नागपूर शहरातील बहुप्रतिक्षित मल्टी मॉडेल ट्रान्सपोर्ट हब प्रकल्पाला अखेर गती मिळाली आहे. उच्च न्यायालयाच्या आदेशानंतर नगरविकास विभागाने भूमी वापरातील बदलास मंजुरी दिली असून प्रकल्प प्रत्यक्षात उतरण्याच्या तयारीत आहे.
नागपूर शहराच्या हृदयात अनेक वर्षांपासून कागदावर अडकलेली, चर्चेचा विषय ठरलेली आणि जनतेच्या अपेक्षांची शिखरं गाठलेली मल्टी मॉडेल ट्रान्सपोर्ट हब (MMTH) योजना अखेर प्रत्यक्ष अंमलबजावणीच्या वळणावर येऊन पोहोचली आहे. ‘रेल्वे स्थानकाजवळ फक्त स्वप्नातली योजना’ म्हणून ओळखला जाणारा हा प्रकल्प आता वास्तवात उतरणार आहे. यामागे आहे मुंबई उच्च न्यायालयाच्या नागपूर खंडपीठाने दिलेला जोरदार दणका आणि नगरविकास विभागाला दिलेली तंबी.
नागपूरच्या मध्यवर्ती रेल्वे स्थानकासमोर हा महत्त्वाकांक्षी प्रकल्प अनेक वर्षांपासून विविध प्रशासकीय आणि कायदेशीर पेचप्रसंगात अडकला होता. मात्र, मुंबई उच्च न्यायालयाच्या नागपूर खंडपीठाने 28 जुलै रोजी या प्रकरणात नगरविकास विभागाला स्पष्ट शब्दांत जाब विचारताच, विभागाने तात्काळ जमिनीच्या वापरात बदलास मान्यता दिली. ही मंजुरी मिळताच प्रकल्पाच्या प्रत्यक्ष अंमलबजावणीसाठी ग्रीन सिग्नल मिळाला आहे.
Political War : नऊ सप्टेंबरला मतपेटी बोलेल दिल्ली दरबाराचा ‘नंबर टू’ कोण?
सुविधा विकसित करण्याची मागणी
या प्रकल्पासाठी नागपूर महानगरपालिका, रेल्वे प्रशासन आणि महाराष्ट्र राज्य मार्ग परिवहन महामंडळ या तीन संस्थांनी मिळून प्रस्ताव मांडला होता. या संस्थांनी मागणी केली होती की, या जागेचा वापर सार्वजनिक वाहतूक सुविधा विकसित करण्यासाठी करता यावा. नगरविकास विभागाने ही मागणी मंजूर करताच, आता या प्रकल्पाचे नियोजन तातडीने पुढे नेले जाणार आहे.
मल्टी मॉडेल ट्रान्सपोर्ट हब प्रकल्पाच्या अंमलबजावणीनंतर नागपूरमधील मुख्य मार्ग – रेल्वे स्टेशन, एम्स रोड, वर्धा रोड यांना एकत्र जोडणाऱ्या सुसंघटित वाहतूक व्यवस्थेचा पाया घालण्यात येणार आहे. यामुळे मसरस चौक, मोमिनपुरा, लोहापुर, उडाणपूल यांसारख्या ठिकाणांतील नागरिक आणि व्यापाऱ्यांना दिलासा मिळणार आहे. अनेक वर्षांपासून वाहतूक कोंडी, असुविधा आणि पुनर्वसनाच्या त्रासातून नागपूरकरांची सुटका होणार आहे.
प्रकल्पांना वेळेची चौकट
सरकारतर्फे न्यायालयात सादर करण्यात आलेल्या उत्तरात स्पष्ट करण्यात आले आहे की, पुढील तीन महिन्यांत या प्रकल्पाचे प्रत्यक्ष बांधकाम सुरू केले जाईल. न्यायालयानेही या प्रकल्पाला वेळेच्या चौकटीत पूर्ण करण्याचे स्पष्ट निर्देश दिले आहेत. त्यामुळे आता सर्व संबंधित यंत्रणांनी कामाला गती दिली आहे.
हा प्रकल्प केवळ वाहतुकीच्या सोयीसाठी नाही, तर नागपूर शहराच्या एकंदर नागरी रचनेला आधुनिकतेकडे नेणारा महत्त्वाचा टप्पा आहे. मल्टी मॉडेल ट्रान्सपोर्ट हबमुळे बस, रेल्वे, मेट्रो, ऑटो – सर्व वाहतूक साधनांची एकत्रित सोय होणार असून नागपूर स्मार्ट मोबिलिटीकडे वाटचाल करणार आहे. ही सुविधा एकाच ठिकाणी उपलब्ध झाल्याने नागरिकांचा वेळ, श्रम आणि खर्च या तिन्हींची बचत होणार आहे.
सततच्या आश्वासनांना कंटाळलेल्या नागपूरकरांना आता प्रत्यक्ष बदल दिसण्याची वेळ आली आहे. न्यायालयाच्या सक्रिय भूमिकेमुळे आणि प्रशासकीय हालचालींमुळे ‘कागदावरील स्वप्न’ आता प्रत्यक्ष बांधकामात रूपांतरित होणार आहे. नागपूरच्या प्रगतीचा हा ‘ट्रान्सपोर्ट टर्निंग पॉइंट’ ठरणार, यात शंका नाही.
