पालकमंत्री संजय राठोड यांनी यवतमाळ शहरातील सुमारे 70 कोटी रुपयांच्या विकास कामांचा आढावा घेतला. संथगतीने सुरू असलेल्या कामांना वेग देत तातडीने पूर्ण करण्याचे स्पष्ट निर्देश त्यांनी अधिकाऱ्यांना दिले.
यवतमाळ शहरात विविध ठिकाणी सुरू असलेल्या विकास कामांना गती देण्यासाठी पालकमंत्री संजय राठोड यांनी महसूल भवन येथे झालेल्या बैठकीत स्पष्ट निर्देश दिले. जवळपास 70 कोटी रुपयांच्या सिमेंट रस्ते व अन्य विकास प्रकल्पांची कामे काही ठिकाणी संथगतीने सुरू आहे. अडचणींमुळे खोळंबलेल्या कामांची तातडीने सोडवणूक करावी, असे त्यांनी स्पष्टपणे सांगितले. अडथळे दूर करून कामे पूर्ण करण्याचे आदेश त्यांनी संबंधित विभागांना दिले.
बैठकीस माजी राज्यमंत्री मदन येरावार, जिल्हाधिकारी विकास मीना, यवतमाळ सिंचन मंडळाचे अधीक्षक अभियंता योगेश सोनवणे, उपविभागीय अधिकारी गोपाळ देशपांडे, नगरपरिषदेचे मुख्याधिकारी श्री. क्यातमवार यांच्यासह जलसंपदा, बांधकाम, जलसंधारण व नगररचना विभागाचे वरिष्ठ अधिकारी उपस्थित होते.
B.R Gavai : न्यायमंदिरातून योगींच्या नेतृत्वाला साष्टांग नमस्कार
स्पष्ट निर्देश
यवतमाळ शहरात सध्या केंद्र शासनाच्या केंद्रीय मार्ग निधीतून अनेक सिमेंट रस्त्यांची कामे सुरू आहेत. मात्र काही ठिकाणी ही कामे अत्यंत संथगतीने सुरू असल्याचे लक्षात आल्यावर पालकमंत्र्यांनी नाराजी व्यक्त केली. या कामांना लागणाऱ्या सर्व अडचणींवर नगरपरिषद, जीवन प्राधिकरण, बांधकाम व नगररचना विभागाने संयुक्तपणे पाहणी करून तातडीने उपाययोजना करण्याचे निर्देश त्यांनी दिले.
अमृत योजना आणि नगरोत्थान योजनेतून शहरात झालेले, सुरू असलेले व अजून सुरू न झालेल्या कामांचा आढावा घेण्यात आला. यात काही प्रकल्पांची कामे रखडल्याचे लक्षात येताच पालकमंत्र्यांनी संबंधित अधिकाऱ्यांना तत्काळ कार्यवाहीचे आदेश दिले.
Chandrashekhar Bawankule : उमेदवारी शिफारशीवर नाही, कामगिरीवर
प्रकल्प पूर्णत्वाचे आदेश
शहरातील कामांबरोबरच जिल्ह्यातील सिंचन प्रकल्पांचाही आढावा या बैठकीत घेण्यात आला. पालकमंत्र्यांनी डेहणी उपसा सिंचन प्रकल्पाच्या कामांना तातडीने पूर्ण करून नियोजित 7 हजार हेक्टर सिंचन क्षमता प्रत्यक्षात आणण्यावर भर दिला. यामुळे जिल्ह्यातील हजारो शेतकऱ्यांना सिंचनासाठी पाण्याचा लाभ मिळणार आहे.
सिंचन प्रकल्पांमार्फत निर्माण झालेली क्षमताच प्रत्यक्षात वापरात आणण्याची गरज असल्याचे सांगत पालकमंत्र्यांनी प्रकल्प निहाय क्षमतेचा आढावा घेण्याचे नियोजन जाहीर केले. पाणी वापर संस्थांच्या सक्षमीकरणासाठी आवश्यक कार्यवाही करण्याचे आदेशही त्यांनी अधिकाऱ्यांना दिले.
मुद्द्यांना तत्काळ प्रतिसाद
बैठकीत माजी राज्यमंत्री मदन येरावार यांनी यवतमाळ शहरातील विविध विकास कामांबाबत व सिंचन सुविधांसंदर्भात काही महत्त्वाचे मुद्दे उपस्थित केले. या मुद्द्यांवर पालकमंत्र्यांनी तत्काळ कारवाई करण्याचे आदेश दिले. शहर विकासाला गती देतानाच ग्रामीण भागातील शेतकऱ्यांना सिंचनाचा फायदा मिळवून देणे हे शासनाचे उद्दिष्ट आहे. यासाठी सर्व विभागांनी समन्वय ठेवून काम करावे, असे पालकमंत्र्यांनी स्पष्टपणे सांगितले.
यवतमाळ जिल्ह्याच्या सर्वांगीण विकासासाठी संजय राठोड यांचे नेतृत्व निर्णायक ठरत आहे. शहरातील रस्ते, जलसंपदा, सिंचन, जलनिस्सारण आदी महत्त्वाच्या घटकांना गती देण्याचा त्यांच्या कामकाजाचा ठसा स्पष्टपणे उमटत आहे. विकासाच्या कामांमध्ये कोणतीही ढिलाई न करता प्रत्येक विभागाने आपल्या जबाबदाऱ्या पूर्ण कराव्यात, असा संदेश त्यांनी अधिकाऱ्यांना दिला.
बैठकीतून यवतमाळ जिल्ह्याच्या विकासाला गती मिळण्याची शक्यता आहे. शहरासह ग्रामीण भागातील जनतेला याचा थेट फायदा होणार आहे. पालकमंत्र्यांच्या ठाम भूमिकेमुळे प्रशासनात कामाचा वेग आणि जबाबदारीची जाणीव वाढण्याचे संकेतही मिळत आहेत.
