बुलढाणा विधानसभा मतदारसंघातील अवघ्या 841 मतांच्या फरकाने झालेला विजय आता न्यायालयीन कक्षात गेला आहे. ठाकरे गटाच्या जयश्री शेळके यांनी मतमोजणीतील अनियमिततेचा ठाम दावा करत निकालाला आव्हान दिले आहे.
बुलढाणा विधानसभा मतदारसंघातील निकालानंतर राजकीय वातावरण तापले आहे. केवळ काही शेकडो मतांच्या फरकाने पराभूत झालेल्या शिवसेना ठाकरे गटाच्या उमेदवार जयश्री शेळके यांनी न्यायालयाची दारं ठोठावत वादाचा मुद्दा आणखी गडद केला आहे. निवडणुकीत मतमोजणीदरम्यान झालेल्या अनियमिततेमुळे निकालावर प्रश्नचिन्ह निर्माण होत असल्याचा ठाम दावा त्यांनी आपल्या याचिकेत केला आहे. या घडामोडीमुळे बुलढाणा जिल्ह्यातील राजकीय समीकरणांना नवी दिशा मिळण्याची शक्यता व्यक्त केली जात आहे.
जयश्री शेळके यांनी मुंबई उच्च न्यायालयाच्या नागपूर खंडपीठात दाखल केलेल्या याचिकेने या निवडणुकीचा निकाल केवळ राजकीय नव्हे तर कायदेशीर पातळीवरही चर्चेचा विषय ठरला आहे. निवडणूक प्रक्रियेत झालेल्या कथित त्रुटी आणि त्याचे दूरगामी परिणाम यामुळे सर्वांच्याच नजरा आता न्यायालयाच्या निर्णयाकडे लागल्या आहेत.
Chandrashekhar Bawankule : फडणवीसांना लक्ष्य करण्यामागे जातीय राजकारण
शेळकेंचा आक्षेप
जयश्री शेळके यांच्या याचिकेनुसार मतदार यादीत तब्बल 3 हजार 561 बोगस नावे होती. काही मतदारांची नावे दोन-दोन ठिकाणी आढळली, तर काही ठिकाणी मृत व्यक्तींच्या नावावर मतदान झाल्याचे उदाहरण त्यांनी न्यायालयासमोर ठेवले आहे. एवढेच नव्हे, तर मतमोजणी प्रक्रियेतही अनेक त्रुटी झाल्याचा दावा करत त्यांनी संपूर्ण ईव्हीएम पुन्हा मोजण्याची मागणी केली आहे.
या संदर्भात शेळकेंनी न्यायालयासमोर महत्त्वाच्या कागदपत्रांची मागणी केली आहे. त्यामध्ये मतदारसंघाची संपूर्ण मतदारयादी, मतदान केंद्रांवरील सीसीटीव्ही फुटेज तसेच विजयी उमेदवार संजय गायकवाड यांना देण्यात आलेले प्रमाणपत्र सादर करावे, अशी विनंती केली आहे. या मुद्द्यांवर त्यांच्या वतीने ॲड. आकाश मून यांनी सविस्तर युक्तिवाद केला आहे.
गायकवाडांचा प्रतिआक्षेप
शिवसेना शिंदे गटाचे विजयी उमेदवार संजय गायकवाड यांनी मात्र या याचिकेला सुरुवातीलाच आक्षेप घेतला आहे. त्यांनी दिवाणी प्रक्रिया संहितेतील ऑर्डर 7, नियम 11 अंतर्गत अर्ज दाखल करून शेळकेंची याचिका फेटाळावी, अशी मागणी न्यायालयासमोर केली आहे. मात्र शेळकेंनी त्याला ठाम उत्तर देत हा अर्ज गुणवत्ताहीन व निराधार असल्याचे नमूद केले आहे. निकालावर सखोल सुनावणी करूनच निर्णय व्हावा, असा त्यांचा आग्रह आहे.
गेल्या विधानसभा निवडणुकीत बुलढाणा मतदारसंघातील स्पर्धा चुरशीची ठरली. संजय गायकवाड यांनी 91 हजार 660 मते मिळवत विजय मिळवला, तर जयश्री शेळके यांना 90 हजार 819 मते मिळाली. अवघ्या 841 मतांनी झालेला हा विजय आज वादग्रस्त ठरत आहे. या अल्प फरकामुळेच संपूर्ण मतमोजणी प्रक्रियेवर संशय घेतला जात आहे.
वादाच्या पार्श्वभूमीवर काँग्रेस नेते राहुल गांधी यांनी अलीकडेच महाराष्ट्रातील निवडणुकींमध्ये मोठ्या प्रमाणात मतचोरी झाल्याचा आरोप केला होता. त्यानंतर बुलढाण्यातील हा प्रकरण राजकीय दृष्ट्या आणखी गंभीर बनले आहे. या याचिकेच्या माध्यमातून केवळ एका मतदारसंघाचा निकाल धोक्यात आलेला नसून, राज्यातील आगामी निवडणूक प्रक्रियेवरही याचे दूरगामी परिणाम होऊ शकतात.
