महाराष्ट्रात सर्वत्र गणेशोत्सवाची धामधूम सुरू आहे. मुख्यमंत्री देवेंद्र फडणवीस यांनी मुंबईतील वर्षा बंगल्यावर गणपती बाप्पाचे आगमन मोठ्या उत्साह आणि थाटामाटात केले.
महाराष्ट्रात गणेशोत्सवाचा उत्साह 27 ऑगस्ट 2025 पासून सर्वत्र पाहायला मिळत आहे. घराघरात, गल्लीबोळात गजानन श्री गणराया, आधी वंदू तुज मोरया असा गजर घुमत आहे. विघ्नहर्ता गणपतीच्या आगमनाने सगळीकडे उत्साह आणि भक्तीचा रंग चढला आहे. यंदा मुंबईसह संपूर्ण महाराष्ट्रात गणेशोत्सव मोठ्या थाटामाटात साजरा होत आहे. याच उत्सवाच्या निमित्ताने राजकीय रंगही उधळले गेले असून, मुख्यमंत्री देवेंद्र फडणवीस यांनी ठाकरे बंधूंमधील जवळीकीवर खोचक टिप्पणी केली आहे. गणेशाने सुबुद्धी दिली म्हणून दोन भाऊ एकत्र आले, अशीच सुबुद्धी त्यांना मिळत राहो, असा टोला त्यांनी लगावला.
मुख्यमंत्री फडणवीस यांनी मुंबईतील आपल्या वर्षा या शासकीय निवासस्थानी गणरायाचे स्वागत केले. यावेळी त्यांनी गणेशभक्तांना शुभेच्छा देताना सांगितले, मी जगभरातील गणेशभक्तांना गणेशोत्सवाच्या हार्दिक शुभेच्छा देतो. हा उत्सव सर्वांना सुख, समाधान आणि आरोग्य देणारा ठरो. गणरायाचा आशीर्वाद प्रत्येकावर असो. पुढे ते म्हणाले, गणपती हे विघ्नहर्ते आहेत. आपल्या देशावर, राज्यावर येणारी संकटे दूर करून प्रत्येकाच्या मनोकामना पूर्ण होवोत, अशी प्रार्थना मी गणरायाच्या चरणी करतो. गणेशोत्सवाच्या निमित्ताने उद्धव ठाकरे यांनी आपली पत्नी रश्मी आणि मुलगा आदित्य यांच्यासह राज ठाकरे यांच्या शिवतीर्थ निवासस्थानी गणपती दर्शनासाठी भेट दिली.
Ganesh Chaturthi : विघ्नहर्त्याच्या पायाशी ठाकरे बंधूंच्या मतभेदांचे विसर्जन
महाराष्ट्रातील आर्थिक वॉररुम
गेल्या अनेक वर्षांपासून राज ठाकरे आणि उद्धव ठाकरे यांच्यातील राजकीय मतभेद सर्वश्रुत आहेत. मात्र, गेल्या दोन महिन्यांत त्यांच्या भेटींची मालिका सुरू झाली आहे. यापूर्वी ‘हिंदी सक्ती’ विरोधातील वरळीतील सभेत दोघे एकत्र आले होते. तेव्हा उद्धव ठाकरे यांनी हा तर ट्रेलर आहे, पिक्चर अभी बाकी है असे विधान करत भविष्यातील राजकीय जवळीकीचे संकेत दिले होते. त्यानंतर राज ठाकरे यांनी उद्धव यांच्या वाढदिवसानिमित्त मातोश्रीवर भेट दिली होती. या भेटींमुळे राजकीय वर्तुळात चर्चांना उधाण आले आहे. यंदाच्या गणेशोत्सवात गर्दीचा उच्चांक गाठला गेला आहे. यासंदर्भात मुख्यमंत्री फडणवीस म्हणाले, यंदा गणेशोत्सवात प्रचंड गर्दी दिसत आहे. यासाठी स्थानिक पोलीस यंत्रणा आणि मंडळांसोबत समन्वय साधून SOP तयार करण्यात आले आहेत.
मोठ्या मंडळांसोबत रिहर्सलही झाले आहेत. लाखो भाविकांचा विचार करता, सर्वतोपरी काळजी घेण्यात येत आहे. त्यांनी गणेशोत्सव शांततेत आणि सुरक्षितपणे पार पडावा यासाठी प्रशासन सज्ज असल्याचेही स्पष्ट केले. गणेशोत्सवाच्या उत्साहाबरोबरच मुख्यमंत्री फडणवीस यांनी आर्थिक आव्हानांवरही भाष्य केले. अमेरिकन टॅरिफच्या पार्श्वभूमीवर महाराष्ट्रात वॉर रुम स्थापन करण्यात आली आहे. यासंदर्भात ते म्हणाले, जागतिक बाजारपेठेत स्पर्धा वाढवण्यासाठी आणि उत्पादन खर्च कमी करण्यासाठी आम्ही वॉर रुम उघडली आहे. शंभर सुधारणांचे लक्ष्य ठेवले आहे. नव्या बाजारपेठा मिळवण्यासाठी आणि राज्याच्या आर्थिक प्रगतीसाठी आम्ही कटिबद्ध आहोत. या उपक्रमामुळे महाराष्ट्रातील उद्योगांना नवी दिशा मिळेल, असा विश्वास त्यांनी व्यक्त केला. गणेशोत्सवाच्या या रंगतदार वातावरणात ठाकरे बंधूंमधील जवळीक आणि मुख्यमंत्र्यांचा खोचक टोला यामुळे राजकीय चर्चांना अधिकच धार आली आहे. गणरायाच्या आशीर्वादाने राजकीय समीकरणे कशी बदलतील, हे पाहणे औत्सुक्याचे ठरेल.
