राज्यात सध्या स्थानिक स्वराज्य संस्थांच्या निवडणुकीची रणधुमाळी सुरू आहे. अशातच अकोला भाजपचे चित्र सध्या विस्कटलेले दिसून येत आहे.
आजपर्यंत भारतीय जनता पार्टीला अनेक कार्यकर्ते सोडून गेले. ज्यानंतर त्यांची घरवापसीही झाली. ते म्हणतात न ‘सुबह का भूला शाम को घर आ जाए तो उसे भूला नहीं कहते हैं’, अगदी तसेच. याशिवाय पार्टीमध्ये काही राजी, नाराजीचे नाट्य ही आजपर्यंत घडले. काही लोकांना पक्षापासून बाजूला काढण्यात आले होते. तर काहींनी निवडणुकीवेळी बंडखोरी देखील केली होती. पण भारतीय जनता पार्टीने देशभरामध्ये मन मोठे करून आजपर्यंत अनेकांना आपल्या प्रवाहात पुन्हा सामील करून घेतले. अकोल्याच्या बाबतीत बोलायचं तर अकोल्यामध्ये असे एक नेते आहे जे ‘विजय’ मिळवू शकले नाही. ते भाजप सोडून गेले. परंतु त्यांनाही नंतर भारतीय जनता पार्टीने पुन्हा पक्षात आणले. त्यानंतर एका निवडणुकीची उमेदवारी देखील या नेत्याला देण्यात आली होती. परंतु म्हणतात ना ‘दैव देते आणि कर्म नेते’. असंच काहीसे घडले.
भाजप नावाच्या दैवाने उमेदवारी दिली. पण या नेत्याला कर्माने विजय मिळवता आला नाही. अकोला भाजपच्या बाबतीत बोलायचं तर काही नेत्यांचं प्रदेश पातळीवरचे नेते ऐकत असतात असे सांगितल्या जाते. यापूर्वीचे प्रदेशाध्यक्ष चंद्रशेखर बावनकुळे यांचा खिसा गरम करून त्यांना पॅक करून ठेवले आहे असा अपप्रचार अकोल्यामध्ये केला जायचा. आता भाजपचे प्रदेशाध्यक्ष बदलले आहे. रवींद्र चव्हाण हे नवीन प्रदेशाध्यक्ष आहेत. मात्र अद्याप रवींद्र चव्हाण यांच्या बाबतीत ‘आम्ही त्यांना पैसे खाऊ घालतो’ असे कोणतेही विधान अकोल्याच्या भाजपमध्ये ऐकायला आले नाही. मात्र सध्या असे काही नेते ज्यांना विजय मिळवू शकत नाही त्यांचं भाजपच्या प्रदेश कार्यकारिणीने किती दिवस ऐकायचं हा देखील प्रश्न उपस्थित होत आहे. अकोला पूर्व विधानसभा मतदारसंघाचा विजय रणधीर सावरकर यांनी स्वबळावर मिळवला होता.
Maharashtra : महायुतीच्या ‘आका’ कारभारावर बच्चू कडूंचा प्रहार
पक्षात सुधारणा आवश्यक
लोकसभा निवडणुकीमध्ये अनुप धोत्रे यांचा विजय हा सामूहिक प्रयत्न होता. मूर्तिजापूर मधला विजय हरीश पिंपळे यांनी स्वतःच्या हिंमतीवर आणि ताकतीने जनसंपर्काच्या साहाय्याने मिळवला. अकोटमध्येही भाजपने विजय मिळवला तिथल्या नेत्याच्या जोरावर. परंतु बाळापूर आणि अकोला पश्चिम या दोन जागा मात्र भाजपने आपल्या कर्मामुळे गमावल्या. या जागेवर सध्या शिवसेना आणि काँग्रेसचे वर्चस्व आहे. वर्चस्व आहे. या जागांवरती पराभव व्हावा अशी भाजपच्या अनेक स्थानिक नेत्यांची इच्छा होती असे बोलल्या जाते. तसे प्रयत्नही सर्वांनी केले. या सर्वांमध्ये हरीश अलिमचंदानी, डॉ. अशोक ओळंबे, नारायणराव गव्हाणकर यांना सध्या भारतीय जनता पक्ष पार्टीने पक्षाच्या बाहेर केले आहे. पण भारतीय जनता पार्टीचा अकोल्यातला इतिहास पाहिला तर सुरुवातीपासूनच नारायणराव गव्हाणकर, डॉ. अशोक ओळंबे, किशोर मांगटे पाटील, गोवर्धन शर्मा, संजय धोत्रे आणि गिरीश जोशी असे अनेक नावे घेता येतील ज्यांनी भाजपच्या रोपट्याला वटवृक्ष केले.
सामान्यांसोबत व्यापारी आघाडी असेल, वैद्यकीय आघाडी असेल, शेतकऱ्यांची आघाडी असेल अशा सर्व ठिकाणी भाजपला मोठा केले. पण कालांतराने अकोला भाजपमध्ये हिटलरशाही सुरू झाली. ज्यानंतर लोकांचा अपमान करण्याचा क्रम सुरू झाला. त्यामुळे दुखावलेले नेते भाजपपासून दूर झाले. आजही हे नेते भारतीय जनता पार्टीमध्ये येऊ शकतात अशी शक्यता आहे. नारायणराव गव्हाणकर यांची घरवापसी करणे भाजपसाठी मोठी गोष्ट मानली जाईल. डॉ. अशोक ओळंबे हे नाराज असले तरीही, ते भारतीय जनता पार्टी बद्दल कधीही अपशब्द बोलत नाहीत. हरीश अलिमचंदानी हे देखील तन, मन, धन आणि आत्म्यापासून भाजपचे आहे. आजही सोशल मीडियावर त्यांच्या सर्व पोस्ट भाजपच्या नेत्यांच्याच असतात. त्यामुळे देशामध्ये चुकीला माफी देत नेत्यांना भाजप सुधारत आहे, तर अकोल्याच्या बाबतीमध्ये हा फार्मूला का लागू होऊ शकत नाही हा प्रश्न आता उपस्थित केला जात आहे.
विशेष म्हणजे लवकरच स्थानिक स्वराज्य संस्थांची निवडणूक होणार आहे. अशा परिस्थितीमध्ये अकोला महानगरपालिका हातातून निसटू नये यासाठी भाजपला जोर लावावा लागणार आहे. प्रदेश, जिल्हा, शहर कार्यकारणी मध्ये बदल करण्यासोबतच नाराज झालेल्या गटाला पुन्हा जवळ करण्यासाठी व्यापक बदल करावे लागतील. आता ज्या नेत्यांचे क्रेडिट नाही किंवा त्यांच्याजवळ कार्यकर्ते किंवा पदाधिकारी नाही, अशा नेत्यांचे ऐकायचे की पक्षाला वाचवायचे हा निर्णय आता भाजपकडे आहे.
Vijay Wadettiwar : दहा ऑक्टोबरला नागपूरच्या रस्त्यावर ओबीसींचा हुंकार
