नगर परिषद आणि नगर पंचायतीच्या निवडणुकीची रणधुमाळी सर्वत्र सुरू आहे. अशात वाशिममध्ये राजकीय समीकरणं वेगानं बदलत आहेत.
राज्यात नगर परिषद, नगर पंचायत निवडणुकीसाठी आचारसंहिता लागू झाली आहे. पश्चिम विदर्भातील वाशिम जिल्ह्यात त्यानंतर राजकीय समीकरणं वेगवान झाली आहेत. महायुती आणि महाविकास आघाडीनं संभाव्य उमेदवारांची चाचपणी सुरू केली आहे. वाशिम जिल्ह्यात भाजपनं इच्छुकांच्या मुलाखती घेतल्या. निवडणूक आचारसंहिता लागण्यापूर्वी सरकारने वाशिम जिल्ह्याबाबत महत्वाचा निर्णय घेतला होता. त्यानुसार मानोरा तालुक्यात वाईगौळ येथे भक्त निवास उभारण्याचा निर्णय जाहीर करण्यात आला.
आचारसंहिता लागू होताच वाशिम जिल्ह्यातील राजकीय नेत्यांची सरकारी वाहनं काढण्यात आली. अशात सत्ताधारी भाजपनं मुलाखत प्रक्रिया राबविली. उमेदवारांच्या नावाची चाचपणी भाजपनं सुरू केली आहे. वाशिम जिल्ह्यात पाच ठिकाणी स्थानिक स्वराज्य संस्थेची निवडणूक होणार आहे. यात कारंजा, मंगरूळपीर, रिसोड आणि वाशिम नगर परिषदेचा समावेश आहे. मालेगाव नगर पंचायतीची निवडणूक देखील होणार आहे. जिल्ह्यातील किती स्थानिक स्वराज्य संस्था कोण काबीज करणार? याची उत्सुकता सर्वांना आहे.
शांतीतून क्रांती?
पश्चिम विदर्भातील वाशिम हा सगळ्यात लहान जिल्हा आहे. भौगोलिक आणि राजकीयदृष्टीने शांत जिल्हा म्हणून वाशिम ओळखला जातो. वाशिममध्ये राजकीयदृष्टीने फार घडामोडी घडल्याचे ऐकिवात येत नाही. संजय देशमुख हे वाशिम-यवतमाळ लोकसभा मतदारसंघाचे खासदार आहेत. वाशिम येथे भाजपचे श्याम खोडे हे आमदार आहेत. येथे शिवसेना उद्धव ठाकरे (Shiv Sena UBT) गटाचे सिद्धार्थ देवळे यांचा त्यांनी पराभव केला होता. त्यामुळे येथे नगर परिषदेत भाजप (BJP) जोर लावेल असे दिसत आहे. कारंजामध्येही भाजपच्या आमदार सई डहाके या सत्तेत आहेत. परंतु राष्ट्रवादी काँग्रेस शरदचंद्र पवार (NCP SP) गटाचे ज्ञायक पाटणी हे नगर परिषद निवडणुकीत किती नगरसेवक विजयी करू शकतात याकडे अनेकांचे लक्ष आहे.
नगर परिषदेप्रमाणे महाविकास आघाडी आणि महायुती यांचा जिल्हा परिषद आणि पंचायत समितीच्या निवडणुकीत देखील चांगलाच कस लागणार आहे. जिल्हाधिकारी योगेश कुंभेजकर यांनी नुकतीच या निवडणुकीसाठी आरक्षण अधिसूचना जाहीर केली आहे. वाशिम जिल्हा परिषदेत (Zilla Parishad) एकूण 52 जागा आहेत. कारंजा पंचायत समितीत 16 निर्वाचक गण आहेत. मानोरा पंचायत समितीत निर्वाचक गणांची संख्या 16 आहे. मंगरूळपीर पंचायत समिती 16 गण आहेत. मालेगाव पंचायत समितीमध्ये गणांची संख्या एकूण 18 आहे. रिसोड पंचायत समितीच्या 18 गणांसाठी निवडणूक होणार आहे. वाशिम पंचायत समितीत 20 निर्वाचक गणांचे आरक्षण निश्चित झाले आहे.
