धान उत्पादकांचा जिल्हा असलेल्या जिल्ह्यात सध्या भ्रष्टाचाराचा ‘भंडारा’ सुरू आहे. आपण सगळे भाऊ, मिळुन खाऊ हा प्रकार आता बंद होणार आहे. त्याला कारणही तसेच आहे.
पूर्व विदर्भातील भंडारा जिल्ह्यातील नगर परिषदेत सध्या भ्रष्टाचाराचा मुद्दा गाजत आहे. नगर परिषदेतील मुख्याधिकाऱ्यांनी पैसे कमाविण्याचा आणि वाटपाचा ‘भंडारा’च (महाप्रसाद) सुरू केल्याचा आरोप झाला. याप्रकरणी भाजप नेते माजी मंत्री आमदार डॉ. परिणय फुके यांनी लक्ष घालताच नोटांनी वाटलेल्या पत्रावळी उचलण्याचे काम अधिकाऱ्यांनी सुरू केलं. मात्र तोवर फार उशिर झाला होता. भंडाऱ्याचे जिल्हाधिकारी सावन कुमार यांनी अधिकाराचा दुरूपयोग केल्याबाबत भंडारा नगर परिषदेचे मुख्याधिकारी करण चव्हाण यांना नोटीस बजावली आहे. या नोटीसनंतर आता चव्हाण यांची उचलबांगडी होणार आहे.
चव्हाण हे मुख्याधिकारी पदावर असल्यास भ्रष्टाचाराचे पुरावे नष्ट होऊ शकतात. त्यामुळे त्यांना हटवून लवकरच एका महिला मुख्याधिकाऱ्याची नियुक्ती केली जाणार आहे. नियुक्ती होताच ही महिला अधिकारी रौद्र रूप धारण करून पैसे वाटपाचा महाप्रसाद कसा झाला, हे शोधून काढणार आहे. सगळ्यात महत्वाचे म्हणजे भंडारा नगर परिषदेतील एक मोठा ठेकेदार या प्रकरणात अडचणीत येण्याचे संकेत आहेत. हा ठेकेदार कोण हे नगर परिषदेतील ‘बच्चा बच्चा’ जाणतो. आपण ‘बच’णार असल्याची ‘वाणी’सध्या हा ठेकेदार बोलत आहे. मात्र सगळ्यात आधी त्याच्यावरच कारवाईची कुऱ्हाड कोसळणार आहे.
ओव्हर कॉन्फिडन्स नडला
भंडारा आणि पवनी नगर परिषदेत एकापाठोपाठ प्रकल्पांचे कंत्राट मंजूर करताना दोन्ही मुख्याधिकारी ‘ओव्हर कॉन्फिडन्स’मध्ये होते. ज्याला आपल्या कमाईतीन नैवेद्य अर्पण केला तो वाली आपल्याला वाचवेल, असे दोघांनाही वाटत होते. मात्र या सगळ्या खेळीवर माजी मंत्री आमदार डॉ. परिणय फुके यांनी पाणी फेरले आहे. आमदारांनी अद्याप एक ‘फुक’ही मारलेली नाही. मात्र अधिकाऱ्यांचे मनसुबे पत्त्याच्या बंगल्याप्रमाणे कोसळताना दिसत आहे. अशात भंडारा नगर परिषदेत येणाऱ्या नवीन मुख्याधिकारी मॅडम भ्रष्टाचाऱ्यांना चांगेलच थंडगार करतील असे दिसत आहे.
संभाव्य कारवाईची कुणकुण लागल्याने भंडारा आणि पवनी या दोन्ही नगर परिषदेतील मुख्याधिकाऱ्यांना ऐन हिवाळ्याच्या सुरवातीतच घाम फुटत आहे. गेल्या काही दिवसांपासून हवामानात बदल होत आहे. मध्येच ऊन तापत आहे. अचानक पावसाच्या सरी कोसळत आहे. त्यानंतर थंडीची हुडहुडी जाणवत आहे. त्यामुळे नेमके काय सुरू आहे? याची कल्पना कोणीही करू शकत नाही. असाच प्रकार भंडारा नगर परिषदेतील राजकीय, प्रशासकीय हवामानातही जाणवत आहे. भ्रष्टाचाराचा पाऊस पडल्यानंतर आता येथील वातावरण अचानक आपत आहेत. ऑक्टोबर हिटचे चटके अधिकाऱ्यांना जाणवत आहे. अशात कारवाईची कुऱ्हाड कोसळली तर अनेक जण गार होणार आहेत. यासाठी भंडारा नगर परिषदेत येणाऱ्या नवीन महिला मुख्याधिकाऱ्यांची भूमिका अत्यंत महत्वाची ठरणार आहे.
