तीन कर्तव्यदक्ष आयपीएस अधिकाऱ्यांच्या संभाव्य बदलीची चर्चा अद्याप थांबलेली नाही. अशात आणखी एका यादीची भर पडली आहे.
नगर परिषदेची निवडणूक आटोपताच राज्यातील पोलिस दलात व्यापक बदल अपेक्षित आहेत. आयपीएस अधिकाऱ्यांच्या भविष्यातील बदल्यांची यादी आता तयार झाली आहे. संभाव्या बदल्यांची सध्या पोलिस वर्तुळात जोरदार चर्चा आहे. या फेरबदलानुसार अधिकाऱ्यांना पोस्टिंग देण्यात येणार असल्याची माहिती आहे. मुख्यमंत्री तथा गृहमंत्री देवेंद्र फडणवीस लवकरच या फाइलवर शिक्कामोर्तब करतील हे संकेत आहेत.
सुमारे 27 आयपीएस अधिकाऱ्यांची राज्यात बदली होणार आहे. त्यातील काही अधिकारी अतिरिक्त पोलिस महासंचालक दर्जाचे आहेत. नवी मुंबईच्या पोलिस आयुक्तपदी अनुप कुमार सिंग यांची बदली होऊ शकते असे सांगण्यात आले आहे. सध्या या पदारव मिलिंद भारंबे हे कार्यरत आहेत. भारंबे यांना कायदा व सुव्यवस्था विभागाचे अतिरिक्त महासंचालक करण्यात येणार असल्याचा दावा करण्यात आला आहे.
दादांच्या गावात रामानंद
पुण्यातील पिंपरी चिंचवडचे पोलिस आयुक्त म्हणून विनय कुमार चौबे कार्यरत आहे. येथे सुनील रामानंद यांना पाठविण्याची तयारी सुरू आहे. निखिल गुप्ता हे पुण्याच्या गुन्हे अन्वेषण विभागाचे अतिरिक्त पोलिस महासंचालक असतील, असे संकेत आहेत. आर्थिक गुन्हे विभागाचे अतिरिक्त पोलिस महासंचालकपद विश्वास नागरे पाटील यांना मिळेल असे चित्र आहे. ठाणे येथे सध्या आशुतोष डुंभारे हे पोलिस आयुक्त आहेत. उपमुख्यमंत्री तथा शिवसेना प्रमुख एकनाथ शिंदे यांचा हा बालेकिल्ला येथे सत्यनारायण साह यांना पोलिस आयुक्त पदावर पाठविण्याची तयारी सुरू आहे.
प्रशासन विभागाच्या विशेष पोलिस महानिरीक्षक पदावर संजय दराडे यांना नियुक्ती मिळू शकते. बृहन्मुंबई पोलिस दलात सहपोलिस आयुक्तांची काही पदे आहेत. त्यातील जवळपास सर्वच अधिकाऱ्यांची बदली होणार आहे. अभिषेक त्रिमुखे, अनिल कुंभारे, मनोज कुमार शर्मा, शारदा राऊत, ज्ञानेश्वर चव्हाण यांची तेथे वर्णी लागणार आहे. एस. जयकुमार यांना नाशिक परिक्षेत्रात विशेष पोलिस महानिरीक्षक म्हणून पाठविण्यात येणार असल्याचे सांगण्यात येत आहे.
IPS S Rushikesh Reddy : एआयच्या तीक्ष्ण नजरेने बंदोबस्ताला धार
पोकळे, पवार एक्सचेंज
सुनील फुलारी हे नाशिक शहराचे पोलीस आयुक्त असतील. सध्या या पदावर संदीप कर्णिक कार्यरत आहेत. छत्रपती संभाजीनगर मध्ये सध्या प्रवीण पवार हे पोलिस आयुक्त आहेत. त्यांच्या जागेवर रामनाथ पोकळे यांना पाठविण्याची तयारी झाल्याचा दावा केला जात आहे. रामनाथ पोकळे हे कोल्हापूर परिक्षेत्राचे विद्यमान विशेष पोलिस महानिरीक्षक आहेत. त्यांच्या जागेवर संभाजीनगरातून प्रवीण पवार यांना पाठविण्यात येणार आहे.
सुवेझ हक यांनी गडचिरोलीत पोलिस अधीक्षक म्हणून आपला कार्यकाळ गाजवला होता. त्यांना कोकण परिक्षेत्राचे विशेष पोलीस महानिरीक्षक पद मिळेल असे दिसते. नक्षल विभागाचे पोलिस महानिरीक्षक संदीप पाटील यांच्याकडे नागपूर परिक्षेत्राचा अतिरिक्त कार्यभार आहे. त्यांच्या जागेवर निशीथ मिश्रा येऊ शकतात. राज्य राखीव पोलिस दलाच्या विशेष पोलीस महानिरीक्षक पदावर संजय येनपुरे यांची वर्णी लागू शकते.
