कल्याणमध्ये गुन्हेगारांना मानसिक रुग्णाचे बनावट दाखले देऊन जामीन मिळवण्याचा धक्कादायक प्रकार समोर आला आहे. जलसंपदा मंत्री शशिकांत शिंदेंनी या गैरप्रकारावर विधान परिषदेत तीव्र आक्रमक भूमिका घेतली आहे . त्यांनी दोषींवर कठोर कारवाईची मागणी केली आहे.
कल्याणमध्ये संतापजनक प्रकार उघडकीस आला असून, गंभीर गुन्हे करणाऱ्या आरोपींना मानसिक रुग्ण असल्याचे दाखले देऊन जामीन मिळवण्याचा धक्कादायक प्रकार उघड झाला आहे. सावकारीचा व्यवसाय करणारा विशाल गवळी याने एक नाही, तर तब्बल चार ते पाच अत्याचाराच्या घटना घडवूनही न्यायालयातून सुटका मिळवली.
संपूर्ण प्रकारामागे यंत्रणेतल्या काही अधिकाऱ्यांची संमती होती का, असा गंभीर प्रश्न उपस्थित होत आहे. या प्रकरणावर विधान परिषदेमध्ये जलसंपदा मंत्री शशिकांत शिंदे यांनी आवाज उठवला असून, आरोपींना जामीन मिळवून देणाऱ्या अधिकारी वर्गावर कठोर कारवाई करण्याची मागणी केली आहे.
प्रशासनाचा हलगर्जीपणा
कल्याणमध्ये घडलेल्या या घटनेने संपूर्ण राज्यात खळबळ उडवली आहे. एका मागोमाग एक असे गुन्हे करणारा विशाल गवळी आणि त्याच्या साथीदारांना सातत्याने जामीन मिळत होता. पोलिस स्टेशनच्या हद्दीतच ही सर्व प्रकरणे घडत असूनही पोलिसांनी त्याकडे दुर्लक्ष केले. जर पोलिसांनी योग्य ती कारवाई केली असती, तर आज या घटना टळल्या असत्या. मात्र, आरोपींना पाठीशी घालणारी व्यवस्था आणि त्यांना सुटकेसाठी मदत करणारे हात कोण होते, हा गंभीर प्रश्न आता उपस्थित झाला आहे.
Manisha Kayande : सरकारी वीजनिर्मिती थंड, खासगी मात्र धगधगती
रुग्णालयांच्या सर्टिफिकेटवर फसवणूक
विशाल गवळी आणि त्याच्या साथीदारांनी खाजगी रुग्णालयातून मानसिक रुग्ण असल्याचे दाखले मिळवून न्यायसंस्थेची दिशाभूल केली. आठहून अधिक गुन्हे दाखल असतानाही त्यांना सातत्याने जामीन मिळत होता. यामागे कोणत्या अधिकाऱ्यांनी भूमिका बजावली? कोणी आरोपींना पाठीशी घातले? हे प्रश्न अत्यंत गंभीर आहेत. शशिकांत शिंदेंनी या संपूर्ण प्रकरणाच्या चौकशीची मागणी करत दोषींवर कठोर कारवाई करण्याचा इशारा दिला आहे.
संरक्षण देणाऱ्यांवर गदा
घडलेल्या प्रकरणामुळे पोलिस प्रशासन आणि न्यायसंस्थेतील काही अधिकाऱ्यांवर संशयाची सुई वळली आहे. जर खोट्या प्रमाणपत्रांच्या आधारे आरोपी सुटत असतील, तर भविष्यात अशा घटनांचे सत्र सुरूच राहणार. शशिकांत शिंदेंच्या या मुद्द्यावर आता सरकार काय भूमिका घेते, याकडे संपूर्ण राज्याचे लक्ष लागले आहे.
