राष्ट्रवादी काँग्रेसच्या पाठोपाठ भारतीय जनता पार्टीने स्टार प्रचारकांची यादी जाहीर केली आहे. प्रचारकांच्या यादीमध्ये विदर्भातील आठ नेत्यांचा समावेश आहे.
नगरपंचायत आणि नगर परिषदेसाठी उमेदवारी अर्ज दाखल करण्याची प्रक्रिया सुरू आहे. अशात राष्ट्रवादी काँग्रेसने स्टार प्रचारकांची यादी जाहीर केली आहे. त्याच दिवशी भारतीय जनता पार्टीने देखील 40 जणांचा समावेश असलेली जम्बो यादी जाहीर केली आहे. प्रदेशाध्यक्ष रवींद्र चव्हाण यांच्या स्वाक्षरीने ही नावे जाहीर करण्यात आली आहेत. यामध्ये विदर्भातील आठ जणांचा समावेश आहे.
मुख्यमंत्री देवेंद्र फडणवीस आणि केंद्रीय मंत्री नितीन गडकरी हे भाजपचे स्टार प्रचारक असतील हे वेगळे सांगण्याची गरज नाही. महसूल मंत्री चंद्रशेखर बावनकुळे हे देखील कंबर पासून प्रचारात उतरणार आहेत. भाजपचे ज्येष्ठ नेते सुधीर मुनगंटीवार यांच्यावरही भारतीय जनता पार्टीने प्रचाराची धुरा सोपवली आहे. पश्चिम विदर्भातून मंत्री अशोक उईके हे स्टार प्रचारक असतील. याशिवाय स्टार प्रचारक म्हणून जळगाव जामोदचे आमदार डॉ. संजय कुटे आणि अकोला पूर्व चे आमदार रणधीर सावरकर यांचाही समावेश करण्यात आला आहे.
भाभींना डच्चू
तत्कालीन मुख्यमंत्री उद्धव ठाकरे यांच्याविरुद्ध हनुमान चालीसा आंदोलन करणाऱ्या माजी खासदार नवनीत राणा यांना मात्र स्टार प्रचारकांच्या यादीतून वगळण्यात आली आहे. वर्धा आणि अमरावती जिल्ह्यातून कोणत्याही नेत्याचा प्रचाराच्या यादीमध्ये समावेश नाही. याशिवाय वाशिम जिल्ह्यातून देखील कोणतेही मोठे नाव यादीमध्ये दिसत नाही. गोंदिया जिल्ह्यातून अशोक नेते यांना संधी देण्यात आली आहे. भंडारा जिल्ह्यामध्ये माजी मंत्री आमदार डॉ. परिणय फुके यांना यापूर्वीच निवडणूक प्रभारी करण्यात आले आहे.
डॉ. फुके यांच्यावर मोठी जबाबदारी पक्षाने सोपावली आहे. गडचिरोली जिल्ह्यातून देखील कोणतेही नाव स्टार प्रचारकांच्या यादीमध्ये नाही. राष्ट्रवादी काँग्रेसच्या यादीमध्ये मात्र माजी मंत्री धर्मराव बाबा आत्राम यांच्या नावाचा समावेश आहे. यवतमाळ जिल्ह्यातून भाजपने उईके यांचे नाव यादीत घेतले आहे. राष्ट्रवादी काँग्रेसने देखील राज्यमंत्री इंद्रनील नाईक यांना स्टार प्रचारक केले आहे.
माजी मंत्री सुधीर मुनगंटीवार यांची चंद्रपूर जिल्ह्यातील राजकारणावरील पकड कायम आहे. याशिवाय राजकारणाचा प्रदीर्घ अनुभव सुधीर मुनगंटीवार यांना आहे. त्यामुळे त्यांच्यावर भारतीय जनता पार्टीने आपला विश्वास कायम ठेवला आहे. पद असो अगर नसो पक्षासाठी काम करणे हा सुधीर मुनगंटीवार यांचा मूळ पिंड आहे. त्यामुळे मुनगंटीवार निवडणुकीमध्ये नक्कीच कमाल दाखवतील यात शंका नसल्याचे भाजपच्या वर्तुळात बोलले जात आहे.
अकोल्याचे आमदार रणजीत सावरकर हे भाजपच्या प्रदेश कार्यकारणी मध्ये सदस्य आहेत. त्यामुळे पक्षाने त्यांच्यावरही मोठी जबाबदारी दिली आहे. लोकसभा आणि विधानसभा निवडणुकीमध्ये त्यांनी भाजपसाठी काम केले. त्यामुळे त्यांना या श्रमाचे फळ भाजपने दिले आहे. महाविकास आघाडीच्या सर्व आरोपांना खोडून काढण्याची भूमिका या सर्व स्टार प्रचारकांना निभवावी लागणार आहे.
