राज्यातील 29 महानगरपालिकांच्या आगामी सार्वत्रिक निवडणुकींसाठी मतदार यादी तयार करण्याचा कार्यक्रम राज्य निवडणूक आयोगाने जाहीर केला आहे. प्रारूप यादीवर हरकती व सुधारणा नोंदवण्यासाठी 6 ते 14 नोव्हेंबरचा कालावधी राखण्यात आला आहे.
राज्यातील 29 महानगरपालिकांमध्ये आगामी निवडणुकींसाठी मतदार यादी तयार करण्याची प्रक्रिया राज्य निवडणूक आयोगाने ठराविक वेळापत्रकानुसार सुरु केली आहे. 1 जुलै 2025 ही यादी ग्राह्य धरण्याची तारीख म्हणून निश्चित करण्यात आली आहे. प्रारूप मतदार यादीवर दाखल झालेल्या हरकतींवर विचार करून 28 नोव्हेंबर रोजी प्रभागनिहाय अंतिम यादी अधिप्रमाणित केली जाणार आहे. यामुळे मतदान केंद्रांची यादी 4 डिसेंबरला जाहीर होईल. मतदान केंद्रनिहाय मतदार यादी 10 डिसेंबर रोजी प्रसिद्ध केली जाईल.
राज्य निवडणूक आयोगाने महानगरपालिकांना दिलेल्या यूजर आयडी व पासवर्डच्या माध्यमातून 14 ऑक्टोबरपासून आयोगाच्या अधिकृत वेबसाईटवर विधानसभेच्या मतदार याद्या डाऊनलोड करता येतील. या आधारे महानगरपालिकांसाठी प्रारुप मतदार याद्या तयार करण्यात आल्या आहे. त्यावर हरकती व सूचना दाखल करण्यासाठी 6 नोव्हेंबर ते 14 नोव्हेंबर या कालावधीसाठी संधी दिली आहे. संबंधित नागरिक, राजकीय पक्ष व उमेदवार या काळात आपली हरकत किंवा दुरुस्तीची सूचना आयोगाकडे नोंदवू शकतात. ज्यावर निर्णायक कारवाई करून अंतिम यादी तयार केली जाईल.
BJP : रात्रंदिवस झटणाऱ्या कार्यकर्त्यांना निवडणुकीत ‘गोल्डन तिकीट’
निवडणूक आयोगाची तयारी
विधानसभेच्या मतदार याद्यांच्या आधारे तयार झालेल्या प्रारुप यादीवर नागरिकांना हरकती दाखल करण्याची संधी मिळाली आहे. 6 नोव्हेंबरपासून सुरू होणाऱ्या या प्रक्रियेत कोणत्याही विसंगती किंवा दुरुस्ती आयोगाकडे नोंदवता येईल. राज्य निवडणूक आयोगाने सुनिश्चित केले आहे की प्रत्येक हरकती काळजीपूर्वक तपासली जाईल. योग्य त्या सुधारणा केल्या जातील. या प्रक्रियेनंतर अंतिम यादी सार्वजनिक करण्याचा मार्ग मोकळा होईल.
राज्य निवडणूक आयोगाने सर्व महानगरपालिकांना ठराविक वेळापत्रकानुसार काम पूर्ण करण्याचे निर्देश दिले आहेत. मतदार यादीतील नोंदींची शुद्धता सुनिश्चित करणे हे प्रमुख उद्दिष्ट ठरवले आहे. आयोगाने केंद्रीय निवडणूक आयोगाला विनंती केली आहे की, महाराष्ट्रातील मतदार यादीची विशेष सुधारणा पडताळणी मोहीम (SIR) जानेवारी 2026 पर्यंत पुढे ढकलता यावी. सर्वोच्च न्यायालयाने 6 मे 2025 च्या आदेशाद्वारे स्थानिक स्वराज्य संस्थांच्या निवडणूक चार महिन्यांत पूर्ण करण्याचे प्रयत्न करण्याचे निर्देश दिले आहे. आयोगाने या मार्गदर्शक तत्त्वांचा आदर करत वेळापत्रकानुसार कामाची तयारी पूर्ण केली आहे.
राज्यातील 29 महानगरपालिकांच्या सार्वत्रिक निवडणुकींसाठी मतदार यादीची सुरळीत प्रक्रिया ही नागरिकांच्या सहभागाच्या दृष्टिकोनातून अत्यंत महत्त्वाची आहे. आयोगाच्या मार्गदर्शनाखाली महानगरपालिका अधिकारी आणि कर्मचारी यादीतील नोंदींची शुद्धता आणि अचूकता सुनिश्चित करत आहेत. ज्यामुळे आगामी निवडणुकींचा मार्ग सुरक्षित आणि सुव्यवस्थित होईल.
