महाराष्ट्रात अतिवृष्टीमुळे शेतकऱ्यांचे प्रचंड नुकसान झाल्यानंतर काँग्रेस प्रदेशाध्यक्ष हर्षवर्धन सपकाळ यांनी राज्य सरकारच्या मदत पॅकेजवर तीव्र टीका केली आहे. त्यांनी केंद्राकडे विशेष पॅकेजची मागणी करत, शेतकऱ्यांच्या न्यायासाठी आक्रमक भूमिका घेतली आहे.
महाराष्ट्राच्या मातीत रक्तरंजित मेहनत करणाऱ्या शेतकऱ्यांचे स्वप्न अतिवृष्टीने भुईसपाट झाले. पण सत्तेच्या मस्तीत मश्गूल महायुती सरकारने फसव्या पॅकेजची भूलथाप देऊन बळीराजाची क्रूर थट्टा केली. काँग्रेस प्रदेशाध्यक्ष हर्षवर्धन सपकाळ यांनी पंतप्रधान नरेंद्र मोदी आणि महायुती सरकारवर जोरदार टीकास्त्र सोडले. केंद्राने बिहार, गुजरात, पंजाबला पॅकेजची खैरात वाटली. पण महाराष्ट्राला वाऱ्यावर सोडले, असा घणाघाती आरोप सपकाळ यांनी केला. नाशिक येथे उत्तर महाराष्ट्रातील काँग्रेसच्या आढावा बैठकीत त्यांनी शेतकऱ्यांच्या जखमेवर मीठ चोळणाऱ्या सरकारचा खरपूस समाचार घेतला. आगामी निवडणुकींसाठी रणनीती आखताना त्यांनी महायुतीच्या कारभाराला काळिमा फासला.
बैठकीला ज्येष्ठ नेते बाळासाहेब थोरात, खासदार शोभा बच्छाव, सचिव बी. एम. संदीप यांच्यासह अनेक दिग्गज उपस्थित होते. स्थानिक निवडणूक आणि पक्ष संघटनेसाठी सविस्तर चर्चा झाली. पण सपकाळ यांचा रणसंग्राम केंद्र आणि राज्य सरकारच्या नाकर्तेपणावर केंद्रित होता. त्यांनी शेतकऱ्यांसाठी सरसकट हेक्टरी 50 हजार रुपये, जमीन खरडल्यास 5 लाख रुपये आणि कर्जमाफीची मागणी पुन्हा लावून धरली. पंतप्रधानांनी मुंबईत मित्राच्या विमानतळाचे उद्घाटन केले. पण शेतकऱ्यांच्या दुखण्याकडे दुर्लक्ष केले. हा महाराष्ट्राचा अपमान असल्याचा टोला त्यांनी लगावला.
Chandrashekhar Bawankule : ओबीसी विद्यार्थ्यांसाठी प्रत्येक जिल्ह्यात वसतिगृह
फसव्या उद्घाटनांचा डंका
महायुती सरकार आणि केंद्राचे निवडणूक-केंद्रित ढोंग सपकाळ यांनी उघडे पाडले. नवी मुंबई विमानतळाचे उद्घाटन म्हणजे मतांसाठीचा खटाटोप असल्याचा आरोप त्यांनी केला. यापूर्वी शिवस्मारक, आंबेडकर स्मारक यांच्या उद्घाटनांचा तामझाम झाला. पण प्रत्यक्षात काहीच नाही, अशी टीका त्यांनी केली. 15 लाख रुपये, दोन कोटी नोकऱ्या, स्मार्ट सिटी यासारख्या जुमलेबाज घोषणांचा भांडाफोड करत सपकाळ यांनी जनतेच्या असंतोषाला वाचा फोडली.
राज्यातील कायदा-सुव्यवस्थेची वाट लागल्याचा दावा करत सपकाळ यांनी महाराष्ट्राला तालिबान बनवण्याचा डाव असल्याचा गंभीर आरोप केला. नाशिकसारख्या पवित्र शहरात ड्रग्जचे रॅकेट, 44 खून आणि वाढते महिला अत्याचार यावरून त्यांनी सरकारला धारेवर धरले. गृहराज्य मंत्र्यांच्या कुटुंबाच्या नावे डान्स बार आणि गुंडांना शस्त्र परवाने यावरून त्यांनी योगेश कदम यांच्या हकालपट्टीची मागणी केली. मुख्यमंत्र्यांचा संरक्षणाचा राग आळवत त्यांनी रमी खेळणाऱ्या मंत्र्याच्या बढतीचा दाखला दिला.
Devendra Fadnavis : तीन दिवस, दोन जिल्हे, एकच ध्येय निवडणूक जिंकणे
सरन्यायाधीश भूषण गवई यांच्यावरील हल्ल्याला सपकाळ यांनी मनुवादी कृत्य ठरवले. हल्लेखोराचे आडनाव लपवण्यामागे षडयंत्र असल्याचा दावा करत त्यांनी सरकारवर संशय व्यक्त केला. डोंबिवलीतील काँग्रेस कार्यकर्त्याच्या अपमानाचे प्रकरण जोडत त्यांनी जातीवादी हल्ल्यांचा धोका स्पष्ट केला. काँग्रेसच्या वैद्यकीय कक्षात ज्ञानेश्वर गायकवाड आणि डॉ. अभ्युदय मेघे यांच्या नियुक्त्या जाहीर करत सपकाळ यांनी पक्षाची बांधणी मजबूत केली.
