राज्यात नगर परिषद, नगर पंचायत निवडणूक होत आहे. मतदान अवघ्या काही तासांवर आले आहे. अशात काँग्रेस प्रदेशाध्यक्ष हर्षवर्धन सपकाळ यांनी महायुतीवर टीका केली आहे.
स्थानिक स्वराज्य संस्थेच्या निवडणूक प्रचारात सत्ताधारी पक्षाचे मंत्रीच ‘कोणाचेही पैसे घ्या, पण मतं मात्र आम्हालाच द्या’, असे जाहीरपणे सांगत आहेत. हा प्रकार लोकशाहीचे धिंडवडे काढणारा आहे. मंत्रीच जाहीरपणे कबुली देत आहेत. महायुतीचे काम ‘पैसा फेक तमाशा देख’ असे आहे. याचा अर्थ काँग्रेस व राहुल गांधी यांनी उघड केलेली मतचोरीवर खरी आहे.
एक प्रकारे त्यावर हे शिक्कामोर्तबच आहे, असे महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी म्हटले आहे. सपकाळ बुलढाणा येथे प्रसार माध्यमांशी बोलत होते. सपकाळ म्हणाले, स्थानिक स्वराज्य संस्था निवडणूक कार्यकर्त्यांची निवडणूक असते. कार्यकर्त्यांनी ही निवडणूक स्वबळावर लढवावी. काँग्रेस व महाविकास आघाडीतील पक्ष निवडणूक लढत आहे. राज्यात काही ठिकाणी आघाडी आहे.
कार्यकर्त्यांना संधी
काही ठिकाणी स्वबळावर निवडणूक लढली जात आहे. काँग्रेसने शरद पवार व उद्धव ठाकरे यांना याची कल्पना दिली होती. यामुळे आघाडीत कोणी नाराज नाही. तसा प्रश्नच येत नाही. जिल्हा परिषद व महानगर पालिका निवडणुकीचा कार्यक्रम जाहीर झालेला नाही. त्यावर नंतर निर्णय घेतला जाईल, असं काँग्रेस प्रदेशाध्यक्ष हर्षवर्धन सपकाळ यांनी स्पष्ट केलं.
महायुतीत अंतर्गत वाद आहेत. महायुतीतील ट्रिपल इंजिन सरकार हे सत्तेशिवाय राहु शकत नाही. भाजप, शिवसेना व राष्ट्रवादी काँग्रेस अजित पवार गट हे सत्तेसाठी लाचार आहेत. त्यामुळे महायुतीत कितीही धुसफूस असली, तरी ते सत्तेसाठी एकमेकांशी जुळवून घेतील. असे सपकाळ म्हणाले. तीनही पक्षांची ही अपरिहार्यता आहे. ही लाचारी घातक असल्याचेही सपकाळांनी स्पष्ट केले.
कुंभचा बहाणा
तपोवनातील झाडांची कत्तल पैसे खाण्यासाठी आहे. कुंभमेळ्यासाठी नाशिकात हा प्रकार होत आहे. 1 हजार 800 झाडं तोडली जातील. साधु हे दऱ्याखोऱ्या, डोंगर, हिमालय तसेच निसर्गाच्या सानिध्यात राहतात. ही आध्यात्माची परंपरा आहे. नाशिकमध्ये कुंभमेळा होत आहे. पण वनांचा त्यातून ऱ्हास होणार आहे. झाडांची कत्तल करावीच लागेल. पैसे लाटण्यासाठी हे असल्याची टीका सपकाळ यांनी केली.
कुंभमेळा आहे. त्याचे कारण दिले जात आहे. कुंभ हे एक निमित्त आहे. खरे कारण झाडं तोडून मैदान माकळं करायचे आहे. त्यातून खिसे भरायचे आहेत, असा प्रकार आहे. मुख्यमंत्री देवेंद्र फडणवीस यांच्याबद्दल सपकाळ यांनी प्रतिक्रिया दिली. ते मला ओळखत नाहीत. त्यावर काहीही हरकत नाही. आम्ही दोघे विदर्भातील आहोत. ते मुख्यमंत्री असताना आपण आमदार होतो.
Congress : निवडणूक आयोगाचा ‘टू स्टार’ नावाखाली ‘दोन नंबरी’ कारभार
मेरी अलग पहचान
पाच वर्ष विधानसभेत आपण विविध प्रश्न मांडले. त्याची उत्तरे फडणवीस यांनी दिली आहेत. आपल्याला ओळखावे हा अट्टाहास नाही. ओळखले जावे यासाठी जे ‘प्रोफाइल’ हवे तसा भ्रष्टाचारही आपण केलेला नाही. पक्ष बदललेले नाहीत. ईडीची प्रकरणे पाठीमागं नाहीत. आपल्याकडे संस्था नाहीत. आपण सर्वसाधारण परिवारातील आहोत, असं प्रदेशाध्यक्ष हर्षवर्धन सपकाळ बुलढाण्यात बोलताना म्हणाले.
फडणवीस यांची बुद्धी तल्लख आहे असे वाटत होते. ओळखीचे त्यांचे निकष काय आहेत, ते माहीत नाही असा टोलाही त्यांनी लगावला. फडणवीस यांनी जनतेला दिलेली आश्वासने मात्र विसरू नये. महाराष्ट्राचे वाट्टोळे करणारे गुंड कोण आहेत? त्यांना तरी त्यांनी ओळखावे. अशा गुंडांना धडा शिकवावा, अशी अपेक्षा हर्षवर्धन सपकाळ यांनी व्यक्त करीत चांगला टोला लगावला.
म्हणून ते गजनी
मुख्यमंत्र्यांना विस्मरण होत आहे. त्यामुळं आपण त्यांना गजनी म्हणालो. त्यांना त्यांच्या विधानांचा विसर पडला आहे. विदर्भ वेगळा झाल्याशिवाय लग्न करणार नाही, असं ते म्हणाले होते. पण त्यांनी विवाह केला. अजित पवारांना ‘चक्की पिसिंग’ करायला लावणार होते. राष्ट्रवादी काँग्रेसशी कधीच युती करणार नाही, असे देखील बोलले होते. पण याचा त्यांना विसर पडल्याकडे सपकाळ यांनी लक्ष वेधले.
