नागपूर हिंसाचार आणि मालेगाव घोटाळ्यांची चौकशी सुरू झाली आहे. भाजप नेते डॉ. किरीट सोमय्या यांनी कठोर कारवाईची मागणी केली आहे. फहीम खानच्या संशयास्पद संबंधांचा तपास होणार आहे.
नागपूर शहरात नुकत्याच घडलेल्या हिंसाचारानंतर या घटनेच्या सूत्रधारांबाबत तपास सुरू झाला आहे. या दंगलीला भडकवण्यामागे मास्टरमाइंड फहीम खान असल्याचे संकेत मिळाले आहेत. त्याच्या राजकीय, सामाजिक तसेच मुस्लिम अतिरेकी संघटनांशी असलेल्या संबंधांबाबत संशय बळावत आहे. या पार्श्वभूमीवर, भाजप नेते आणि माजी खासदार डॉ. किरीट सोमय्या यांनी फहीम खानच्या संपर्कातील व्यक्ती आणि त्याच्या कनेक्शनबाबत सखोल चौकशीची मागणी केली आहे.
डॉ. किरीट सोमय्या यांनी नागपूरचे पोलीस आयुक्त डॉ. रविंद्र कुमार सिंगल यांना पत्र पाठवून तातडीने कारवाही करण्याची मागणी केली आहे. नागपूर हिंसाचार आणि मालेगावमधील काही गंभीर घोटाळ्यांमधील संभाव्य दुवे तपासण्याचेही त्यांनी सुचवले आहे. महाराष्ट्र पोलीस आणि प्रवर्तन संचालनालय (ED) या दोन्ही यंत्रणांनी याप्रकरणी कठोर पावले उचलावीत, अशी त्यांनी मागणी केली आहे.
जिल्हा फंडिंग लबाडी
गेल्या काही महिन्यांत मालेगावमध्ये मोठे आर्थिक गैरव्यवहार उघडकीस आले आहेत. ऑक्टोबर-नोव्हेंबर 2024 विधानसभा निवडणुकीच्या काळात सिराज मोहम्मद आणि मोहम्मद बगाड यांनी 22 कोटी रुपयांचा वोट जिल्हा फंडिंग घोटाळा घडविला. या प्रकरणात मोठ्या प्रमाणावर भ्रष्टाचार झाल्याचे समोर आले आहे. महाराष्ट्र पोलीस आणि ED यांनी याप्रकरणी ठोस कारवाई सुरू केली आहे. या आर्थिक गैरव्यवहारामुळे जिल्हा प्रशासनाच्या निधीचा गैरवापर झाला आहे. त्याचे थेट परिणाम जनतेवर झाले आहेत. संबंधित व्यक्तींवर कठोर कारवाई व्हावी आणि या घोटाळ्याचे सर्व धागेदोरे उजेडात आणले जावेत, अशी मागणी होत आहे.
जन्म प्रमाणपत्र घोटबाजी
मालेगावमध्ये आणखी एक मोठा घोटाळा समोर आला आहे. अनेक अपात्र आणि बांगलादेशी घुसखोरांनी बनावट दस्तऐवजांच्या आधारे उशिरा जन्म प्रमाणपत्रे मिळवली आहेत. या गैरव्यवहारात मोठ्या प्रमाणावर संगनमत झाले आहे . बनावट कागदपत्रांद्वारे नागरिकत्व मिळवण्याचा प्रकार उघडकीस आला आहे. याप्रकरणी गुन्हे दाखल करण्यात आले आहे. आतापर्यंत दोन डझनहून अधिक लोकांना अटक करण्यात आली आहे. या संदर्भात डॉ. किरीट सोमय्या यांनी बांगलादेशी घुसखोरांना मदत करणाऱ्या व्यक्तींची चौकशी करण्याची मागणी केली आहे. तसेच, नागपूर हिंसाचार आणि मालेगाव घोटाळ्यांचा एकमेकांशी काही संबंध आहे का, याचीही तपासणी करावी, असे त्यांनी सुचवले आहे.
संबंधांची चौकशी आवश्यक
फहीम खान हा नागपूर हिंसाचाराचा मास्टरमाइंड असल्याचा संशय व्यक्त केला जात आहे. शिवाय, त्याचे मालेगावमधील काही राजकीय आणि अतिरेकी संघटनांशी संबंध असल्याचेही समोर येत आहे. त्यामुळे त्याच्या बांगलादेशी घुसखोरांशी असलेल्या कनेक्शनची कसून चौकशी करण्याची मागणी जोर धरत आहे. डॉ. किरीट सोमय्या यांनी या प्रकरणी महाराष्ट्र सरकार आणि केंद्र सरकारने तातडीने लक्ष घालून आवश्यक ती कारवाई करावी, अशी मागणी केली आहे. नागपूर हिंसाचार, मालेगाव घोटाळा आणि बांगलादेशी घुसखोर यांचे धागेदोरे कुठपर्यंत जातात, हे स्पष्ट करण्यासाठी तपास यंत्रणांनी कठोर कारवाई करण्याची गरज असल्याचे त्यांनी ठामपणे मांडले आहे.
