मेडिट्रिना हॉस्पिटल घोटाळ्यात आरोपींवर कारवाई टाळण्यासाठीच तपास अधिकाऱ्याची बदली झाली का, असा गंभीर प्रश्न उपस्थित झाला आहे. अटकपूर्व जामिनाच्या सुनावणीच्या आदल्या दिवशीच घेतलेल्या या निर्णयामुळे ईओडब्ल्यूच्या भूमिकेवर संशयाचे ढग दाटले आहेत.
शहराच्या मध्यवर्ती भागात खळबळ माजवणाऱ्या मेडिट्रिना हॉस्पिटल प्रकरणाने पुन्हा एकदा सनसनाटी निर्माण केली आहे. आर्थिक गुन्हे शाखेच्या (EoW) तपासाच्या केंद्रस्थानी असलेल्या या घोटाळ्याला आता नाट्यमय वळण मिळाले आहे. तपास अधिकारी बबनराव येडगे यांची अचानक बदली करून या प्रकरणाला नवे रहस्य जोडले गेले आहे. हा निर्णय डॉ. समीर पालतेवार, त्यांची पत्नी सोनाली, मुलगा अर्पण आणि इतर आरोपींच्या अटकपूर्व जामिनाच्या सुनावणीच्या अवघ्या एक दिवस आधी घेण्यात आला. या कृतीने संशयाचा काळा मेघ अधिक गडद झाला आहे. शहरात कुजबुज सुरू झाली आहे की, हा सारा खटाटोप कशासाठी?
चार महिन्यांच्या अथक तपासानंतर येडगे यांनी 17 सप्टेंबर 2025 रोजी 17 कोटी रुपयांच्या आर्थिक गैरव्यवहाराचा गुन्हा नोंदवला होता. त्यांच्या तपासातील अकाट्य पुराव्यांमुळे 24 सप्टेंबर रोजी न्यायालयाने आरोपींचा अटकपूर्व जामिनाचा अर्ज धुडकावून लावला. पण तरीही, ईओडब्ल्यूने हॉस्पिटलला वारंवार भेटी देऊनही आरोपींना ताब्यात घेण्याची हिंमत दाखवली नाही. सध्या पालतेवार कुटुंबाने जिल्हा व सत्र न्यायालयात अंतरिम अटकपूर्व जामिनासाठी याचिका दाखल केली आहे. 29 सप्टेंबरला होणाऱ्या सुनावणीच्या पूर्वसंध्येला तपास अधिकाऱ्याची बदली हा प्रकार प्रकरणाला कमकुवत करण्याचा डाव असल्याचा संशय बळावला आहे. हा डॉ. पालतेवार आणि त्यांच्या सहकाऱ्यांविरुद्धचा पाचवा गुन्हा आहे. यापूर्वीही हॉस्पिटलमधील आर्थिक गैरव्यवहार आणि सरकारी आरोग्य विमा योजनांमधील गडबडींबाबत अनेक गुन्हे नोंदवले गेले आहेत.
Vijay Wadettiwar : शिव्या, धमक्या, हल्ले झाले तरी बेहत्तर, लढा थांबणार नाही
विश्वासघाताचा काळा खेळ
मेडिट्रिना हॉस्पिटलची स्थापना 2012 मध्ये डॉ. समीर पालतेवार, आयटी सल्लागार गणेश चक्करवार आणि इतरांनी मेडिट्रिना इन्स्टिट्यूट ऑफ मेडिकल सायन्सेस प्रा. लि. (पूर्वीचे व्हीआरजी हेल्थकेअर प्रा. लि.) या कंपनीअंतर्गत केली होती. विश्वासाच्या पायावर उभी राहिलेली ही संस्था फसवणुकीच्या काळ्या सावट्याखाली सापडली. डॉ. पालतेवार, त्यांची पत्नी सोनाली आणि मुलगा निनाद यांनी ऑब्विएट हेल्थ केअर नावाची बनावट कंपनी स्थापन करून खाते क्र. 50200029991860 उघडले आणि येथूनच विश्वासघाताचा खेळ सुरू झाला.
Balasaheb Thorat : शेतकऱ्यांच्या पाठीशी उभे राहा, सरकारला सबुद्धी द्या
2020-21 ते 2023-24 या कालावधीत पालटेवार दांपत्याने संगनमताने हॉस्पिटलच्या खात्यातून 11.42 कोटी रुपये या बनावट कंपनीच्या खात्यात वळवले. ‘हेल्थ केअर डिजिटल कन्सल्टन्सी, मार्केटिंग व जाहिरात’ अशा खोट्या नावांखाली बनावट बिलांचा डोंगर उभारला गेला. तक्रारदार गणेश चक्करवार यांना अंधारात ठेवून हे सारे व्यवहार पार पडले. 2024 मध्ये वार्षिक हिशेब तपासणीत हा घोटाळा उघड झाला. ज्यामध्ये ऑब्विएट हेल्थ केअर प्रा. लि. आणि इतर काही कंपन्यांच्या नावाने बनावट बिले तयार केले. तब्बल 16.84 कोटी रुपयांचा गैरव्यवहार झाल्याचे समोर आले. या काळ्या कारनाम्यात हॉस्पिटलचा अकाउंटंट अर्पण किशोर पांडे आणि इतरांचाही हात असल्याचे उघड झाले. हा घोटाळा केवळ आर्थिक फसवणूक नसून, विश्वास आणि नैतिकतेची क्रूर हत्या आहे. जी नागपूरच्या सामाजिक आणि आर्थिक विश्वासाला हादरवून सोडणारी आहे.
