माजी नगराध्यक्ष एहेतेश्याम अली यांनी तब्बल अकरा वर्षांनंतर काँग्रेसमध्ये भव्य पुनरागमन करत वरोराच्या राजकारणात नवचैतन्य आणले आहे. हर्षवर्धन सपकाळ आणि प्रतिभा धानोरकर यांच्या उपस्थितीत झालेल्या या प्रवेश सोहळ्याने स्थानिक निवडणुकींपूर्वी काँग्रेसला नवे बळ मिळाले आहे.
महाराष्ट्रातील स्थानिक स्वराज्य संस्थांच्या निवडणुकीच्या रणधुमाळीत प्रत्येक पक्ष आपली ताकद आणि व्यूहरचना सिद्ध करत आहे. या राजकीय रंगमंचावर काँग्रेस पक्षाने एक महत्त्वाचे पाऊल उचलले आहे. ज्याने सर्वांचे लक्ष वेधले आहे. वरोरा नगरपरिषदेचे माजी नगराध्यक्ष एहेतेश्याम अली यांनी तब्बल अकरा वर्षांच्या दीर्घ अंतरानंतर काँग्रेस पक्षात थाटामाटात पुनरागमन केले आहे. सोमवार, 6 ऑक्टोबरला नगराध्यक्षपदाच्या आरक्षणाची घोषणा होणार आहे. अशातच या घडामोडीने राजकीय वातावरणात खळबळ उडाली आहे. नागपूर येथे काँग्रेसचे प्रदेशाध्यक्ष हर्षवर्धन सपकाळ आणि खासदार प्रतिभा धानोरकर यांच्या उपस्थितीत झालेल्या भव्य समारंभात अली यांनी काँग्रेसचा झेंडा हाती घेतला. ज्यामुळे पक्षाच्या नव्या अध्यायाची नांदी झाली आहे.
एहेतेश्याम अली यांचा राजकीय प्रवास हा एखाद्या नाट्यमय चित्रपटासारखा आहे. संजय देवतळे यांचे कट्टर समर्थक असलेले अली 2014 मध्ये देवतळे यांच्यासोबत भाजपात दाखल झाले होते. 2016 मध्ये वरोरा नगरपरिषदेच्या निवडणुकीत त्यांनी भाजपाच्या तिकिटावर नगराध्यक्षपद भूषवले. अनेक लोककल्याणकारी कामांनी जनतेच्या मनात आपले स्थान निर्माण केले. मात्र, 2024 मधील विधानसभा निवडणुकीत भाजपाने त्यांना उमेदवारी नाकारल्यानंतर त्यांनी प्रहार पक्षातून बंडखोरी करत निवडणूक लढवली. या निवडणुकीत त्यांना चौथा क्रमांक मिळाला. परंतु त्यांच्या धाडसाने त्यांचा दबदबा कायम राहिला. आता, अकरा वर्षांच्या वनवासानंतर, त्यांनी पुन्हा काँग्रेसची वाट धरली आहे. त्यांच्यासोबत अनेक कार्यकर्त्यांनीही पक्षात प्रवेश केला आहे.
काँग्रेसला नवे बळ
नागपूर येथील समारंभात हर्षवर्धन सपकाळ यांनी अली यांचे स्वागत करताना काँग्रेसच्या भविष्यातील योजनांचा ठाम विश्वास व्यक्त केला. अली यांचा अनुभव आणि लोकसंपर्क यामुळे वरोरा आणि परिसरात काँग्रेसला नवसंजन मिळेल, असे सपकाळ यांनी ठासून सांगितले. अली यांच्या नेतृत्वाने पक्षाला स्थानिक पातळीवर नवी उभारी मिळण्याची खात्री आहे. हर्षवर्धन सपकाळ यांनी या पक्षप्रवेशाच्या सोहळ्याला उपस्थित राहून काँग्रेसच्या एकजुटीचे आणि नव्या जोमाने निवडणूक लढण्याच्या तयारीचे दर्शन घडवले. एहेतेश्याम अली यांच्यासारख्या प्रभावी नेत्याच्या समावेशाने स्थानिक स्वराज्य संस्थांच्या निवडणुकीत काँग्रेसला विजयाचा मार्ग सुकर होईल, असा विश्वास त्यांनी व्यक्त केला.
खासदार प्रतिभा धानोरकर यांनीही या पुनरागमनाचे स्वागत करत पक्षाच्या विचारसरणीला बळकटी देण्याचा निर्धार व्यक्त केला. एहेतेश्याम अली यांच्या काँग्रेसमधील पुनरागमनाने वरोराच्या राजकीय पटलावर नवे समीकरणे उदयास येण्याची शक्यता आहे. त्यांच्यासोबत भद्रावती तालुका अध्यक्ष तुळशीराम श्रीरामे, धर्मेंद्र हवेलीकर, शाहीद अली, रवी पवार, अनिल खडसे यांच्यासह अनेक कार्यकर्त्यांनी काँग्रेसमध्ये प्रवेश केला आहे. या सामूहिक पक्षप्रवेशाने काँग्रेसला स्थानिक पातळीवर नवे बळ मिळाले आहे. यामुळे आगामी निवडणुकीत पक्षाची ताकद वाढण्याची खात्री आहे.