IPS Rashmitha Rao : सायलेन्सरचा आवाज थांबला, झोन चारचा सूर गाजला
कराळे एमएसएससीत
राज्य सुरक्षा महामंडळाच्या विशेष पोलीस महानिरीक्षक पदावर दत्ता कराळे येतील असे चित्र आहे. साऱ्यात नीलोत्पल यांचा क्रमांक लागू शकतो. गडचिरोलीत सध्या नीलोत्पल हे एसपी म्हणून कार्यरत आहेत. महेंद्र पंडित हे अहिल्यानगर (अहमदनगर) येथील पोलिस अधीक्षक होऊ शकतात. सुनील लोखंडे यांची नवी मुंबईत पोलीस उपायुक्त म्हणून बदली होईल, असे दिसत आहे. अमरावती ग्रामीणचे पोलिस अधीक्षक विशाल आनंद यांना गडचिरोलीत पाठविण्याची तयारी सुरू आहे. त्यांच्या खुर्चीवर अनेकांना डोळा आहे. यापूर्वी देखील ‘द लोकहित लाइव्ह’ने याबाबतचे वृत्त प्रकाशित केले होते.
सुदर्शन मुमुक्का यांना अमरावती ग्रामीणची धुरा मिळू शकते. नागपूर पोलिस दलात वाहतूक पोलिस उपायुक्त असलेले लोहित मतानी यांना चंद्रपुरात एसपी म्हणून पाठविण्याची तयारी सुरू आहे. मतानी यांना स्वत:ला जिल्हा हवा आहे. भंडाऱ्यातून त्यांची बदली मुंबईकडे झाली होती. मात्र अचानक त्यांच्या बदली आदेशात फेरबदल झाले. रहस्यमय घडामोडीनंतर त्यांना नागपुरात नियुक्ती मिळाली. नागपुरात आले तेव्हाच त्यांना वाहतूक विभाग हवा होता. मात्र त्यावेळी अर्चित चांडक हे वाहतूक उपायुक्त होते. त्यामुळे मतानी यांना नागपूर शहराच्या झोन एकची जबाबदारी देण्यात आली. चांडक यांच्या बदलीनंतर मतानी यांनी वाहतूकसाठी ‘ग्रीन सिग्नल’ मिळविला आहे. सध्या मतानी हे सायबर विभागाचेही नागपूरचे प्रमुख आहेत. प्रकाश जाधव यांना पिंपरी चिंचवड येथे उपायुक्त म्हणून नियुक्ती मिळण्याची दाट शक्यता आहे.
IAS Selection : आयएएसची खुर्ची आत ज्येष्ठांसाठी मखमली, नवोदितांसाठी काटेरी
पोद्दारांना मुदतवाढ
नागपूर ग्रामीणचे पोलिस अधीक्षक हर्ष पोद्दार यांच्या खुर्चीवरही अनेकांचा डोळा आहे. नागपुरातील एक अधिकारी वारंवार पोद्दार यांचा कार्यकाळ पूर्ण झाल्याचे ‘पॉइंट आऊट’ करून देत आहे. प्रसंगी निवडणुकीचे कारण दिले जात आहे. पोद्दार यांना आपल्या कर्तबगारीमुळे मुदतवाढ मिळाल्याचे सांगितले जात आहे. मात्र या खुर्चीवर डोळा ठेऊन असलेल्या अधिकारी एकाच्या माध्यमातून निवडणूक आयोगाचे शस्त्र उगारण्याच्या तयारीत आहे. विदर्भात दुसरीकडे जाण्यापेक्षा नागपुरातल्या नागपुरात बरे अशी वेळी यामागे आहे.
निवडणुकीपूर्वी राज्यातील अनेक अधिकाऱ्यांची बदली होईल, यात दुमत नाही. यासाठीची यादीही तयार झाली आहे. पण म्हणतात ना ‘गेम कभी भी हो सकता है’. त्यामुळे ऐनवेळी झारीतील शुक्राचार्य संबंधित अधिकाऱ्यांशी संपर्क साधत सोयीस्कर पोस्टिंगची ऑफर देण्याच्या तयारीत दिसत आहेत. यात त्यांना कितपत यश येते, हे लवकरच स्पष्ट होईल. जिल्हा परिषद, पंचायत समिती आणि महापालिका निवडणुकीपूर्वी बदलीचा पोळा फुटेल असे सांगण्यात येत आहे.
