गडचिरोलीच्या नावाने आतापर्यंत धमक्या दिल्या जायच्या. परंतु आता हा कलंक पुसणार असल्याचं मुख्यमंत्री देवेंद्र फडणवीस यांनी सांगितलं.
गडचिरोली विकासाच्या वाटेवर आहे. यापुढं कोणत्याही कारणासाठी लोकांना गडचिरोली सोडावी लागणार नाही. आतापर्यंत गडचिरोलीवर मागासलेपणाचा कलंक होता. हा कलंक पुसण्यात येणार आहे. गडचिरोलीच्या नावाने पूर्वी बदलीची धमकी दिली जायची. आता गडचिरोली अधिकाऱ्यांना ‘पनीशमेंट’ वाटणार नाही. मुख्यमंत्री देवेंद्र फडणवीस यांनी ही ग्वाही दिली. नगर परिषद निवडणूक प्रचार सभेत ते बोलत होते.
गडचिरोलीचे निवडणूक प्रभारी आमदार बंटी भांगडिया, जिल्हाध्यक्ष रमेश भारसाकळे, माजी खासदार अशोक नेते, माजी आमदार देवराव होळी, नामदेव उसेंडी, नगराध्यक्ष पदाच्या उमेदवार प्रणोती निंभोरकर, रुपेश पुणेकर, लता सुंदरकर आदी भाजप पदाधिकारी यावेळी उपस्थित होते.
यावेळी बोलतना माजी खासदार अशोक नेते यांनी अनेक मुद्दे मांडले. स्थानिक स्वराज्य संस्थेच्या निवडणुकीतून स्थानिक विकासाचं भवितव्य ठरतं. विकास हवा असेल तर महायुतीशिवाय पर्याय नाही, असं नेते यांनी सांगितलं. भाजपचं सरकार केंद्रात आणि राज्यात आहे. त्यामुळं वेगवान विकास हवा असेल तर भाजपला विजयी करा, असं आवाहन नेते यांनी मतदारांना केलं.
स्मार्ट सिटीची मागणी
अशोक नेते यांनी गडचिरोलीला स्मार्ट सिटी करण्याची मागणी केली. देवेंद्र फडणवीस यांच्याकडं आपण ही मागणी केल्याचं त्यांनी सांगितलं. मुख्यमंत्री गडचिरोलीचा कायापालट करत आहेत, करतीलच, असा ठाम विश्वास अशोक नेते यांनी व्यक्त केले. लक्ष्मी केवळ कमळावर बसते. त्यामुळे विकासाची लक्ष्मी हवी असेल, तर कमळाशिवाय पर्याय नाही असंही माजी खासदार अशोक नेते म्हणाले.
आपल्या संबोधनात मुख्यमंत्री फडणवीस यांनी गडचिरोलीचा उल्लेख केला. सर्वाधिक वेळ गडचिरोलीला येणारा मुख्यमंत्री म्हणून आपल्या नावाने रेकॉर्ड आहे. गडचिरोली यापुढं महाराष्ट्राचा पहिला जिल्हा म्हणून ओळखला जाईल. गडचिरोलीच्या नावानं बदलीची धमकी दिली जायची. मात्र आता हे थांबेल, असं फडणवीस ठामपणे म्हणाले. सरकारच्या प्रत्येक अजेंड्यावर गडचिरोली सर्वांत वरच्या स्थानावर असल्याचं त्यांनी सांगितलं.
यंदाच्या निवडणूक प्रचारात आपण सकारात्मक अजेंडा आणला आहे. आतापर्यंतच्या कोणत्याही सभेत आपण कोणावरही टीका केलेली नाही. स्वातंत्र्यप्राप्तीनंतर अनेक वर्ष गडचिरोली उपेक्षित राहिला. विकासाचा असमतोल तयार झाला. हा असमतोल नरेंद्र मोदी यांनी केंद्रात आणि महायुतीनं राज्यात दूर केला आहे. ग्रामीण भागातील लोक विकास शोधायचे. रोजगार शोधायचे. त्याच्या शोधात ते शहरात आलेत.
शहरात आलेल्या ग्रामीण लोकांना विकास मिळत नव्हता. त्यामुळं शहरांवर ताण पडत होता. नरेंद्र मोदी यांनी शहरांच्या विकासावर लक्ष दिलं. मोदी यांच्या याच विकासाचं उद्दीष्ट महायुतीनं पुढे नेल्याचं फडणवीस म्हणाले. आता शहरांचा चेहरामोहरा बदलत आहे. महाराष्ट्रातील सरकार शहरांच्या विकासावर भर देत आहे. त्यामुळं भविष्यात शहरांचा चेहरा बदलेला असेल, असं फडणवीस यांनी स्पष्ट केलं.
