पावसाळी अधिवेशनाच्या उंबरठ्यावर असतानाच विधानभवनाच्या प्रवेशद्वाराजवळ अचानक लागलेल्या आगीने खळबळ उडवली. स्कॅनिंग मशीनमधील शॉर्टसर्किटमुळे ही आग लागल्याचा प्राथमिक अंदाज असून, सुदैवाने कोणतीही जीवितहानी टळली आहे.
पावसाळी अधिवेशन अवघ्या काही दिवसांवर आले असताना, महाराष्ट्राच्या राजकारणाचा केंद्रबिंदू असलेल्या मुंबईतील विधानभवनात सोमवारी दुपारी एक चिंताजनक घटना घडली. विधानभवनाच्या मुख्य प्रवेशद्वारालगत अचानक आग लागल्यामुळे एकच खळबळ उडाली. या घटनेने संपूर्ण परिसरात काही काळ गोंधळाचे वातावरण निर्माण झाले. जिथे नेहमीच मंत्र्यांची, आमदारांची व सामान्य नागरिकांची वर्दळ असते, तिथे आग लागल्याने सुरक्षेच्या उपाययोजनांवरही प्रश्नचिन्ह उपस्थित झाले आहे.
दुपारच्या सुमारास विधानभवनाच्या प्रवेशद्वारालगतच्या परिसरातून अचानक काळसर धुराचे लोट उठायला सुरुवात झाली. परिसरात उपस्थित लोकांना काहीच समजण्याच्या आत, आगीने पेट घेतला होता. काही क्षणांतच गोंधळाची स्थिती निर्माण झाली. विधानभवनासारख्या उच्च सुरक्षा असलेल्या इमारतीच्या प्रवेशद्वारालाच आग लागल्यामुळे सुरक्षेच्या दृष्टीने ती एक गंभीर बाब मानली जात आहे. या आगीमागे नेमकं कारण काय, हे अद्याप स्पष्ट झालेलं नाही. स्कॅनिंग मशीनमध्ये शॉर्टसर्किट झाल्यामुळे ही आग लागल्याचा प्राथमिक अंदाज व्यक्त करण्यात येत आहे. विधानभवनाच्या रिसेप्शन परिसरात असलेल्या स्कॅनिंग मशीनमध्ये काही तांत्रिक बिघाड झाल्यामुळे शॉर्टसर्किट झाले असावे. त्यामुळेच ही आग लागली असावी, असा अधिकाऱ्यांचा अंदाज आहे.
Yashomati Thakur : दलित न्यायमूर्तीच्या स्वागतात प्रोटोकॉलचा अपमान
अग्निशमन दलाची तत्काळ कारवाई
घटनेची माहिती मिळताच अग्निशमन दलाच्या गाड्या काही मिनिटांत घटनास्थळी दाखल झाल्या. जवानांनी तत्काळ कारवाई करत आगीवर नियंत्रण मिळवले. सुदैवाने आग मोठ्या प्रमाणात पसरली नाही आणि कोणतीही जीवितहानी झाली नाही. मात्र, स्कॅनिंग यंत्रणेला काही प्रमाणात नुकसान झाले असून त्याचा आढावा घेण्यात येत आहे. घटनेच्या वेळी विधानसभा अध्यक्ष राहुल नार्वेकर विधानभवनातील एका कार्यक्रमात सहभागी होते. आग लागल्याची माहिती मिळताच त्यांनी त्वरित घटनास्थळी धाव घेतली आणि स्वतः परिस्थितीचा आढावा घेतला. पत्रकारांशी बोलताना त्यांनी सांगितले, ही आग स्कॅनिंग मशीनमधील शॉर्टसर्किटमुळे लागल्याचा प्राथमिक अंदाज आहे. कोणालाही इजा झालेली नाही आणि स्थिती पूर्णपणे नियंत्रणात आहे. ही एक अपघाती घटना आहे.
नार्वेकरांचे स्पष्टीकरण
पत्रकारांनी सुरक्षेतील त्रुटींसंबंधी विचारले असता नार्वेकरांनी स्पष्टपणे सांगितले की, ही आग इस्टॅब्लिशमेंटच्या वीज कनेक्शनमुळे लागलेली नाही. स्कॅनिंग मशीनमधील बिघाडामुळे हा अपघात घडला. सुरक्षेबाबत कोणतीही गफलत झालेली नाही. त्यांनी आश्वासन दिलं की, संपूर्ण यंत्रणेचा आढावा घेऊन भविष्यात अशा घटना टाळण्यासाठी योग्य उपाययोजना केल्या जातील. शिवसेना (उद्धव बाळासाहेब ठाकरे) पक्षाचे नेते आदित्य ठाकरे आणि विधान परिषदेतील विरोधी पक्षनेते अंबादास दानवे यांनीही या घटनेची माहिती मिळताच घटनास्थळी भेट दिली. त्यांनी अग्निशमन दलाच्या अधिकाऱ्यांशी संवाद साधून परिस्थितीची माहिती घेतली. यावेळी विधानसभा अध्यक्ष नार्वेकर घटनास्थळावरून निघत होते. त्यांनी आदित्य ठाकरे यांना “फारशी काळजी करण्याचे कारण नाही” असे सांगितले.
घटना गंभीर
सुदैवाने ही आग मोठ्या प्रमाणात पसरली नाही आणि कोणालाही इजा झाली नाही. मात्र, विधानभवनासारख्या अतिसंवेदनशील परिसरात अशा प्रकारची आग लागणे ही अतिशय गंभीर बाब आहे. शॉर्टसर्किटसारख्या छोट्या कारणांमुळे जर सुरक्षा व्यवस्थेचा भंग होत असेल, तर यंत्रणेतील तांत्रिक बाबींचा आणि देखभालीचा प्रश्न ऐरणीवर येतो. सरकारने आणि प्रशासनाने यापुढे अशी घटना पुन्हा घडू नये म्हणून संपूर्ण सुरक्षा व्यवस्थेची कसून तपासणी करणे आणि सर्व उपकरणांची नियमित देखभाल सुनिश्चित करणे, हे अत्यावश्यक ठरणार आहे.
