भाजपमध्ये नेत्यांचे प्रवेश सुरू असतानाच काँग्रेसचे प्रदेशाध्यक्ष हर्षवर्धन सपकाळ यांनी जोरदार टीका केली आहे. भाजप लालच आणि भीती दाखवून नेत्यांना आपल्या पक्षात घेत आहे, असा आरोप त्यांनी केला.
भाजप आता चेटकीण झाली आहे, जी लालच आणि भीती दाखवून नेते गिळते, असे काँग्रेसचे महाराष्ट्र प्रदेशाध्यक्ष हर्षवर्धन सपकाळ यांनी भाजपवर पुन्हा टीकेचे बाण सोडले आहे. सपकाळ यांनी भाजपच्या नेते आयात मोहिमेवर बोचऱ्या शब्दांत थेट वार केला आहे. ‘काँग्रेसमुक्त भारत’चा नारा देणारे आता ‘काँग्रेसयुक्त भाजप’च्या पंक्तीत बसले आहेत, असा टोलाही त्यांनी लगावला आहे.
मुंबईत सर्वोदयी कार्यकर्त्यांच्या संवादात बोलताना सपकाळ यांनी भाजपच्या सत्तेच्या खेळावर, जाती-धर्माच्या राजकारणावर आणि सत्ता टिकवण्यासाठी वापरल्या जाणाऱ्या यंत्रणांवर घणाघात केला. भाजप ही पक्ष न राहता एक राजकीय राक्षस झाली आहे. जी संधीसाधूंना लालच दाखवते, तर इतरांना तपास यंत्रणांची तलवार दाखवते. काहीजणांची गळा धरून, काहींची मने खरेदी करून पक्ष वाढवणे ही कुठली लोकशाही? असा संतप्त सवाल त्यांनी उपस्थित केला.
जोरदार हल्लाबोल
सत्ता म्हणजे लोकांची सेवा, पण सत्तेचा गैरवापर करून विरोधकांना गप्प करणं, त्यांच्यावर खोटे खटले टाकून त्यांना पक्षांतराला भाग पाडणं, हा लोकशाहीचा अपमान आहे, असा थेट आरोप त्यांनी केंद्रातील मोदी सरकारवर केला. भाजपला सत्ता मिळवायची असते समाजात तेढ निर्माण करून, लोकांच्या मनात भय पसरवून. पण अशा सत्तेचा समाजाच्या विकासाशी काहीही संबंध नसतो. उलट ती समाजात विष पसरवते, असे हर्षवर्धन सपकाळ म्हणाले.
सत्तेतील 11 वर्षांनंतरही मोदी सरकार फक्त जाहिरातबाजी करण्यात व्यस्त आहे. बोलाचीच कढी, बोलाचाच भात हे धोरण कायम आहे. पेट्रोल-डिझेलच्या किंमती, महागाई, बेरोजगारी, लोकपालसारखे मुद्दे कुठे गेले? असा सवाल करीत त्यांनी अण्णा हजारे आणि रामदेव बाबांवरही कोपरखळी मारली. भाजपसाठी आवाज उठवणारे हे दोघे आता गप्प का आहेत? सरकारला प्रश्न विचारण्याचं त्यांचं धैर्य कुठे गेलं? असा खडा सवाल त्यांनी उपस्थित केला.
रेल्वे अपघातावरून संताप
मुंबईतील रेल्वे अपघाताच्या पार्श्वभूमीवर त्यांनी दु:ख व्यक्त करत रेल्वेमंत्री अश्विनी वैष्णव यांच्या राजीनाम्याची मागणी केली. एकीकडे रेल्वेचे अपघात वाढत आहे. दुसरीकडे मंत्री जाहिरातीत आणि PR मध्ये व्यस्त आहेत. ही जबाबदारी झटकून चालणार नाही, असा आक्रमक पवित्रा त्यांनी घेतला. लोकशाही वाचवायची असेल, तर आज सत्तेच्या बाजूला जाणाऱ्यांपेक्षा सत्तेला प्रश्न विचारणाऱ्यांची गरज आहे. काँग्रेस हेच मूल्य टिकवते, आणि म्हणूनच आजही या देशासाठी काँग्रेस आवश्यक आहे, असा ठाम दावा करत त्यांनी संवादाचा शेवट केला.
