राज्यात सर्वत्र दिवाळीची धामधूम सुरू आहे. फटाक्यांचा आवाज, उत्सवाची झगमग आणि भक्तीभावाचे रंग सर्वत्र उधळले जात आहेत. मात्र या सणसुदीच्या वातावरणात राजकीय रंगही उधळले जात आहेत.
दिवाळीचा सण जवळ येताच महाराष्ट्रात मिठाईच्या गोडव्यात आणि फटाक्यांच्या आवाजात राजकीय मसालाही चांगलाच उधळला जातोय. राज्यभरात दिवाळीची खरेदी जोरात सुरू असताना, अचानक हिंदू-मुस्लिम वादाच्या रंगांनी हे सण रंगले आहेत. राष्ट्रवादी काँग्रेसच्या अजित पवार गटातील आमदारांमध्ये या मुद्द्यावरून शाब्दिक युद्ध सुरू झालंय. अहमदनगरचे आमदार संग्राम जगताप यांनी दिवाळीची खरेदी फक्त हिंदू दुकानदारांकडून करा, असं आवाहन करून वादाची ठिणगी पेटवली. यावर पक्षनेते अजित पवारांनी नाराजी व्यक्त करत कारणे दाखवा नोटीसचा इशारा दिला.
पक्षातीलच दुसरे आमदार अमोल मिटकरी यांनी यावरून जगतापांना सोशल मीडियावर डिवचत खरमरीत टीका केली. हे प्रकरण आता पक्षातील अंतर्गत कलहाचं रूप घेतंय. ज्यात फुले-शाहू-आंबेडकरांच्या पुरोगामी विचारांची टक्कर हिंदुत्ववादी भूमिकेशी होताना दिसतेय. सोलापूर जिल्ह्यातील करमाळा येथे हिंदू मोर्चात बोलताना जगतापांनी हिंदूंनी हिंदूंकडूनच खरेदी करा, असं सांगितलं. याला प्रतिसाद देत अहमदनगरच्या कापड बाजारात हिंदुत्ववादी कार्यकर्त्यांनी दुकानांवर भगवे ध्वज लावले. जेणेकरून हिंदू दुकानं ओळखता येतील. पण हे ध्वज लावताच वादाची आग भडकली. मुंबईतून अमोल मिटकरी यांनी एक व्हिडीओ शेअर करत जगतापांना टोला लगावला.
अजित पवारांची कसोटी
क्रॉफर्ड मार्केटमध्ये मुस्लिम दुकानदारांकडून फटाके खरेदी करण्यासाठी हिंदू बांधवांची तुफान गर्दी दाखवत त्यांनी लिहिलं, आमदार साहेबांचं जास्त मनावर न घेता हिंदू बांधवांनी केली तुफान गर्दी. यातून महाराष्ट्र जातिभेद आणि रंगभेदाने चालत नाही, असा पुरोगामी संदेश दिला. मिटकरी पुढे म्हणतात, नाहीतर विधानसभेतील हिरवा-लाल बॅच सोडावा लागेल. अमोल मिटकरींच्या वक्तव्याने संपूर्ण प्रकरणाला नवं वळण दिलं आहे. ते म्हणतात, मुंबई क्रॉफर्ड मार्केट येथे मुस्लिम दुकानदारांकडून दिवाळीचे फटाके खरेदी करण्यासाठी आमदार साहेबांचे जास्त मनावर न घेता हिंदु बांधावांनी केलेली तुफान गर्दी. दोन किलोमीटर पर्यंत रांगच रांग. ऐसा क्यू करते हो भाई?
व्हिडीओ पाहता पाहता व्हायरल झाला आणि जगतापांच्या नाव न घेता मिटकरींनी त्यांना चिमटा घेतला. मिटकरी हे राष्ट्रवादीचे प्रवक्ते असल्याने त्यांची ही टीका पक्षाच्या पुरोगामी वारशाशी जुळते. अजित पवारांनी जगतापांना कारणे दाखवा नोटीसचा इशारा दिल्यानंतरही हे प्रकरण थांबलं नाही. उलट, नगर शहरातील भगवे ध्वज प्रकरणाने वातावरण अधिक तापलं. हिंदुत्ववादी कार्यकर्त्यांचं हे कृत्य पाहता मिटकरींनी महाराष्ट्राच्या सहिष्णुतेची आठवण करून दिली. विधानसभेतील हिरवा-लाल बॅच म्हणजे आमदारकीचं प्रतीक आणि ते सोडावं लागेल असं म्हणत त्यांनी जातीयवादी राजकारणाला थेट आव्हान दिलं. हे सगळं घडत असताना राष्ट्रवादी काँग्रेस अजित पवार गटामध्ये फुले, शाहू, आंबेडकरांच्या विचारसरणीला धक्का बसल्याचं बोललं जातंय.
