साठ मीटर रुंद असणार आहे. जी मोठ्या आणि आंतरराष्ट्रीय उड्डाणांसाठी अत्यंत उपयुक्त ठरणार आहे. या विस्तारामुळे मिहान परिसरात एमआरओ (Maintenance, Repair, and Overhaul) व्यवसायाला मोठी चालना मिळणार आहे. याशिवाय, नागपूर फ्लाइंग क्लबसाठी स्वतंत्र जागा आरक्षित ठेवण्यात आली आहे, ज्यामुळे वैमानिक प्रशिक्षण उपक्रम वाढतील.
नागपूर विमानतळाच्या व्यवस्थापन आणि विकासाचे कंत्राट जीएमआर (GMR) कंपनीला देण्यात आले आहे, जी भारतातील इतर प्रमुख विमानतळांचा देखील कारभार पाहते. मिहान इंडिया लिमिटेडच्या (MIL) सूत्रांनुसार, एप्रिलपर्यंत विमानतळाचा अधिकृत हस्तांतरण प्रकल्प पूर्ण होण्याची शक्यता आहे. या बदलानंतर नागपूरमधून उड्डाणांची संख्या दुप्पट करण्यावर भर दिला जाणार आहे.
संधी वाढणार
नागपूर विमानतळाच्या सुधारणांमुळे स्थानिक आणि आंतरराष्ट्रीय वाहतुकीत मोठी वाढ होणार आहे. नवीन धावपट्टी आणि जीएमआरच्या कार्यक्षम व्यवस्थापनामुळे, नागपूर हे महत्त्वाचे आंतरराष्ट्रीय विमान वाहतूक केंद्र बनू शकते. मिहानच्या वाढत्या संधींमुळे, उद्योग आणि गुंतवणुकीसाठीही हे क्षेत्र अधिक आकर्षक ठरणार आहे
या प्रकल्पामुळे नागपूरकरांना अधिक सुविधा, नवीन रोजगार आणि व्यवसायाच्या संधी मिळणार आहेत. उड्डाणांच्या संख्येत वाढ झाल्यास नागपूरच्या पर्यटन, व्यापार आणि औद्योगिक क्षेत्राला मोठा फायदा होईल. विमानतळाच्या विस्तारामुळे भविष्यात नागपूर हे भारताच्या मध्यभागी असलेले सर्वात महत्त्वाचे विमानतळ बनू शकते.
भविष्यातील उद्दिष्टे
नवीन धावपट्टी आणि उच्च दर्जाच्या सुविधांचा विकास होणार. अंतरराष्ट्रीय आणि देशांतर्गत उड्डाणे दुप्पट करणे. नवीन कंपन्यांसाठी गुंतवणुकीची संधी उपलब्ध करणे. एमआरओ आणि प्रशिक्षण केंद्राच्या माध्यमातून वैमानिक प्रशिक्षण वाढवणे, अशी नागपूर विमानतळाचे भविष्यातील उद्दिष्टे राहणार आहेत. नागपूरच्या आंतरराष्ट्रीय विमानतळाच्या या विकासामुळे शहराला नवीन ओळख मिळेल आणि ते महत्त्वाचे हवाई वाहतूक केंद्र बनेल, यात शंका नाही.
