आदिवासी समाजाच्या स्वाभिमान आणि सक्षमीकरणासाठी शासन आता केवळ शब्दांवर नव्हे, तर ठोस कृतीवर विश्वास ठेवत आहे. संजय राठोड यांच्या नेतृत्वाखाली आदिवासी विकासाला नवी दिशा आणि व्यावहारिक गती लाभत आहे.
संघर्षांची वारशाने घडवलेली संस्कृती हीच खरी उन्नतीची बीजं घेऊन येते, असं सांगत राज्याचे मृदा व जलसंधारण मंत्री संजय राठोड यांनी आदिवासी समाजाच्या सामाजिक, शैक्षणिक आणि आर्थिक पुनरुत्थानासाठी नवा दृष्टीकोन मांडला आहे. केवळ योजनांचा उल्लेख नव्हे, तर त्या योजनांमागे असलेली सखोल बांधिलकी, समाजाच्या हक्कांची जाणीव आणि आदिवासी तरुणांना सक्षम करण्याचा स्पष्ट आराखडा त्यांनी मांडत आदिवासी अस्मितेला विकासाच्या केंद्रस्थानी आणण्याचा निर्धार व्यक्त केला.
मंत्री संजय राठोड यांनी आदिवासी समाजासाठी सामाजिक, आर्थिक आणि शैक्षणिक पातळीवर प्रगती साधण्यासाठी शासन गंभीर असल्याचे स्पष्ट केले. त्यांनी सांगितले की, आदिवासी बांधव हा केवळ विकासाच्या प्रवाहाबाहेर नाही, तर तो या राष्ट्राच्या उभारणीचा भाग आहे. त्यामुळे नव्या पिढीला शिक्षणात आणणे आणि समाजाची दिशा तरुणांच्या हाती देणे, ही काळाची गरज आहे. त्यांनी भगवान बिरसा मुंडा आणि शामादादा कोलाम यांचा उल्लेख करत सांगितले की, त्यांचा संघर्ष हा इतिहास नव्हे, तर आजच्या तरुणांच्या सामाजिक बांधिलकीसाठी एक दिशा आहे.
Ashish Jaiswal : मिथेनचे राक्षस रोखण्यासाठी जयस्वालांचं पर्यावरण कवच
कोट्यवधींची तरतूद
या कार्यक्रमात सर्वात मोठी घोषणा म्हणजे प्रत्येक एकात्मिक आदिवासी विकास प्रकल्प कार्यालयांतर्गत क्रांतीवीर शामादादा कोलाम यांच्या नावाने लघु आणि सूक्ष्म उद्योगांसाठी स्वतंत्र विशेष पॅकेज जाहीर होणार असून त्यासाठी 10 कोटींची तरतूद करण्यात आली आहे. मंत्री राठोड यांनी सांगितले की याबाबतचा शासन निर्णय लवकरच प्रसिद्ध होईल. हे पाऊल आदिवासी तरुणांसाठी स्वावलंबन आणि उद्योगनिर्मितीच्या दृष्टीने मैलाचा दगड ठरणार आहे.
या कार्यक्रमात आदिवासी विकास मंत्री प्रा. अशोक उईके यांनी आणखी एक महत्त्वपूर्ण निर्णय जाहीर करत सांगितले की, क्रांतीवीर शामादादा कोलाम यांची जयंती आता शासनस्तरावर साजरी केली जाणार आहे. या घोषणेमुळे आदिवासी समाजात मोठा आनंद व्यक्त करण्यात आला आणि ही बाब त्यांच्यासाठी गौरवाची ठरली.
योजनांचा लाभ
कार्यक्रमात विविध क्षेत्रात उत्कृष्ट कामगिरी करणाऱ्या आदिवासी तरुण-तरुणींचा, कर्मचारी वर्गाचा आणि कलावंतांचा सत्कार मंत्री संजय राठोड व अशोक उईके यांच्या हस्ते प्रमाणपत्र देवून करण्यात आला. शिक्षण, कला आणि प्रशासन क्षेत्रात आदिवासी घटकांनी दाखवलेली गुणवत्ता आणि प्रयत्न यांचा गौरव करण्यात आला. त्याचप्रमाणे विविध योजनांचे लाभाचे प्रमाणपत्रे थेट लाभार्थ्यांना प्रदान करण्यात आली.
या संपूर्ण कार्यक्रमात संजय राठोड यांचे नेतृत्व, वक्तृत्व आणि विकासाभिमुख दृष्टिकोन ठळकपणे जाणवला. त्यांनी केवळ भाषणापुरता मर्यादित न राहता, धोरणात्मक निर्णय घेण्याचे आश्वासन दिले. शामादादा कोलाम यांनी समाजासाठी आपलं संपूर्ण आयुष्य झोकून दिलं. त्यांच्या स्वप्नांना मूर्त रूप देण्यासाठी आम्ही शासनात पातळीवर कटीबद्ध आहोत, असे भावनिक आणि प्रभावी उद्गार त्यांनी काढले.
या कार्यक्रमात हजारो आदिवासी बांधवांची उपस्थिती होती. सभागृहामध्ये संजय राठोड यांच्या घोषणांना जोरदार प्रतिसाद मिळाला. उपस्थितांमध्ये नवचैतन्य, आत्मविश्वास आणि समाजासाठी काहीतरी करून दाखवण्याची उर्मी निर्माण झाली. हा कार्यक्रम केवळ एका पुण्यतिथीचा स्मरण सोहळा नव्हता, तर तो आदिवासी समाजाच्या आत्मभानाची आणि विकासदृष्टीची नवचेतना ठरला.
