अमरावती महापालिकेच्या रणसंग्रामात राणा दाम्पत्यांच्या प्रवेशाने महायुतीत वादळाचे संकेत आहेत. युती झाली तर अंतर्गत फुटीचा धोका, आणि झाली नाही तर मतविभाजनाची भीती.
वाघाशी युती केली तर जंगलात आरडाओरड होते. राजकारणातील ही जुनी म्हण अमरावतीच्या राजकारणात पुन्हा एकदा जिवंत झाली आहे. आगामी महापालिका निवडणुकीच्या पार्श्वभूमीवर राणा दाम्पत्यांचा ‘युतीचा प्रस्ताव’ महायुतीसाठी वरदान ठरेल की संकट? असा यक्षप्रश्न सध्या विदर्भात गूंजतोय.
महापालिका निवडणुकीचा बिगुल वाजताच रवी राणा यांनी आपल्या युवा स्वाभिमान पक्षाकडून भाजपला थेट युतीचा प्रस्ताव दिला आणि एकदम 20 जागांची मागणीही करून टाकली. अमरावतीच्या राजकारणात मोठी उलथापालथ घडवणाऱ्या राणा दाम्पत्यांनी पुन्हा एकदा सर्वांच्या भुवया उंचावल्या. मात्र या प्रस्तावावर लगेचच महायुतीतील घटकपक्ष राष्ट्रवादी काँग्रेस (अजित पवार गट) मध्ये नाराजीचे वारे वाहू लागले. आमदार सुलभा खोडके आणि विधान परिषदेचे आमदार संजय खोडके यांनी उघडपणे राणा यांच्या सहभागाला विरोध दर्शवला. त्यामुळे हे स्पष्ट झाले आहे की, राणा यांची एन्ट्री म्हणजे महायुतीत नव्या संघर्षाची सुरुवात ठरणार. अलीकडेच खोडके आणि राणा यांच्यामध्ये वाद उफाळून आला आहे.
भूतकाळाचा पुनरावर्तन
याची पार्श्वभूमी लक्षात घेतली, तर 2024 लोकसभा निवडणुकीचा पराभव अजूनही भाजपच्या गोटात ताजा आहे. नवनीत राणा यांना भाजपकडून उमेदवारी दिली गेली खरी, पण महायुतीतील स्थानिक नेत्यांनी पाठिंबा दिलाच नाही आणि शेवटी, राणा यांचा पराभव झाला. तसाच काहीसा खेळ बडनेरा विधानसभा निवडणुकीतही पाहायला मिळाला. रवी राणा यांना भाजपकडून उमेदवारी मिळणार असे संकेत मिळाल्यावर भाजपचे स्थानिक नेते तुषार भारतीय यांनी थेट बंडखोरी केली. अपक्ष उमेदवारी केली, वातावरण तापवले. अखेर राणा विजयी झाले, पण युतीच्या गोटात उसळी मारणाऱ्या असंतोषाने स्थायिक शत्रुत्व निर्माण केलं.
आजची परिस्थिती पाहता, राणा दाम्पत्य हे भाजपसोबत युती करतात, तर त्यांच्या उपस्थितीने महायुतीतच पराभवाचे ढग दाटू शकतात, अशी भीती व्यक्त होत आहे. अनेक भाजप आणि राष्ट्रवादी नेते उघडपणे राणा यांच्याविरोधात आहेत. महायुतीचा गलबत जर याप्रकारे आतूनच पोखरले गेले, तर अमरावती महापालिकेत महाविकास आघाडीच्या विजयाची शक्यता नाकारता येणार नाही. हेच महायुतीच्या चिंतेचे मुख्य कारण बनले आहे.
वर्चस्वाची लढाई
भाजपने जर राणा यांना 20 जागा देऊन युती स्वीकारली, तर स्थानिक असंतोष मोठ्या बंडखोरीत परिवर्तित होऊ शकतो. दुसरीकडे, जर त्यांना नकार दिला, तर राणा हे स्वतंत्र लढा देऊन भाजपच्या मतविभाजनास कारणीभूत ठरू शकतात. अशा परिस्थितीत, भाजपसमोरील डावपेच अत्यंत गुंतागुंतीचा झाला आहे. अमरावती महापालिकेतील निवडणूक म्हणजे केवळ शहराचा विकास नव्हे, तर इथल्या प्रत्येक नेत्याच्या प्रतिष्ठेची लढाई आहे. अशात राणा यांच्या सहभागाने ही लढाई विकास विरुद्ध वर्चस्व, अशी रूपांतरित होऊ शकते.
सध्या तरी परिस्थिती सांगते की राणा यांची युती म्हणजे महायुतीत फुटीचा पहिला टप्पा ठरू शकतो. लोकसभेतील इतिहास पुन्हा एकदा महापालिकेत पाहायला मिळाला, तर भाजप आणि महायुतीला स्वतःचा पराभव नोंदवावा लागू शकतो. महायुतीतील पुढचा पाऊल हे ठरवणार की, विजय साकारेल की इतिहासाची पुनरावृत्ती होईल.
