गरिबीतही आशेचा किरण तेव्हा दिसतो, जेव्हा कोणी मदतीचा हात पुढे करतो. पुसला येथील सहा वर्षांच्या भावार्थ राऊतला नवं जीवन मिळालं ते देवेंद्र भुयार यांच्या संवेदनशील पुढाकारामुळे.
माणूस जेव्हा संकटात असतो, तेव्हा त्याला आधार हवा असतो आणि तो आधार मिळाला की संकट लहान वाटू लागते. अशीच एक हृदयस्पर्शी घटना वरुड तालुक्यात घडली आहे. जिथे केवळ सहा वर्षांचा चिमुकला भावार्थ गजानन राऊत याच्या हृदयावरील शस्त्रक्रिया यशस्वी होऊन त्याच्या जीवनात पुन्हा एकदा आशेचा किरण उजळून आला आहे. यामागे खंबीर उभे राहिले ते माजी आमदार देवेंद्र भुयार, ज्यांनी पुढाकार घेत राऊत कुटुंबाला दिलासा दिला.
पुसला (ता. वरुड) येथील राहणारे राऊत कुटुंब अत्यंत सामान्य परिस्थितीतील. त्यांच्या लाडक्या मुलाच्या हृदयात छिद्र असल्याचे निदान झाले. उपचारासाठी सुमारे तीन लाख रुपये लागणार होते. परंतु आर्थिक अडचणीमुळे ते शक्य होणे कठीण होते. या संकटात माजी आमदार देवेंद्र भुयार यांच्याशी संपर्क साधण्यात आला. नेहमीप्रमाणे त्यांनी तात्काळ मदतीचा हात पुढे केला.
यशस्वी शस्त्रक्रिया
भुयार यांनी या प्रकरणात स्वतः लक्ष घालून, मुंबईतील नामांकित एस आर सी सी चिल्ड्रन हेल्थ हॉस्पिटल, हाजी अली येथे भावार्थ राऊत याला दाखल करून दिले. या ठिकाणी तज्ज्ञ डॉक्टरांच्या टीमने आवश्यक ती सर्व तपासणी करून हृदयातील छिद्रावर अत्याधुनिक पद्धतीने यशस्वी शस्त्रक्रिया केली. विशेष म्हणजे, ही शस्त्रक्रिया पूर्णपणे मोफत करण्यात आली.
या यशस्वी उपचारानंतर भावार्थ आता पूर्णपणे ठणठणीत आहे. रुग्णालयातून सुट्टीही मिळाली आहे. यावेळी स्वतः माजी आमदार देवेंद्र भुयार यांनी रुग्णालयात जाऊन भावार्थची भेट घेतली व त्याच्या प्रकृतीबद्दल डॉक्टरांकडून सविस्तर माहिती जाणून घेतली. भावार्थच्या चेहऱ्यावर पुन्हा हास्य फुलले आणि त्याच्या आई-वडिलांच्या डोळ्यांतून अश्रू आले, हे आनंदाचे, समाधानाचे अश्रू होते.
मूलभूत सुविधा
देवेंद्र भुयार हे आपल्या मतदारसंघात केवळ एक राजकीय व्यक्तिमत्त्व नसून, ते एक संवेदनशील आणि सेवा-minded नेतृत्व आहे. शिक्षण, आरोग्य, महिला सक्षमीकरण, आणि ग्रामीण भागातील मूलभूत सुविधा यासाठी त्यांनी अनेक नावीन्यपूर्ण उपक्रम राबवले आहेत. विशेषतः गरीब, गरजू आणि वंचित वर्गासाठी ते एक आशेचा किरण ठरले आहेत.
या प्रसंगातून पुन्हा एकदा सिद्ध झाले की, माणुसकीची ओळख ही केवळ शब्दांनी नव्हे तर कृतीतून होते. भावार्थ राऊतच्या कुटुंबाने देवेंद्र भुयार यांचे आभार मानताना अशा शब्दांत प्रतिक्रिया दिली. आज आमचं बाळ हसतंय, चालतंय… हे सगळं फक्त देवेंद्र सरांमुळे शक्य झालं. अशा विधायक कार्यांनी समाजात सकारात्मक ऊर्जा निर्माण होते. देवेंद्र भुयार यांचे असे कार्य इतरांसाठी प्रेरणादायी ठरत असून, आरोग्यसेवेतील त्यांच्या योगदानामुळे मोर्शी विधानसभा मतदारसंघात एक सशक्त सामाजिक बदल घडून येत आहे.
